Aver yem sha atineakaa

Aver yem sha mver u atineakaa

 VEGHER 16

The Messiah Arrives

The Messiah Arrives

Yehova pase ér Yesu u Nasareti ngu Mesiya u Aôndo yange tôndo zwa ér ngu van la

YEHOVA yange wase ior u kaven Mesiya u i tôndo zwa ér ngu van laa? Een. Nenge ase kwagh u Aôndo er ne. Yange i nger Ruamabera u ken Zwa Heberu la i kure anyom kar er 400 nahan. Hen shighe la iniunkwase igen ken gar u Nasareti, ken imbusutarimese i Galilia zua a orvannya ugen aburabur. I yilan iniunkwase ne ér Maria. Ortyom ugen, iti na ér Gaberiel, yange ande hen iniunkwase ne, kaa a na ér Aôndo una yar tom a tahav mbu tomov nav, shin icighan jijingi na, nahan una wa iyav una mar wannomso, shin er lu a fa nom ga nahan kpaa. Wan ne una hingir Tor shon u una hemen gbem sha won, u Aôndo yange tôndo zwa ngise ngise ér ngu van la! Wan ne una lu Wan u Aôndo, gadia Aôndo una gema uma na sha, una wa ken iyav mbu Maria.

Maria yange hide a iyol ijime ngohol icighantom u i na un ne. Yosev, orkapinta u lu sôôr Maria la kera soo u vôson un ga. Kpa zum u Aôndo tindi ortyom na va pase un kwagh u iyav mbu Maria wa la yô, a mase vôson un. Kpa kwaghôron u profeti u yange kaa ér a mar Mesiya ken Betelehem la kure shami kpa? (Mika 5:2) Angar u kiriki ne gba ica a Nasareti kuma er ukilomita 140 nahan!

Tor u Mbaromanu ugen, yange na zwa ér i ôr iyengeior. Nahan gba u ior vea za nger ati sha ajiir a ve. A shi nan kpa, Yosev man Maria due ken gar u Betelehem, nahan Yosev za a kwase na u lu iyav ne ken gar la. (Luka 2:3) Maria yange mar hen anijiir u injaa ga; lu ken ityôghile mar ye, shi gbir wan na shin anar u haan ilev kwaghyan. Aôndo tindi ikyum i mbatyomov nav va ôr mbakuranilev mbagenev mba ve lu hen kpe igyungu igen yô, ér wan u i sember maren la ka Mesiya shin Kristu u yange i tôndo zwa ér ngu van la.

Shighe kar yô, mbagenev kpa ôr akaa a tesen ér Yesu ka Mesiya u ityendezwa la. Profeti Yesaia yange tsenga ôron ér orgen una er tom u sôron gbenda sha ci u tom u injaa u Mesiya una va er la. (Yesaia 40:3) Oryôônangwe u Mesiya ne lu Yohane u Eren Batisema. Zum u Yohane nenge a Yesu yô, a genger imo á kaa ér: “Nenge Waniyôngo u Aôndo u A tee isholibo i tar kera ne.” Fese nahan mbahenen mba Yohane mbagenev dondo sha Yesu. Orhenen na ugen kaa ér: “Se zua a Mesiya ve.”—Yohane 1:29, 36, 41.

Shi kwagh ugen kpa tese ér Yesu ka Mesiya. Zum u Yohane er Yesu batisema la, Yehova iyol na ôr kwagh sha. Yehova yange shighe Yesu mkurem sha ikyev i icighan jijingi na, Yesu maa hingir Mesiya, tsô Yehova kaa ér: “Ngun ka Wan Wam u ishima ishima, u i doom a Na yum yô.” (Mateu 3:16, 17) Nahan lu mve u Mesiya u i tôndo zwa ér ngu van la je ne!

Mve na ne lu ken inyom i nyi? Lu ken inyom i 29, sha mkur u anyom 483 a Daniel tsenga ôron ér una va la vough. Sha kpôô yô, kwagh ne ka ikyav i tesen wanger wanger ér Yesu ka Mesiya shin Kristu. Yange gba u Mesiya una yôô nyi loho shighe u lu shin tar laa?

—I zua a kwagh u i nger heen ne ken Mateu ityough 1 zan zan 3 man Marku ityough 1 kua Luka ityough 2 man Yohane ityough 1.