Aver yem sha atineakaa

Aver yem sha mver u atineakaa

 VEGHER 15

A Prophet in Exile Receives Glimpses of the Future

A Prophet in Exile Receives Glimpses of the Future

Akaaôron a profeti a Daniel ôr sha kwagh u Tartor u Aôndo man mve u Mesiya la. Mtim u Babilon

YANGE i yem a Daniel ken Babilon, za lu shiror ken tar la cii man mtim u Yerusalem ye. Daniel lu gumor u civir Aôndo sha mimi kpen kpen. Mbababilon mba ve yem a na uikyangen kua Mbayuda mbagenev kpaa la, na ve an-ian u eren kwagh sha tseeneke ve. Daniel tsa ken Babilon bee iyol ker. Sha shighe ne cii Aôndo ver un doo doo, je yô war ku zum u i gbihi un shin ihyungwa i ubegha la, shi i tese un mbampase mba sha mnenge mba akaa a aa va er ken hemen ica yô. Akaaôron a profeti a hemban lun a inja a Daniel ôr la lu sha kwagh u Mesiya man mtemtor Na.

Yange i pase Daniel shighe u Mesiya una va yô. I ôr Daniel shighe u ior mba Aôndo vea hii u veren ashe a mve u un “u i shigh Un mkurem [shin Mesiya, NW], ka Tor je la” yô. Yange gba u ulahadi mbaanyomov 69 vea kar, hii sha shighe u tindi una due ér i za sôr Yerusalem shi i maa un la, ka hen shighe la Mesiya una va ye. Lahadi môm ngu a ayange ataankarahar; lahadi u anyomov di kpa ka anyom ataankarahar. Daniel yange kpe shighe kar gôgônan cii ve tindi due ken inyom i 455 C.S.Y. ér i̱ hide i̱ za maa Yerusalem ye. Hii sha shighe u mdugh u tindi la, “ulahadi” mba 69 mbara hii zan zan anyom kar 483 va kure ken inyom i 29, shighe u Yesu la. Vegher u dondon u takerada ne pase se kwagh u yange er ken inyom i 29 shon la. Daniel shi tsenga ôron ér “á gber” Mesiya “kera” shin a wua un, sha u nan iwom sha ci u asorabo.—Daniel 9:24-26.

Mesiya una hingir Tor sha. Daniel shi nenge mpase u sha mnenge u kpilighyol ugen sha akaa a sha. Á nenge Mesiya, ka “wan u or” je la, va zan zan va ar hen ikyônough ki torough ki Yehova iyol na. Yehova na un “tor sha won cii man icivir man tartor” kpaa. Tartor la ua lu gbem sha won. Shi i ôr Daniel kwagh ugen u doon tsung sha kwagh u Tartor u Mesiya la. Tor la una tema tor a ior mbagenev imôngo; i yila nongo u mba una tema tor a ve la ér “uicighanmbaiorov mba Uhembansha”—Daniel 7:13, 14, 27.

Tartor la ua tim ugomoti mba tar ne. Aôndo yange na Daniel mfe u pasen Nebukadinesar, tor u Babilon mnyam magenev ma ma nzughul un kpishi yô. Tor yange nenge a eev mbu vesen mbugenev, i er ityough ki mbu sha zenaria, vanger man ave a mbu lu sha azurfa, iyav man anam a mbu lu sha togula, ahambeangahar a mbu lu sha iyôgh ki iligh man akevangahar a mbu lu sha iyô nungwa inyatyuu. Daniel yange pase ér avegher kposo kposo a eev mbun tile sha ityough ki ityartor i ia hemen tar sha adondo adondo yô, hii sha tartor u Babilon, u ú lu ityough ki zenaria la. Daniel shi tsenga nengen ér sha ayange a mkur u ugomoti mba tar u ifer ne, Tartor u Aôndo ua er kwagh. Ua tim ugomoti mba tar ne cica cii. Maa ua hemen gbem sha won.—Daniel, ityough 2.

Daniel yange bee iyol shi nenge mtim u i tim Babilon la kpaa. Tor Shirushi tim gar la vough er uprofeti tsenga ôron nahan. Shighe kar kpuaa yô, i mase pasen Mbayuda ken ikyangenev vev i tuhwa sha shighe u anyom 70 a i tsenga ôron ér tar ve ua lu ice la bee kera la. Ugomna man upristi man uprofeti mba jighjigh yange ve hemen Mbayuda hen shighe la, kure kure tsô, ve hide ve maa Yerusalem man tempel u Yehova. Nahan kpa, shighe u anyom 483 la aa kure la, a lu ia eree?

I zua a kwagh u i nger heen ne ken takerada u Daniel.