Aver yem sha atineakaa

Aver yem sha mver u atineakaa

 MPIN U SHA 2

Er Nan Ve Ishima Ka i Zam Iyol sha Kwagh u Mluashe Wama?

Er Nan Ve Ishima Ka i Zam Iyol sha Kwagh u Mluashe Wama?

ER I HII VE MPIN NE A LU HANGE HANGE YÔ

Akaa nga a a hembe lun a inja a mluashe wou u u nengen a mi ken jingi la yô.

A LU WE NAHAN U ER NENA?

Hen sha kwagh ne: Julia ka una kenger iyol na ken jingi yô, a nenge ér un kehe gande. Shin er azende a na kua mbamaren nav ka ve kaan a na ér ngu linga linga nahan kpa, un di ka a saa ôron ér, “gba u me pande undu.”

Semberee ne, Julia soo u eren iyol na ican tsung sha u una nôngo a pande undu kpuaa yô. A nenge ér saa una kera ya kwagh ga ayange kpuaa. . .

Aluer u ngu a zayol u Julia ne nahan, u er nena?

HIDE HEN A ISHIMA!

Mluashe wou una fatyô u lun er u nenge la ga. Ka inja er u ngu kenger iyol you ken jingi i i lu tenger a mi nahan

Aluer u wa ikyo sha mluashe wou kpa ka kwaghbo ga. Jighilii yô, Bibilo wuese mluashe u nomso man kasev kpishi, er Sara, Rahel, Abigail, Yosev, man Davidi nahan. Bibilo kaa ér kwase ugen u i yilan un ér Abishagi la lu kwase u “doon ashe tsung.”—1 Utor 1:4.

Agumaior agen ker gbenda u panden undu zan zan ve hingir u nan ayol a ve ican, nahan ve zua a zayol u i yer ér anorexia la, mba kera ye kwagh sha inja ga, man kwagh ne una fatyô u van or a ku je kpaa.

  • Kwagen la, i tôv mbayevkasev deri, nahan mba 58 nenge ér ve kehe undu gande, kpa jighilii yô, lu mbayevkasev 17 tseegh kehe undu gande ye.

  • Kwagen la di, i tôv kasev deri, nahan mba 45 mba yange ve kehe undu ga yô, nenge ér ve kehe undu je gande!

  • Agumaior agen ker gbenda u panden undu zan zan ve hingir u nan ayol a ve ican, nahan ve zua a zayol u i yer ér anorexia la, mba kera ye kwagh sha inja ga, man kwagh ne una fatyô u van or a ku je kpaa.

 Wea kav imba zayol ne ken iyol you yô, ker iwasen. Hii ôron ormaren wou shin organden u u ne nan jighjigh yô, ken iuv. Bibilo kaa ér: “Huror yô, lu a dooshima gbem, man shi i mar anmgbian sha ci u ayange a ican.”—Anzaakaa 17:17.

Kwagh U U Er Ve U Hemba Doon Ishima Yô!

Jighilii yô, ka inja i or ka i na ve nan doo ishima shin nan doo ga ye. Nenge ase kwagh u Abesalom, wan u Tor Davidi la. Bibilo kaa ér:

Ma or kuma iwuese er Abesalom nahan ga, sha kwagh u mdooashe na; . . . lu a ihyogholough iyol ga.”—2 Samuel 14:25.

Nahan kpa, gumor la gema wa igbongor kua ayom, shi lu or u hagher sha kwagh kpishi! Sha nahan yô, Bibilo ôr kwagh u Abesalom sha inja i yange lu or u doon ga; i̱ pon un ér yange lu bo or je, or na je kpa kunya kôron un u eren nan ifer ga, shi lu a ityoronishima i kôron or ihyom je wuan nan.

Bibilo wa se kwagh ka sha inja je, ér:

Haa [nen] orhe iyol.”—Mbakolose 3:10.

“Hwe wen a̱ de luun u ken won tsô ga, . . . Kpa i̱ lu or u ken myer u ken ishima la.”—1 Peteru 3:3, 4.

Aluer u ngu keren wer u doo ashe kpa ka kwaghbo ga, kpa fa wer kwagh gba sha injaor i u lu la hemba mluashe wou ica je! Ken masejime yô, aeren ou a doon tsung la aa na u hemba doon ior ishima, a lu sha ci u u ngu iyol agbende agbende shin u kumashe yum ga! Gumkwase ugen mba yer un ér Felicia, a kaa ér “Mba ngôôr nengen a mdoom ma sha iyol ga, kpa ka injaor i u lu kua aeren a dedoo a u lu a mi la ka a na ior ve hemba soon kwagh wou ye.”

TÔV SHA KWAGH U MLUASHE WOU

Ka wea kenger mluashe wou nahan ishima i za u iyolo?

U nenge wer doo u u shighe kwagh u nyian, shi u gema yan kwagh tsere tse tsere sha u u nôngo mluashe wou a doo?

Aluer u ngu a tahav mbu geman mluashe wou nahan, u gema nyi ken akaa nee? (Kpela ahwa sha akaa a u soo la.)

  • ITYAVEN

  • UNDU

  • ICE

  • GUYOLOUGH

  • ISHIGH

  • KWAVYOLOUGH

Aluer u na mlumun sha mbampin mbauhar mba hiihii mbara wer een, shi u kpela ahwa sha akaa atar shin hemba nahan, sha mpin u sha utar la yô, fa wer, alaghga tsô mbagenev mba nengen we bagenaa er we u nengen iyol you nahan la ga. U wa ikyo ga yô, fese je u hingir u eren iyol you ican, shi ishima a nyian we sha kwagh u mluashe wou je a gande.—1 Samuel 16:7.