Aver yem sha atineakaa

Aver yem sha mver u atineakaa

 VEGHER 26

Paradise Regained!

Paradise Regained!

Yehova tsegha iti Na, shi kende a mtemtor na sha shi bee a hanma inja ifer cii sha ikyev i Tartor u Kristu una lu tor la

TAKERADA u masetyô u Bibilo, u i yer ér Mpase la na uumace ishimaverenkeghen. Ka apostoli Yohane yange nger takerada ne ye. Man ngu a mbampase mba sha mnenge mba sha kwagh u mkur u awashima u Yehova.

Ken mpase u sha mnenge u hiihii la, Yesu u i nder un shin ku la wuese iniongo i Kristu igen shi wa i kwagh kpaa. Mpase u sha mnenge u sha uhar la tese ikyônough ki torough ki Aôndo, ape akaauma a ken jijingi á lu wuese un la.

Awashima u Aôndo za hemen; Waniyôngo, Yesu Kristu ngohol ihurenruamabera u i var akav ataankarahar sha mi yô. Mba bughun akav a anyiin a hiihii la yô, mbaanyinyav mba sha ikyav due. Ornyinya u hiihii la ka Yesu, a tema sha nyinya u pupuu, ngu a tsar u Tor sha ityou. Mbaanyinyav mbagenev kpaa due, ve tema sha anyinya a lun ukala kposo kposo. Mbaanyinyav mban tile sha ityough ki ityav mbi nôngon man ijen man bouange, man akaa ne cii nga eren ken ayange a masejime a msertar u uumace ne. Zum u í bugh ikyav i sha utaankaruhar la yô, í tôngo ikyor i sha ikyav itiankarihiar, man ikyor i tôngon ne ka gbenda u yôôn ajiraôron a Aôndo. Ikyor i í tenge ne gema va a atsan ataankarahar a sha ikyav, shin akaa a tesen iyugh i Aôndo.

I ver Tartor u Aôndo sha, shi i mar wannomso kpaa, wannomso ne gema tile sha ityough ki Tartor ne. Ityav gba sha, nahan i gbihi Satan man mbatyomov nav mba bov shin tar. Tsô zegeimo kaa ér, “Kwagh á gema á tser tar.” Ishima vihi Diabolo tsung, gadia a fa er shighe na a kera vese ga yô.—Mpase 12:12.

Yohane nenge a Yesu, u a lu waniyôngo la sha, man ngu a iorov 144,000 mba i tsough ve ken uumace yô. Ve mban ne “vea tema tor a” Yesu imôngo. Nahan takerada u Mpase tese ér ior mba ve lu vegher u kiriki u vor la vea kuma iyenge 144,000.—Mpase 14:1; 20:6.

Utor mba tar ne kohol hen Armagedon, “ityav mbi iyange i vesen i Aôndo, Uhembanagee la.” Ve nôngo ityav a Yesu, un u a tem sha nyinya u pupuu, shi a hemen akumautya a sha la. I tim utor mba tar ne cica cii. Shi i kange Satan, tsô Yesu man iorov 144,000 mba ve lu vea na la tema tor sha tar “anyom dubu.” Anyom dubu la nga kur yô, i tim Satan kera.—Mpase 16:14; 20:4.

Mtemtor u Kristu man mba vea hemen a na imôngo anyom dubu la una er a uumace mba ungwan imo i Aôndo la nena? Yohane nger ér: “[Yehova] una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” (Mpase 21:4) Tar ua hingir paradiso!

Nahan yô, takerada u Mpase mase kuren loho u ú lu ken Bibilo la. Tartor u Mesiya la ua tsegha iti i Yehova shi ua kende a mtemtor na sha zan zan gbem sha won!

I zua a kwagh u i nger heen ne ken takerada u Mpase.