Aver yem sha atineakaa

Aver yem sha mver u atineakaa

 ITYOUGH PUETAANKARUHAR

Ian i Civirigh i Se Lu a Mi I Eren Msen La

Ian i Civirigh i Se Lu a Mi I Eren Msen La

“U A gbe sha man tar la” soo u eren kwagh sha mbamsen asev.—Pasalmi 115:15

1, 2. Er nan u nenge wer msen ka iyua i injaa, man er nan ve i gbe u se fa kwagh u Bibilo i er sha kwagh u msen laa?

ALUER se tôô tar u se tem sha u ne se kar sha usha yô, u gba ikyev ga cii. Yehova ka una gema una kenger tar ne yô, ior mba ken akuraior a a tem sha u la cii ve lu un er ka ibyelegh ki mngeregh ki shin ikya nahan. (Pasalmi 115:15; Yesaia 40:15) Sea ndahar a yina sha usha kpa, Pasalmi 145:18, 19 kaa ér: “TER ngu ikyua ikyua a mba ve yer Un cii, mba ve yer Un sha mimi la cii. Una na mba ve cie Un la kwagh u a sar ve yô, man shi Una ungwa mliam vem, Una yima ve kpaa.” Ian i se lu a mi ne ka i icivirigh je gande! Yehova, Aôndo u hemban agee u a gbe akaa cii la soo u lun ikyua a vese, shi a soo u keghen ato a mbamsen asev. Sha nahan yô, msen ka ian i civirigh, shin iyua i injaa i Yehova a ne hanma wase yô.

2 Kpa Yehova una ver ato a vese shighe u se lam a na sha gbenda u a lumun a mi la yô. Se er kwagh ne nena? De se nenge kwagh u Bibilo i er sha kwagh u msen yô.

ER NAN VE I GBE U SE EREN MSEN HEN YEHOVA?

3. Er nan ve i gbe u u eren msen hen Yehova?

3 Yehova soo ér we u eren msen hen a na shin u lamen a na. Er nan ve se fe? Nenge kwagh u i nger ken Mbafilipi 4:6, 7 la (Ôr). Hen ase sha kwagh u doon tsung u i kaa ér se eren ne. Kwagh wou gba Or u a hemen sha won cii la ishima tsung shi a soo ér we u ôron un er ishima i lu u ker la shi u pasen un mbamzeyol ou kpaa.

4. Ka wea eren msen hen Yehova hanma shighe yô, ikyaryan you vea na i hemba taver nena?

 4 Msen ka a wase se u yan ijende vea Yehova kôôsôô. Azende ka aa lamen hanma shighe sha akaa a ve henen ken ishima man mbamzeyol vev kua mlu ve u ken ishima yô, ijende ve la i hemba taver cii. Kape u eren msen hen Yehova kpa i lu vough je la. A pase u mbamhen nav kua mbaawashima nav ken Bibilo jimin cii, shi a ôr u kwagh u un lu va eren ken hemen kpaa. U fatyô u pasen un akaa a ken atô u ishima you je kpaa, sha u lamen a na hanma shighe cii. Aluer u ngu eren nahan yô, ijende i u ye vea Yehova la ia hemba taver cii.—Yakobu 4:8.

KA NYI SE ER VE AÔNDO UNA UNGWA MSEN WASA?

5. Er nan ve se fe ser Yehova ongo hanma msen cii ga?

5 Ka hanma msen cii Yehova a ongo yee? Ei, ka hanma msen a ongo ga. Sha ayange a profeti Yesaia la, Yehova kaa a Mbaiserael ér: “Zum u ne seer a seer eren mbamsen kpishi kpaa, M ver ato ga; ave a en iv a awambe.” (Yesaia 1:15)  Nahan aluer se wa ikyo ga yô, se lu eren akaa a aa na Yehova una pav a vese, maa una kera ungwa mbamsen asev ga yô.

6. Er nan ve jighjigh u nan a lu kwagh u hange hangee? U tese wer u ngu a jighjigh u nan nena?

6 Saa se na Yehova jighjigh ve una ungwa mbamsen asev ye. (Marku 11:24) Apostoli Paulu yange kaa ér: “Á fatyô u doon Aôndo ishima ga, saa sha jighjigh u nan. Gadia or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.” (Mbaheberu 11:6) Kpa u se kaan di tsô ser se na jighjigh la tseegh kuma ga. Gba u se tese ser se mba a jighjigh u nan sha u ungwan imo i Yehova ayange ayange.—Ôr Yakobu 2:26.

7. (a) Shighe u se lu eren msen hen Yehova yô, doo u se hide a iyol ijime shi se er kwagh sha icivir sha ci u nyi? (b) Zum u se lu eren msen yô, se tese ser se mba eren sha mimi nena?

7 Shighe u se lu eren msen hen Yehova yô, gba u se hide a iyol ijime shi se er kwagh sha icivir. Sha ci u nyi? Aluer gba u se lam a ma tor u tar ne shin pesiden yô, se lam a na sha icivir. Yehova ka Aôndo Uhembanagee, nahan ka un je i gbe u se hemba nan un icivir shi se hemba hiden a ayol ase ijime sha ishigh nagh shighe u se lu lamen a na ye. (Genese 17:1; Pasalmi 138:6) Shi gba u se eren msen hen Yehova sha mimi shi se pasen un kwagh u a lu se ken ishima la, se gbaa kimbir asember gbem ga.—Mateu 6:7, 8.

8. Aluer se mba eren msen sha ma kwagh yô, ka nyi igen kpa i gbe u se eree?

8 Kwagh u masetyô yô, aluer se mba eren msen sha ma kwagh yô, gba u se nôngo sha afatyô wase cii se er tom sha kwagh u se lu eren msen sha mi la. U tesen ikyav yô, aluer se mba sônon Yehova akaa a kwagh a gbe se a mi ayange ayange la yô, se fatyô u gban shirin ave tsô, henen ser Yehova una na se hanma kwagh u se lu a agee a eren tom zuan a mi la ga. Gba u se eren tom sha gbashima shi se lumun u  eren hanma inja tom u se fetyô u eren cii. (Mateu 6:11; 2 Mbatesalonika 3:10) Shin aluer se sôn Yehova ser a wase se se de u eren ma kwagh u bo yô, a gba u se palegh akaa a aa na a sar se u eren kwaghbo shon la. (Mbakolose 3:5) De se time sha mbampin mbagenev mba ior kpishi ve pinen sha kwagh u msen yô.

MBAMPIN MBA IOR KPISHI VE PINEN SHA KWAGH U MSEN YÔ

9. Gba u se eren msen hen ana? Yohane 14:6 tese se nyi sha kwagh u msene?

9 Gba u se eren msen hen ana? Yesu yange tese mbadondon un ér ve eren msen hen “Ter wase u Sha.” (Mateu 6:9) Shi kaa ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.” (Yohane 14:6) Sha nahan yô, gba u se eren msen hen Yehova tseegh ken iti i Yesu. U eren msen ken iti i Yesu la inja na ér nyi? Inja na yô, saa se tese ser tom u vesen u Yehova yange na Yesu la ngu se a inja ve Yehova una ungwa mbamsen asev ye. Er i vande pasen se nahan, Yesu yange va shin tar sha u va yiman se sha ikyev i isholibo man ku. (Yohane 3:16; Mbaromanu 5:12) Yehova shi tsua Yesu ér a lu Zegepristi man Orjir kpaa.—Yohane 5:22; Mbaheberu 6:20.

U fatyô u eren msen hanma shighe cii

10. Shighe u se lu eren msen yô, saa se tema inya shin se tile sha shin se gure anu inyaa? Ta iwanger.

10 Shighe u se lu eren msen yô, saa se tema inya shin se tile sha shin se gure anu inyaa? Ei, Yehova kaa a vese ér sea eren msen yô, se gure anu inya shin se tema inya shin se tile sha ga. Bibilo tese ér se fatyô u lamen a Yehova sha hanma gbenda u u tese icivir cii. (1 Kroniku 17:16; Nehemia 8:6; Daniel 6:10; Marku 11:25) Kwagh gba Yehova sha u se lamen a na sha icivir, ka sha gbenda u se til sha shin se tem inya shin se gur anu inya la ga. Se fatyô u lamen a na duen  sha gayô shin ishima, hen hanma ijiir i se lu cii man sha hanma shighe cii, a̱ lu tugh shin tetan kpaa. Zum u se lu eren msen hen Yehova yô, se fatyô u lun a vangertiôr ser una ungwa se, aluer ma orgen nan ngu ungwan kwagh u se lu ôron la ga je kpaa.—Nehemia 2:1-6.

11. Ka nyi akaa nahan se fatyô u lamen a Yehova sha mini?

11 Ka nyi akaa nahan se fatyô u eren msen sônonô? Se fatyô u eren msen sônon hanma kwagh u Yehova a lumun a mi cii. Bibilo kaa ér: “Ka sea sôn nyityôkwagh u a lu sha ishima Na vough yô, A ungwa se.” (1 Yohane 5:14) Se fatyô u eren msen sha akaa a ase kpaa. Gba u se eren msen hen Yehova vough er ka se lamen a ma ijende yase i sôngo sôngo nahan. Se fatyô u ôron Yehova nyityôkwagh i se henen shin se lu a mi ken ishima cii. (Pasalmi 62:8) Se fatyô u eren msen sônon ser a na se icighan jijingi na u una wase se u eren kwagh u vough yô. (Luka 11:13) Shi se fatyô u sônon Yehova ser a na se kwaghfan se tsua akaa a injaa, shi se fatyô u eren msen sônon un ser a na se agee a wan ishima a mbamtaver. (Yakobu 1:5) Gba u se sônon Yehova ser a de se asorabo ase. (Mbaefese 1:3, 7) Shi doo u se eren msen sha ci u mbagenev kpaa, er ior asev kua anmgbianev mba nomso man mba kasev mba ken tiônnongo nahan.—Aerenakaa 12:5; Mbakolose 4:12.

12. Ka nyi i gbe u ia hemba lun kwagh u vesen ken mbamsen aseva?

12 Ka nyi i gbe u ia hemba lun kwagh u vesen ken mbamsen aseva? Ka kwagh u Yehova man u eren ishima na. Doo u se sughun un sha mimi sha akaa a a er sha ci wase la. (1 Kroniku 29:10-13) Se fa kwagh ne sha ci u shighe u Yesu lu shin tar la, yange tese mbahenen nav u eren msen. (Ôr Mateu 6:9-13.) Yange kaa a ve ér ve hii eren msen ér i tsegha iti i Aôndo, inja na yô ér i nengen iti la ér ka icighanti je. Yesu maa tese ér se eren msen ser Tartor u Aôndo u va shi i er ishima na shin tar cii. Yesu tese ér se̱ vande eren msen  sha akaa a vesen ne cii ve se mase eren msen sha mbamgbe asev ye. Aluer se mba hemban ôron kwagh u Yehova ken mbamsen asev yô, se lu tesen ser kwagh na hemba gban se ishima.

13. Gba u se er msen a lihe a kuma shighe nena?

13 Gba u se er msen a lihe a kuma shighe nena? Bibilo ôr er msen una lihe a kighir ga. Ka kwagh u se lu eren msen sha mi la una na msen wase una lihe shin una lihe ga ye. U tesen ikyav yô, se fatyô u eren msen sha kwaghyan tiônôô  cii man yan un ye, kpa shighe u se lu sughun Yehova shin pasen un mbamzeyol asev yô, msen la una fatyô u lihen. (1 Samuel 1:12, 15) Se soo ser se eren mbamsen gôgônan sha u i doo ior u ungwan, er ior mbagenev eren sha ayange a Yesu la nahan ga. (Luka 20:46, 47) Mbamsen mbara nahan mba doon Yehova ga. Yehova soo ér se eren msen sha akaa a a lu se ken ishima yô.

14. Gba u se eren msen ken iyange i môm kwa me, man kwagh ne tese se nyi sha kwagh u Yehova?

14 Gba u se eren msen ken iyange i môm kwa me? Yehova kaa a vese ér se eren msen hen a na hanma shighe cii. Bibilo kaa ér se ‘eren msen,’ se ‘taver ishima sha msen u eren,’ shi se ‘eren msen gbem.’ (Mateu 26:41; Mbaromanu 12:12; 1 Mbatesalonika 5:17) Yehova keghen iyol u ungwan mbamsen asev hanma shighe cii. Se fatyô u sughun un  hanma iyange sha ci u dooshima na man erdoo na u a lu a ikighir ga la. Shi se fatyô u sônon un ser a hemen se shi a na se agee shi a sur se asema. Aluer ian i se lu a mi i eren msen hen Yehova ne gba se kwagh sha mimi yô, se lamen a na sha hanma ian ci.

15. Zum u se kur msen yô, gba u se kaa ser “amen” sha ci u nyi?

15 Zum u se kur msen yô, gba se kaa ser “amen” sha ci u nyi? Inja i ishember i “amen” la ér “ka nahan” shin “i̱ lu nahan.” Ka gbenda u tesen ser kwagh u se ter ken msen la se ôr un a ishima i môm, shin sha mimi wase cii. (Pasalmi 41:13) Bibilo tese ér aluer or hemen se ken msen yô, doo u se kaa ser “amen” shin ishima gayô se ôr a due sha, sha u tesen ér se lumun a kwagh u nan kaa la.—1 Kroniku 16:36; 1 Mbakorinte 14:16.

GBENDA U AÔNDO A ONGO MBAMSEN ASEV LA

16. Yehova ongo mbamsen asev mimii? Ta iwanger.

16 Yehova ongo mbamsen asev mimii? Een, ongo. Bibilo ôr kwagh na kaa ér “ongo msen.” (Pasalmi 65:2) Yehova ongo mbamsen mba ior umiliôn imôngo ve eren la shi eren akaa a ve sônon un la kpaa, sha igbenda kposo kposo.

17. Yehova ka a tindi mbatyomov nav shin mbacivir un mba shin tar ve er kwagh sha msen wase nena?

17 Yehova ka a tindi mbatyomov nav kua mbacivir un mba shin tar ve er kwagh sha msen wase. (Mbaheberu 1:13, 14) Ior mba kpishi mba yange ve er msen ér Aôndo a wase ve vea kav Bibilo, maa fese je Mbashiada mba Yehova za ve inya yô. Bibilo tese ér mbatyomov kpa mba yôôn ‘loho u dedoo’ sha tar cii. (Ôr Mpase 14:6.) Heela tseegh ga, se mbagenev kpishi kpa shighe ngu u yange se er msen sha ma zayol shin mgbe ugen ve se zua a iwasen hen ma anmgbian u nomso shin u kwase u ken tiônnongo yô.—Anzaakaa 12:25; Yakobu 2:16.

Yehova una fatyô u nan se iwasen i se sen un ken msen la sha ikyev i anmgbianev asev mba ken tiônnongo

18. Ka sea er msen yô, Yehova a wase se sha icighan jijingi na kua Mkaanem nam ma i nger ken Bibilo la nena?

 18 Ka sea er msen yô, Yehova a wase se sha icighan jijingi na. U tesen ikyav yô, aluer se er msen ser Aôndo a wase se se wa ishima a ma zayol yô, una fatyô u nan se icighan jijingi na ér a hemen se shi a na se agee. (2 Mbakorinte 4:7) Shi ka sea er msen yô, Yehova a wase se sha Mkaanem nam ma i nger ken Bibilo la, sha er se er akaa a injaa yô. Shighe u se lu ôron Bibilo yô, se fatyô u zuan a avur a Bibilo a aa wase se yô. Shi Yehova una mgbegha orgen nana ôr kwagh u surun se ishima shighe u nan lu nan mlumun sha mpin ken mkombo yô, gayô ortamen u ken tiônnongo nana lam a vese sha ma ivur Bibilo.—Mbagalatia 6:1.

19. Ka nyi ia na ve alaghga se nenge ser Yehova ungwa msen wase ga

19 Nahan kpa, ashighe agen yô, alaghga se pine ser, ‘Er nan ve Yehova a ongo msen wam ga?’ Umbur wer, a fa kwagh u i doo u una er sha mbamsen asev yô, man shighe u i doo u una er kwagh shon la kpaa. Yehova fa akaa a kwagh a gbe se a mi la. Alaghga a gba u se za hemen u eren msen shighe a wa karen, sha u tesen ser se er msen la a ishima i môm, shi se na un jighjigh sha mimi. (Luka 11:5-10) Ashighe agen Yehova ka a ungwa msen wase sha gbenda u se ver ishima la ga. U tesen ikyav yô, alaghga se er msen sha ma mtaver u se tagher a mi yô, kpa una kar a mtaver la kera ga, una gema a na se agee a wan ishima a mtaver shon.—Ôr Mbafilipi 4:13.

20. Gba u se eren msen hen Yehova nduuluu sha ci u nyi?

20 Ian i se lu a mi i eren msen hen Yehova la ka i civirigh kpen kpen! Se fatyô u lun a vangertiôr ser Yehova una kegh ato a vese. (Pasalmi 145:18) Shi aluer se mba eren msen hen Yehova nduuluu yô, ijende yase vea na ia hemba taver ci.