Aver yem sha atineakaa

Aver yem sha mver u atineakaa

 MPIN U SHA 7

Aluer Mba Meen Mo Ér M Er Idya Nahan, Me Er Nena?

Aluer Mba Meen Mo Ér M Er Idya Nahan, Me Er Nena?

ER I HII VE MPIN NE A LU HANGE HANGE YÔ

Aluer u hii u yaven a or cii man u vôso nom shin kwase yô, u va tagher a mbamzeyol kpishi ken hemen.

A LU WE NAHAN U ER NENA?

Hen sha kwagh ne: Hita man Mike ve hii ishiôr kuma iwer ihiar tseegh, man ka Hita er un fa Mike ica i gba nahan. Hanma shighe ka ve tôô ahwa imôngo ve lam sha hanseeti shi ve tindin a ilyoho. Shi mô ve ka nan hii u ôron kwagh nan lu a kure ga je maa ugen la nan fa kwagh shon! Kpa hegen Mike soo ér vea lamen a lam tseegh ga.

Ken iwer i ihiar shon la, Mike a kôr Hita uwegh ve zenden, shi ve lu susen zwa kpuaa kpuaa di tsô; ve er kwagh hemba nahan ga. Sha ci u Hita soo ér vea lu kôôsôô i hemba nahan ga. Kpa a gema a soo ér Mike a undu un ga. Sha ci u ka Mike tseegh a we un ikyo shi a ne i saan un iyol ye. Shi ngu a kaan ken ishima ér, ‘Bee kera yô, Mike ka ishiôr yam .. . ’

Tôô wer u ngu Hita shi u kuma ishiôr, nahan u er nena?

HIDE HEN A ISHIMA!

Ka Aôndo a ne kwase man nom iyua i yaven a or la ye. Nahan aluer u ngu a vôso kwase shin nom ga tsô maa u hii u yaven a or yô, u vihi iyua la. Ka inja er u tôô ikyondo i dedoo i or nan ne u iyua a mi, u ngu ovur ihyundu a mi nahan.

Aluer u tsuwe sha kon wer u pulugh er ka annyon nahan yô, a vihi ato kpishi. Kape aluer u per ma tindi u sha kwagh u aeren a wang kpa a zua u ga je la; er tindi u a kaa ér, “nyagh nen idya” la nahan. —1 Mbatesalonika 4:3.

Ka akaa a vihin er nyi nahan or a per tindi la ve nana tagher a mini? Bibilo kaa ér: “Or u eren idya yô, ka iyol i nan je nan eren i kwaghbo ye.” (1 Mbakorinte 6:18) Ka mimii?

 Mbatôvon sha akaa kaa ér agumaior kpishi aa a er idya yô tagher a mzeyol môm ken mba i nger shin heen ne:

  • ISHIMA I NAN IBO. Mbayevikyaior kpishi mba yange ve yav a or shighe u ve lu a er ivese ga la kaa ér, yange ve hide ve vaa afanyô.

  • AKPERAN A TAN. Ka vea yaven a or cii yô, ve hide ve gba tan akperan ér, ‘A̱ shi nan kpa nan yav a orgen kpaa.’

  • AHENGE A VAN. Mbayevkasev ka ve hemba soon or u nana kura ve, nana hee ve a hee ga yô. Shi mbayevnomso kpishi ka ve kera soo kwagh u wanyekwase u nan lumun ér ve yav a nan la ga.

  • Jindikwagh: Aluer u hii u yaven a or shighe u u lu a vôso nom shin kwase ga la yô, u ta iyua i injaa igen kera, nahan u kera lu a icivir ga. (Mbaromanu 1:24) Iyol you ngi a inja kpishi, ka u gban nan kera dang nahan ga!

Nahan tese wer u ngu a tahav mbu eren kwagh u dedoo sha u ‘nyaghen idya.’ (1 Mbatesalonika 4:3) Yange u vôso kwase shin nom tsô u yav a nan. Shighe la u kera nyôr ken mbamzeyol kua ishimanyian man afanyô a vaan, a idya i eren i ve a mi la ga.—Anzaakaa 7:22, 23; 1 Mbakorinte 7:3.

 U NENGE NENA?

  • Aluer u doo or ishima sha mimi yô, nana er kwagh u nan we angev shin ishimavihinii?

  • Or u nan we kwagh wou ikyo sha mimi nana mee u ér u er kwagh u vihin mlu wou vea Aôndo?—Mbaheberu 13:4.