Aver yem sha atineakaa

Aver yem sha mver u atineakaa

 VEGHER 22

The Apostles Preach Fearlessly

The Apostles Preach Fearlessly

Nongo u Kristu seer ngeen a ngee shin er mtev u sha ican mough sha u nahan kpaa

YESU yange kôndo yem sha, ayange nga kar pue yô, mbahenen nav 120 kohol ken iyou igen ken Yerusalem sha shighe u Iniongo i Mbayuda i Pentekosti, ken inyom 33 la. Fese nahan, ihyuran due sha, lu er ijeverahumbe nahan, iv ken iyou la. Ivande maa er, mbahenen mbara hii u lamen ken ijô igen i ve fa i ga yô. Lu nyi i na ve akaa a kpilighyol ne eree? Aôndo yange na mbahenen mban jijingi na.

Ikpelaior lu ken won u iyou la, sha ci u mbavannya mba ken ityar kposo kposo va iniongo la. Nahan kpiligh ve iyol zum u ve ungwa mbahenen mba Yesu lu lamen ken ijô ve tsembelee yô. Tsô Peteru pase ve kwagh u za hemen yô. Peteru ôr kwagh ter kwaghôron u profeti Yoel yange kaa ér Aôndo una “haa” jijingi na, man jijingi ne una na mba vea ngohol un la cii tahav mbu eren akaa ne. (Yoel 2:28, 29) Icighan jijingi u i haa ve ne lu ikyav i tesen wang ér mgem u vesen ugen za hemen hen shighe la. Mgem shon yô lu un ne: Aôndo kera lu a ikyurior i Iserael ga, kpa lu nongo u Kristu u i sember veren la, Aôndo lu a u ye. Mba ve soo u civir Aôndo sha mimi cii lu u vea hingir mbahenen mba Kristu hen shighe la.

Kpa hen zum la, mtev u sha ican seer a seer sha mbahenen, mbaihyomov vev wa ve ken gaadi. Nahan kpa ortyom u Yehova bugh ihinda i gaadi la tugh, due a ve, kaa a ve ér ve za hemen u pasen kwaghaôndo. Sev mbu aven yô, ve er er ortyom la kaa ve nahan. Ve nyôr ken tempel, ve gba ôron loho u dedoo sha kwagh u Yesu. Asema vihi mbaahendanev vev mba kwaghaôndo mbara ker kpishi, nahan ve ta ve icin gbang gbang ér ve de u pasen kwaghaôndo. Kpa mbaapostoli gema ôr kwagh vangertiôr kaa ér: “Ka u sé hemba ungwan imo i Aôndo keng a imo i ior.”—Aerenakaa 5:28, 29.

Mtev u sha ican hemba taver a taver hen shighe la cii. Mbayuda mbagenev wa Sefanu kwagh iyol ér a tuhwa Aôndo, nahan ve ta un awen ve wua. Gumor ugen, i yilan un ér Saulu u Tarsu, nenge er i wua Sefanu yô, shi lumun ku na kpaa. Gumor ne maa mough lu yemen Damaseku sha u una za va a mbahenen mba Kristu uikyangen yô. Er Saulu lu yemen sha gbenda la, iwanger due sha kwavaôndo, wanger, kase un, maa imo kaa a na ér: “Saulu! Saulu! Ka nyi u tevem a icana?” Ashe na pir sha ci u iwanger la, tsô Saulu pine ér: “Ka we ana, Tere?” Imo la kaa ér: “Ka Mo, Yesu.”—Aerenakaa 9:3-5.

Ayange nga kar atar yô, Yesu tindi orhenen ugen, iti na ér Anania, ér a̱ za bugh Saulu ashe. Tsô i er Saulu batisema, nahan a hii u pasen ior kwagh u Yesu vangertiôr. I va hingir u yilan Saulu ér apostoli Paulu. Paulu lu or u tseen ishima u ken nongo u Kristu.

Lu Mbayuda man Mbasamaria tseegh mbahenen mba Yesu lu pasen ve loho u dedoo u Tartor u Aôndo hen shighe la ye. Tsô ortyom ande hen Korneliu, un lu Orromanu, shi lu torutya kpaa, lu or u civir Aôndo je. Ortyom la kaa a na ér a tindi i za yila apostoli Peteru. Tsô Peteru mough za hen Korneliu, mbagenev kpaa za a na imôngo. A za ôr Korneliu kwaghaôndo kua ya na cii. Er Peteru lu lamen a ve la, icighan jijingi gba sha mbananjighjigh mba ve lu Atôatyev ne, nahan apostoli ne kaa ér i̱ er ve batisema ken iti i Yesu. Lu hen shighe ne gbenda due u akuraior agen kpaa aa fatyô u zuan a uma u tsôron ye. Tsô nongo u Kristu wa iyol u samber a loho u dedoo aren sha ajiir agen a icaa.

I zua a kwagh u i nger heen ne ken Aerenakaa 1:1–11:21.