Aver yem sha atineakaa

Aver yem sha mver u atineakaa

 MPIN U SHA 4

Shighe u M Er Kwagh u Shami Ga Yô, Me Sôr Nena?

Shighe u M Er Kwagh u Shami Ga Yô, Me Sôr Nena?

ER I HII VE MPIN NE A LU HANGE HANGE YÔ

Aluer u lumun ibo sha ma kwagh u u er shami ga yô, u hemba lun or u injaa, shi ior vea hemba nengen we a mimi iyol.

A LU WE NAHAN U ER NENA?

Hen sha kwagh ne: Tim ngu gbidyen bor vea azende na, maa a gbidye bor za ta sha ajingi a mato u orgen u a dondo ya vea ve yô.

A lu we nahan, u er nena?

HIDE HEN A ISHIMA!

GBA U U ER KWAGH MÔM KEN AKAA A ATAR NE:

  1. Yevese.

  2. Na orgen ibo.

  3. Ôr or la kwagh u u er la, shi kaa a nan wer u sôr kwagh u a vihi la.

Adooga a lu u pe tsuan kwagh u sha 1 la. Kpa atôakyaa nga a i doo u u lumun ibo yô, aluer ka ajingi a hembe shin ka ma kwagh ugen je kpaa.

 ATÔAKYAA ATAR A I DOO U U LUMUN IBO YÔ

  1. Ka a inja u eren nahan.

    Bibilo kaa ér: “Sar se u zenden tsembelee sha akaa cii.”—Mbaheberu 13:18.

  2. Ior mba hembe keghen iyol u den mba ve lumun ibo la kwaghbo ve.

    Bibilo kaa ér: “Or u nan cir akaabo a nan yô, nana zua a iveren ga, kpa u nan pase a, shi nan undu a yô, nana zua a mhôônom ma zungwen.”—Anzaakaa 28:13

  3. U hemban cii je yô, ka kwagh u doon Aôndo.

    Bibilo kaa ér: “Iferor ka kwagh u ndôhôr TER ishima je, kpa mzough Na yô, ngu a mbaperapera.”—Anzaakaa 3:32.

Karina, gumkwase ugen u lun anyom 20, yange yevese a kwaghhendan ngee gande, nahan i kôr un kimbi tikeeti, maa lu yeren ter na a mi. Kpa lu u una saa yeren un a mi gbem sha won ga. Karina kaa ér: “Inyom kar i môm yô, terem va nenge a tikeeti shon. Nahan kwagh ne nyôr a mo ken zayol u vesen kpishi!”

Ka nyi Karina a hen ken kwagh ne? A kaa ér: “Ka wea yer kwaghbo wou yô, kwagh ne a hemba vihin gban kera cii. Ka u va kimbi injar sha mi ken hemen!”

ER U HEN KWAGH KEN AKAA A U ER SHAMI GA LA YÔ

Bibilo kaa ér: “Se cii se mba nenge gbev sha akaa kpishi.” (Yakobu 3:2) Man er se nenge nahan, aluer u er kwagh shami ga man her ave ave je u lumun ibo yô, u ngu tesen wer u ngu or u hiden a iyol ijime shi u via ken jijingi.

Kwagh ugen u u er yô, ka u henen kwagh ken akaa a u er shami ga la. Gumkwase ugen mba yer un ér Vera, a kaa ér: “Ka mea er kwagh shami ga yô, m hen kwagh ker. Ka m zua a ityesen ker i ia wasem me hemba lun or u injaa yô. Shi ka m fa er kwagen me tagher a imba zayol la ve me er yô.” De se nenge er u fatyô u eren kwagh ne yô.

Aluer u tôô teru agugu man a za vihi a we nahan, u er nena?

  • U ôr teru ga sha ci u a fa ga yumuu?

  • U ôr teru kwagh u a ze iyol la jighlii?

  • U ôr teru kwagh u a er la, kpa u gema ibo u na orgenee?

Aluer u gba ikyaren sha ci u u ôr takerada tsembelee ga nahan, u er nena?

  • U kaa wer ikyaren la taver yumuu?

  • U ôr kwagh u u er shami ga ve u gbe ikyaren laa?

  • U kaa wer tica la wa kwagh ishima a wee?

Aluer u zer henen sha akaa a u er shami ga la gbem yô, ka inja er u ngu nahan mato, kpa u gema u yem kenger ken jingi i nengen ken ijime nahan

 Hide hen ase sha akaa a se er sha kwagh u teru man tica wou la. Tôô wer ka we u lu (1) ter la, shi u lu (2) tica la ye. Nahan aluer wanye wou nan lumun ibo sha kwagh u nan er shami ga la nahan, u nenge nan nena? Man aluer nan lumun ibo ga yô, u nenge nan nena?

Hen ase sha ma kwagh u yange u er shami ga ken inyom i i bee la yô, nahan na mlumun sha mbampin mba ve dondo ne.

Ka nyi yange u er shami ga? Yange u er nyi sha kwagh shono?

  • Yange m pase or ga.

  • Yange m na orgen ibo sha kwagh shon.

  • Yange m lumun ibo.

Aluer yange u er kwagh la man u lumun ibo ga yô, lu u nena?

  • Yange m er nahan m war je ga̱!

  • Ishima nam ibo, guda yange ma m ôr mimi.

Ka nyi u nenge wer hemba doon u yange ma u ere?

Ka nyi u hen ken kwagh u yange er u nee?

U NENGE NENA?

Er nan ior mbagen ka ve soo u lumun ibo sha kwagh u ve er ga?

Aluer hanma kwagh u u er shami ga cii ka u yer yô, ka nyi ior vea hen sha a wee? Kpa aluer u lumun ibo sha akaa a u er shami ga la yô, ka nyi vea hen sha a wee?—Luka 16:10.