Aver yem sha atineakaa

Aver yem sha mver u atineakaa

 VEGHER 18

Jesus Performs Miracles

Jesus Performs Miracles

Uivande mba Yesu eren la tese er una yar tom a tahav nav zum una tema Tor la

AÔNDO yange na Yesu tahav mbu eren akaa a uumace mbagenev vea fatyô u eren ga yô. Yesu er uivande kpishi, ashighe agen je yô, á er ve sha ishigh ki ikpelaior. Uivande mban tese ér Yesu ngu a tahav sha mbaihyomov man mbamzeyol mba se uumace mba se lu vough ga ne se kanen shio u nôngon a mi yô. Nenge ase mbamzeyol mbagenev mba Yesu kar a mi kera la.

Yesu na ior kwaghyan man kwaghman. Yesu gema mngerem hingir wain, lu ivande i hiihii i er je la. Shi yange er ivande igen acin ahar, koso ior udubu udubu mba ve lu ijen yô sha ikpenbredi man ishu kpuaa. Sha ikwa i ihiar ne cii, ikpelaior la ya kwaghyan neer ve.

Yesu bee ior angev. Yesu yange bee ior “hanma injauange man shi hanma mtseenem kpaa.” (Mateu 4:23) Yange bugh mbapirinashe ashe man mbakondonato ato shi wanger mbaamandev man mbagban ikyungugh, kua mbakeer man mbasombonalegh kpaa. Ma angev môm hemba un u been ga.

Yesu yange ijeverahumbe. Zum u Yesu man mbahenen nav lu peren Zegemnger u Galilia yô, zegeuraahumbe gba. Nahan cier mbahenen nav iyol kpishi. Kpa Yesu gema kenger uraahumbe la, maa kaa ér: “Huan, lu ving!” Tsô huan her ving cii. (Marku 4:37-39) Sha shighe ugen di, Yesu zende sha kwavmnger zum u zegeuraahumbe lu karen baveraa yô.—Mateu 14:24-33.

Yesu hemba ujijingi mba bov tahav. Ujijingi mba bov hemba uumace agee ica je. Ior kpishi nôngo ér vea war ayol a ve sha ikyev i mbaihyomov mba Aôndo mba bov mban kpa hemba ve. Nahan kpa, ashighe kpishi a Yesu na ujijingi mban wada ér ve due ken ior kera la cii, ve due kera ayem. Mayange je Yesu cia ujijingi mban ga. Kpa lu ve, ve gema ve kav tahav mbu Yesu lu a mi la nahan ve cian un ye.

Yesu hemba ku. I yila ku ér, “orihyom u masetyô,” man i yila u nahan ka sha inja je. Ku ka orihyom u oruma môm nana fatyô u hemban u ga yô. (1 Mbakorinte 15:26) Nahan kpa, Yesu nder ior shin ku. Yange nder gumor ugen, gema un na ngô na u lu kwasecôghol la shi nder wanyekwase u kiriki ugen, gema un na mbamaren nav mba ve zungwe ku na kpishi la. Shi kwagh u kpilighyol ugen u Yesu er yô, lu mnder u a nder huror na Lasaru sha ishigh ki ikpelaior i i lu vaan ku na la, shin er or ne kpe kuma er ayange anyiin nahan je kpaa la! Mbaihyomov mba Yesu mba ve kôr un ihyom kpoghuloo la je kpa lumun a uivande mba Yesu lu eren la.—Yohane 11:38-48; 12:9-11.

Er nan ve Yesu eren uivande mbanaa? Ior mba Yesu bee ve angev la yange ve kpe ken hemen ga zee? Een yange ve kpe, nahan kpa uivande mba Yesu er la gema na se ishimaverenkeghen. Uivande mban tese ér akaaôron a profeti a dedoo a sha kwagh u mtemtor u Tor Mesiya la ka akaaôron a mimi. Ityôkyaa ngi i se gba akperan ken ishima ser, un u Aôndo a ver un Tor la una fatyô u been a ijen man angev man ijeverahumbe i vihin ior akaa, shin timin ujijingi mba bov gayô ku kera ga ze.

I zua a kwagh u i nger heen ne ken takerada u Mateu man Marku man Luka man Yohane.