Aver yem sha atineakaa

Aver yem sha mver u atineakaa

 VEGHER 11

Inspired Songs That Comfort and Teach

Inspired Songs That Comfort and Teach

Davidi man mbagenev yange ve wa atsam a civir Aôndo a mi. Takerada u Upasalmi ngu a atsam ne 150

KEN Bibilo jimin cii ka takerada u Upasalmi, u ú lu a atsam a wuese Aôndo ne, u hembe kehen ye. Yange i tôô anyom 1,000 nahan u ngeren atsam ne cica cii. Asember agen ken takerada u Upasalmi nga ken asember a hemban doon man a kôron ken ishima a i nger sha kwagh u jighjigh u nan yô. Takerada u Upasalmi ôr kwagh u mlu u ken ishima u msaanyol, er iember man iwuese man ishughun nahan, shi ôr kwagh u mlu u uren kpaa, er mliam man ijungwen man mgemshima nahan. Ikyav tese wang ér, ior mba yange ve nger upasalmi mban ya ikyar vea Aôndo kangenaa, shi ve na un jighjigh kpaa. Ka atineakaa agen a atsam a i nger ken takerada u Upasalmi je a lu shin heen ne.

Ka Yehova a lu Tor u Hemban Cii ye, shi a kuma u se civir un shi se wuese un kpaa. Upasalmi 83:18 kaa ér, “We, u i yer iti You er TER [shin Yehova, NW] la, [ka] We tseegh U lu Uhembansha sha tar cii” ye. Upasalmi kpishi wuese Yehova sha akaa a á gbe la, er asan a sha kwavaôndo, akaauma a kpilighyol a a lu shin tar la, man iyol i orumace i í kpilighyol la nahan. (Pasalmi 8; 19; 139; 148) Upasalmi mbagenev di wuese Yehova ér ngu Aôndo u yiman shi kuran mba ve civir un sha mimi la. (Pasalmi 18; 97; 138) Shi mbagenev na iti na icivir ér ngu Aôndo u ijirôron i mimi, u a yem mba i kighir ve a ican shi a gem a tsahan mbaaferev la.—Pasalmi 11; 68; 146.

Yehova wasen mba á doo ve ishima la shi surun ve asema kpaa. A shi nan kpa, ior kpishi hemba soon pasalmi 23 u Davidi yange nger pase ér Yehova ka orkuranilev u dedoo, u a hemen iyôngo na shi a kor i shi a nengen sha i dedoo la. Pasalmi 65:2 umbur mbacivir Aôndo cii ér, Yehova “ongo msen.” Ior kpishi mba ve er Aôndo isholibo i vesen zua a msurshima tsung ken Pasalmi 39 man 51. Heen ne, Davidi ôr kwagh u mgemshima na sha asorabo a na a vesen la a ishima na i môm shi a pase er un ne jighjigh ér Yehova una de un asorabo a na yô. Pasalmi 55:22 wa se kwagh ér se suur sha Yehova shi se haa akaa a zan se iyol cii sha a Na.

Yehova una sôr tar ne sha ikyev i Tartor u Mesiya la. Ikyav tese wang ér avur agen ken Upasalmi ôr kwagh u Mesiya, Tor u i tsenge ôron kwagh na la. Pasalmi u sha uhar tsenga ôron ér, Tor ne una tim akuraior a bo, aa a lu hendan a na la. Pasalmi 72 di pase ér, Tor ne una bee a ijen man ifer man mkighir. Pasalmi 46:9 tese ér, Aôndo una er ityav mbia bee, shi una vihi ikyav mbi utyav cica cii sha ikyev i Tartor u Mesiya la. Pasalmi 37 gema kaa ér, mbaaferev vea kera lu ga, kpa mbaperapera vea lu ken bem man ken mzough shin tar gbem sha won.

—I zua a kwagh u i nger heen ne ken takerada u Upasalmi.