Aver yem sha atineakaa

Aver yem sha mver u atineakaa

 ITYOUGH ITIAR

Akaa Ahar a Van a Ivese i Tsan

Akaa Ahar a Van a Ivese i Tsan

1, 2. (a) Yange i ver ivese er i̱ tsa i kuma shighe nena? (b) A er nan ve kwagh a lu nahana?

SHIGHE u Aôndo yange zua or man kwase u hiihii ken ivese la, ikyav yange i lu i tesen er mzough la una lu di anshighe kpeghee tsô ga. Yange lu u Adam man Ifa vea lu imôngo ken uma ve cii. (Genese 2:24) Mnenge u Aôndo sha ivese i lun a icivir yô ka mzough u nomsoor môm vea kwase môm la. Ka ijimba i eren sha apera i môm ken atô ve shin ve cii la tseegh i lu ityôkyaa i Icighanruamabera i̱ lumun er a fatyô u paven ivese shi hiden eren igen ye.—Mateu 5:32.

2 Iorov uhar vea fatyô u lun imôngo ken msaanyol gôgô shighe u zan hiinii je kpa? Een, man Bibilo tese akaa ahar, shin amakuli, a a wase u van a kwagh ne yô. Aluer nom man kwase ve yar tom a akaa ne yô, vea bugh hunda u nyôron ken msaanyol man averen kpishi. Akaa ne kanyi?

KWAGH U HIIHII

3. Ka anza a dooshima atar a nyi i doo u mba ve er ivese la vea lu a mi?

3 Kwagh u hiihii yô ka dooshima. Kwagh u a lu yô, Bibilo i tese er dooshima ngu atô kposo kposo. U môm ka mlu u biishii, u lun a ishoon sha orgen, imba dooshima u azende ka a lu a mi hen atô ve la. (Yohane 11:3) Ugen ka dooshima u ka a vese hen atô u ior mba hen tsombor la. (Mbaromanu 12:10) U sha utar ka dooshima u kôron ken ishima u nomsoor ka nan lu a mi sha kwase shi kwase kpaa nan lu a mi sha nomsoor la. (Anzaakaa  5:15-20) Ka mimi, mban cii ka u nom man kwase vea lu a mi sha ayolave. Kpa dooshima ugen u sha unyiin ngu, u a hembe lun a inja a mbagen mbara cii yô.

4. Inja dooshima i sha unyiin ka nyi?

4 Ken zwa u hiihii u Ruamabera u Mbakristu u ken zwa Grika la yô, ishemberti i inja dooshima i sha unyiin ne yô ka a·gaʹpe. I yar tom a ishemberti la ken 1 Yohane 4:8, hen ape i ôr se er: “Aôndo ka dooshima” la. Mimi je, “se mba a dooshima sha ci u se vande doon [Aôndo] ishima je.” (1 Yohane 4:19) Orkristu ka nan vande lun a imba dooshima ne sha Yehova Aôndo hiihii ve shi nan lu a mi sha ior kpaa ye. (Marku 12:29-31) Ishemberti i a·gaʹpe ne shi i yar tom a i̱ ken Mbaefese 5:2, heela i kaa er: “Zenden nen ken dooshima, er Kristu kpaa se doo Un  ishima man A na iyol Na sha ci wase nahan.” Yesu yange kaa er imba dooshima ne ia lu ikyav i a fa mbadondon nav mba mimi yô: “Ka sha kwagh ne man ior cii vea kav er ne lu mbahenen Av ye, aluer ne doo ayol a en [a·gaʹpe] yô.” (Yohane 13:35) Shi, kav kpaa, er i yar tom a a·gaʹpe ken 1 Mbakorinte 13:13 la: “Akaa ne nga lun her, ka jighjigh u nan man ishimaverenkeghen kua dooshima, nga atar je; kpa kwagh u hemban ken a yô, ka dooshima [a·gaʹpe].”

5, 6. (a) Er nan dooshima a hembe jighjigh u nan man ishimaverenkeghene? (b) Ka atôakaa agen a nyi aa na dooshima una wase ivese u tsana?

5 Kanyi i ne dooshima u a·gaʹpe ne a hembe jighjigh u nan man ishimaverenkeghene? A har sha atindi—atindi a vough—a ken Mkaanem ma Aôndo. (Pasalmi 119:105) Ka mtese u iko i wan sha u eren kwagh u vough man u shami a mbagenev sha mnenge u Aôndo, shin aluer u i er sha ci na la una kuma u zuan a mi shin una kuma ga kpaa. Imba dooshima la ka i wase akar a ken ivese u dondon kwaghwan u Bibilo ne: “Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la.” (Mbakolose 3:13) Noov man kasev mba lun a dooshima ka ve ‘doo ayolave sha gbashima je [a·gaʹpe] gadia dooshima cirin asorabo kpishi.’ (1 Peteru 4:8) Kav wer dooshima cirin mbamtsum. Been a bee ve ga, sha ci u ma or u yinan u nana ban a isholibo yô nan ngu ga.—Pasalmi 130:3, 4; Yakobu 3:2.

6 Zum u nom man kwase ve lu a imba dooshima la hen Aôndo man hen atô ve ken ivese yô, ivese ve ia tsa gbem man ia lu saan saan kpaa, sha ci u “dooshima been mayange ga.” (1 Mbakorinte 13:8) Dooshima ka “kwagh u maghen mlu u vough je la.” (Mbakolose 3:14) Aluer ú er ivese yô, ka nena we man u ú vese la ne fatyô u maan imba dooshima nee? Ôr nen Mkaanem ma Aôndo imôngo, shi ôron nen kwagh shami. Hen nen ikyav i Yesu i  dooshima la man nôngo nen u kaven un, u henen shi eren er un nahan. U seer yô, zaan nen mbamkombo mba Mbakristu, hen ape i tesen Mkaanem ma Aôndo la. Shi er nen msen Aôndo a̱ wase ne u maan imba dooshima u taven, u a lu ityamegh ki icighan jijingi u Aôndo la.—Anzaakaa 3:5, 6; Yohane 17:3; Mbagalatia 5:22; Mbaheberu 10:24, 25.

KWAGH U SHA UHAR

7. Iko i wan kanyi, man ka an i doo u nana tese iko i wan ken ivese?

7 Aluer iorov uhar mba ve vese ayolave mba a dooshima hen atô ve sha mimi yô, vea lu a iko i wan hen ayolave kpaa, man iko i wan ne ka kwagh u sha uhar u van a ivese i msaanyol je ne. I pase inja i iko i wan er ka “u wan iko sha mbagenev, u nan ve icivir.” Mkaanem ma Aôndo wa Mbakristu cii kwagh, kua noov man kasev kpaa er: “Hemen nen sha u nan ior icivir.” (Mbaromanu 12:10) Apostoli Peteru yange nger er: “Nahan ne nomso kpaa, lu nen a kasev enev imôngo sha kwaghfan, waan nen kasev iko er ve hembe yinan agee yô.” (1 Peteru 3:7) I wa kwase kwagh er nana “cia nom u nan.” (Mbaefese 5:33) Aluer ú soo u nan or icivir yô, ú eren erdoo a or la, ú luun a iko i wan sha icivir iyolough i nan man mkaanem ma nan kpaa, shi ú wa iyol u eren kwagh u nan sen sha inja er u̱ er cii.

8-10. Ka sha igbenda i nyi iko i wan ia na mzough u ken ivese una taver shi una lu saan saana?

8 Mba ve soo u ember ken ivese i msaanyol yô ka ve tese iko i wan hen mba ve vese la sha u ‘kera wan akaa ave ayolave iko tseegh ga, kpa ve wa iko sha akaa a [mba ve vese] la kpaa.’ (Mbafilipi 2:4) Mba nengen sha kwagh u una doo ve la tseegh ga—nahan la a lu bo u eren. Kpa, ka ve nenge kwagh u una hemba doon sha ci u or u ve vese la kpaa. Mimi je, ka ve hemba veren ishima sha kwagh u or u ve vese la.

 9 Iko i wan ia wase kwase man nom vea lumun mbamkposo mba ve lu ken mbamnenge vev la. Ka a inja u veren ishima er iorov uhar ve̱ lu a mnenge inja i môm sha hanma kwagh cii ga. Kwagh u una hemba gban kwagh hen nom la alaghga una gba kwagh hen kwase yum ga, man kwagh u kwase una soo la alaghga a lu kwagh u nom nan soo la ga. Kpa doo u hanma nana lu a iko i wan sha akaa a ugen nan tsough la kua mbamhen mba nan, aluer ve per atindi man akaawan a Yehova ga yô. (1 Peteru 2:16; kar Filemon 14.) U seer yô, hanma nana̱ wa iko sha icivir iyolough i ugen sha u kera geman nan hingir kwagh u lahan shin sen ga, a̱ lu ken won shin ken iuv kpaa.

10 Een, dooshima hen Aôndo kua hen atô ve man iko i wan ka akaa a vesen ahar a van a ivese i ia za a doo la. Ka nena a yar tom a á ken avegher agen a vesen ken uma u ken ivese?

ITYOUGH SHA INJA I KRISTU

11. Sha ierkwagh i Icighanruamabera yô, ka an nan lu ityough ken ivese?

11 Bibilo ôr se er yange i gba or a mbamlu mba vea na nan nana lu ityough hen tsombor sha gbenda u a za a doo yô. Sha nahan yô, Yehova una pine or la er nan nenge sha mkpeyol u ken jijingi man u sha iyol u kwase u nan man ônov yô. A gba u nana tsua kwagh u nana er la vough u tesen ishima i Yehova man u lun ikyav i tesen mciviraôndo kpaa. “Kasev, ungwan nen imo i noov enev er ka Ter nahan. Gadia nom ka ityough ki kwase di er Kristu kpaa A lu ityough ki nongo Na nahan.” (Mbaefese 5:22, 23) Nahan cii kpaa, Bibilo kaa er nom kpaa nan ngu a ityough, U nan lu aa tahav sha nan yô. Apostoli Paulu yange nger er: “Sarem ka fa nen, ityough ki hanma nomsoor yô, ka Kristu, man ityough ki kwase yô, gema ka nom, man ityough ki Kristu yô, ka Aôndo je.” (1 Mbakorinte 11:3) Nom u lun a kwaghfan ka nan hen u lun ityough sha u kaven ityough ki nan, Kristu Yesu.

12. Ka ikyav i dedoo i nyi Yesu yange ver sha m-ungwa u ungwan man sha u lun ityougho?

 12 Yesu kpa ngu a ityough, ka Yehova, man a na iyol na sha ikev Na sha gbenda u vough. Yesu yange kaa er: “M keren u eren ishima Yam ga, kpa ka ishima i Un u A tindim la.” (Yohane 5:30) Nenge ikyav i dedoo sha wono! Yesu ka “Waniunda ken akaa a i gbe a cii.” (Mbakolose 1:15) Yange hingir Mesiya. Lu u una lu Ityough ki tiônnongo u Mbakristu mba i shigh ve mkurem la shi una lu Tor u i tsough u Tartor u Aôndo la, una hemba mbatyomov cii. (Mbafilipi 2:9-11; Mbaheberu 1:4) Shin er lu sha zege ian la shi lu u una va lu zege or ken hemen yum nahan kpaa, Yesu lu or u wan tswam ga, hanger kwagh kpaa ga, shin sendegh ngeghree kpaa je ga. Yange wa apera ga, umbur mbahenen nav hanma shighe er gba u vea ungwa imo na ga. Yesu yange lu a dooshima man mhôônom ma zungwen, hemban je yô hen mbaatsanev. Yange kaa er: “Va nen her a Mo, ne mba i ver ne iyol cii, ikav mbi yoho ne kpaa, Mo Me na ne mmem. Tôô nen igbur Yam sha ayol a en, va hen nen kwagh sha ikev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en; gadia igbur Yam leghem man ikav Yav kpaa peese.” (Mateu 11:28-30) Yange lu kwagh u iemberegh u lun vea na.

13, 14. Ka nena nom u lun a dooshima nana lu ityough, sha u kaven Yesu?

13 Nom u i sar nan u lun a uma u msaanyol hen tsombor yô doo u nana time sha aeren a dedoo a Yesu ne. Nom u dedoo nan lun apera apera shin nan lun inja geng ga, nan yaren tom aa tahav mbu nan lu a mi sha u lun ityough la er ka igbur i nana gbidyen kwase u nan a mi ga. Kpa, ka nan lu a dooshima sha nan shi nan naan nan icivir kpaa. Aluer Yesu yange una lu “ishima legh legh” yô, hemba doon u nom nana lu nahan cii sha ci u, kposo a Yesu yô, nan eren akaa ka ze kpe. Zum u nan er yô, nana soo er kwase u nan a̱ kav. Sha ci ne yô, nom u hiden  a iyol jime nana lumun ibo i nan, shin er mkaanem ma, “Yam anyi; shen ú er vough” la, alaghga maa lu ican u ôron nahan kpaa. A hemba lun kwase heghema u civir hemen u nom u nan eren kwagh akuma akuma nan hidi a iyol jime yô a u dondon hemen u u nan we imanger shi nan taver ityough yô. Ken vegher u nan di yô, kwase u tesen icivir i nan la kpaa nana zamber zum u nan er kwagh shami ga yô.

14 Aôndo yange gba kwase a aeren a injaa a nana fatyô u yaren tom a mi sha u seer msaanyol ken ivese yô. Nom u lun a mkav nana kav kwagh ne nahan nana kighir nan ga. Kasev kpishi ka ve hemba lun a mhôônom ma zungwen shi kwagh hembe kôron ve ken ishima, anza a i doo u aa lu sha u wan iko sha tsombor man u sôron mbamlu hen atô u ior la. Ashighe kpishi, kwase ka nan hemba fan u eren a ya sha u a̱ lu ijiir i a kpe iyol u lun yô. “Kwase u injaa” u i pase kwagh na ken Anzaakaa ityough 31 la yange lu a aeren a doon kpishi kua ityomavee i dedoo kpaa, man tsombor na yange u zua a mtsera kpishi ken á kpaa. Sha ci u nyi? Sha ci u ishima i nom na “ka i suur sha” a na.—Anzaakaa 31:10, 11.

15. Ka nena nom nana tese dooshima man iko i wan sha inja i Kristu sha kwase u nana?

15 Ken aeren a ior mbagenev yô, ka i kehe aa tahav mbu nom i za kar ikyaa inya, je yô u pinen a pine nan kwagh tsô kpaa i tôô er ka ilyahan. Alaghga nana eren a kwase u nan je er ka kpan yô. Imba hemen u shami ga la ka u va a mlu u vihin tsung i lu hen or la vea kwase u nan tseegh ga kpaa i lu hen atô u nan vea Aôndo kpaa. (Kar 1 Yohane 4:20, 21.) Sha gbenda ugen yô, noov mbagenev ka ve kera na hemen ga, ve de er kasev vev ve̱ kar ve̱ hemen ya. Nom u nan ne iyol i nan vough sha ikev i Kristu yô nan bum kwase u nan shin nan bunden icivir i nan kpaa ga. Kpa, ka nan gema nan dondo ikyav i dooshima u Yesu u nan iyol na la shi nan er vough er Paulu yange wa kwagh nahan: “Ne noov, kasev enev ve̱  doo ne asema di er Kristu kpaa, nongo Na u doo Un ishima man A ne iyol Na sha ci u u nahan.” (Mbaefese 5:25) Mbadondon mba Kristu Yesu yange ve doo un ishima je a kpe sha ci ve. Nom u dedoo nana nôngo sha u kaven imba ieren i tangen iyol ga la, nana keren mkpeyol u kwase u nan, a u den torough a nan ityô ngeghree la. Zum u nom nan we iyol i nan sha ikyev i Kristu shi nan tese dooshima man icivir i nan sha inja i Kristu yô, kwagh la una sagher kwase u nan kpaa ken ishima u ungwan nan.—Mbaefese 5:28, 29, 33.

KWASE U UNGWAN KWAGH

16. Ka nyi inja i doo u kwase nana tese hen nom u nana?

16 Yange mba gbe Adam shighe karen kpeghee yô, “TER Aôndo gema kaa er: Doo u or nana lu tswen ga; yô, Me er nan orwasen u lun er nan nahan.” (Genese 2:18) Aôndo yange gba Ifa er a̱ lu “orwasen,” lu u a̱ lu or gban gesa ga. Yange lu u ivese ia lu inja er tso u lun a mba kôôm uhar mba gban gesa ayolave nahan ga. Yange lu u nom nana naan hemen sha dooshima, man kwase di lu u nana tese dooshima, icivir, man m-ongo u ungwan kwagh sha gbashima kpaa.

17, 18. Ka sha nyi igbenda igen kwase nana fatyô u lun orwasen u mimi hen nom u nana?

17 Nahan cii kpaa, kwase u dedoo ka nan er kwagh i hemba m-ungwa u ungwan nom la. Ka nan nôngo sha u nana lu orwasen jim yô, nan suen nom u nan ken akaa a nom la a tsough u eren la. Ka mimi, kwagh la una hemba lun nan heghema zum u nan lumun a akaa a nom a tsough la. Kpa shighe u nan lumun a mi ga je kpaa, ishuen i nan taveraa la ia wase u van a mkur u dedoo u kwagh la.

18 Kwase nana fatyô u wasen nom u nan sha u nana lu ityough ki injaa sha igbenda igenegh kpaa. Nana fatyô u tesen iwuese sha iniôngon i nan lu nôngon sha u nan hemen la, a u geman wan nan asôngo shin tesen nan er  mayange nana fatyô u eren sha ishima i nan ga la. Sha u eren a nom u nan sha gbenda u maan a maa la yô, nana umbur er “ishima i legh legh man u lun ving la; ka kwagh u hemban sha mnenge u Aôndo je,” ka hen ashe a nom u nan tseegh ga. (1 Peteru 3:3, 4; Mbakolose 3:12) Aluer nom la ka or u nan jighjigh ga di ye? Aluer nan na jighjigh shin nan na ga kpaa, Icighanruamabera na kasev ishimataver er “noov vev ve̱ doo ve asema kua shi ônov vev kpaa, ve̱ lu tsev tsev, ve̱ lu wang, ve̱ sôron uya vev, ve̱ eren dedoo, ve̱ ungwan imo i noov vev, sha u i̱ de lamen sha kwaghôron u Aôndo dang ga yô.” (Titu 2:4, 5) Aluer akaa a benden sha imoshima va yô, nom u nan ne jighjigh ga la nana hemba tesen icivir i nan sha mtile u kwase u nan la aluer nan ôr kwagh shon sha “ishima i legh legh man sha mcie kpaa” yô. Noov mbagenev mba ve lu mba nan jighjigh ga yô i “urugh ve sha mlu u kasev vev la, á kera lu sha kwaghôron kpee ga, er ve nengen mlu [ve] u wang u cian Aôndo la yô.”—1 Peteru 3:1, 2, 15; 1 Mbakorinte 7:13-16.

19. Man aluer nom kaa er kwase u nan a̱ per tindi u Aôndo di ye?

19 Aluer nom kaa er kwase u nan a̱ er kwagh u Aôndo a vende di ye? Aluer kwagh er nahan yô, nana umbur er ka Aôndo a lu Orhemen u nan uhemban cii ye. Nana nenge ikyav ken kwagh u mbaapostoli yange ve er zum u mbahemenev mbatarev kaa er ve̱ per tindi u Aôndo la. Aerenakaa 5:29 pase er: “Peteru man mbaapostoli mbagenev gema kaa er: Ka u sé hemba ungwan imo i Aôndo keng a imo i ior.”

KWAGHÔRON U DEDOO

20. Ka sha nyi kwagh i vesen dooshima man iko i wan ve lu hange hange?

20 Dooshima man iko i wan mba hange hange ken ian igenegh ken ivese kpaa—kwaghôron. Nom u lun a dooshima la nana lamen vea kwase u nan sha ityom i nan, mbamzeiyol mba nan, mbamnenge mba nan sha akaa  kposo kposo. Sar nan u i̱ er kwagh ne. Nom u ka nan tôô shighe u lamen a kwase u nan shi mimi je ka nan kegh ato sha u ungwan kwagh u nana lu a mi u ôron yô nan ngu tesen nan dooshima man iko i wan. (Yakobu 1:19) Kasev mbagenev ka ve vaa iyol er noov vev ka ve tôô anshighe kpeghee tseegh u lamen a ve. Kwagh la vihi tsô. Ka mimi, sha ashighe a tom u ngee yum ne, alaghga noov kpishi a gba u vea eren tom ken won shighe gôgônan, shi alaghga mtaver u akaa una na kwase kpa nana lu eren tom buter. Kpa gba u mba ve vese ayolave la vea ver ian i vea lu imôngo yô. Aluer ve er nahan ga yô, alaghga vea hingir u lun kposo kposo. Kwagh ne una fatyô u van a mbamzeiyol mba vesen aluer hingir kpee u vea ker tem-imôngo ken won u ivese yô.

21. Ka nena iliam i injaa ia wase u nan msaanyol hen ivese?

21 Gbenda u kasev man noov ve lamen la ka kwagh u vesen. “Akaaôron a doon . . . a nyoho ken uma, ka mkpeyol ken akuhe.” (Anzaakaa 16:24) Aluer or u ú vese la ka or u nan jighjigh shin ka or u nan jighjigh ga kpaa, kwaghwan u Bibilo la ngu vough: “Kwaghôron wen a̱ luun u doon gbem, u i we bar sha mi yô,” inja na yô, a̱ nyoho. (Mbakolose 4:6) Zum u sev mbu vihi or man nan hidi yô, mkaanem kpeghee, ma sha mhôôn hen ikyar i ken ivese la maa kundu iyol tsô. “Kwaghôron u sha shighe vough yô, ngu er atam a ikon a zenaria a i we a shin agbande a azurfa nahan.” (Anzaakaa 25:11) Ikyenge i iliam la man asember a i tsough sha u ôron kwagh la ka kwagh u vesen tsung. U tesen ikyav yô, or nana fatyô u ôron, sha ishimavihin, sha nom-or er: “Wuhe hunda la!” Kpa mkaanem ma “i we bar sha mi yô,” a ôr ma sha ikyenge i gban shimi kurkur, i sha mkav, “Wea lumun yô, ma ú shi wuhe hunda la ga?”

22. Ka aeren a nyi i doo u mba ken ivese vea lu a mi sha u lun a kwaghôron u dedolo?

22 Kwaghôron u dedoo ka a ngee wuee zum u ka a̱ ôron kwagh sha bem, a̱ keren ashe shi a̱ tesen dooshima, sar  sar, mkav, man ieren i sha ue yô. Sha u nôngon kpogholoo u lun a kwaghôron u dedoo yô, kwase man nom vea fatyô u ôron akaa a a gbe ve la ken igbar, shi vea fatyô u nan msurshima man iwasen hen atô ve zum u mô ve nan lu ken ican yô. “Taver nen mba ve yen ishima la asema,” kape Mkaanem ma Aôndo ma we kwagh la. (1 Mbatesalonika 5:14) Ashighe agenegh nom nana ule shin kwase nana ule. Vea fatyô u ‘nan ishima taver,’ maan ayolave.—Mbaromanu 15:2.

23, 24. Ka nena dooshima man iko i wan vea wase zum u anyiman a ve yôô? Tese ikyav.

23 Akar a ken ivese a a lu a dooshima man icivir i nan hen atô ve yô vea nenge er hanma anyiman ka zege mzeiyol ga. Vea nôngo taveraa sha u vea ‘yuwe’ or ve ga yô. (Mbakolose 3:19) Doo u ve uhar cii vea umbur er “imo i legh legh ngi bundu ishima i nyoon.” (Anzaakaa 15:1) Wa iko sha er ú pande shin ú laha or wou u nan ôr ishima i nan ken igbar la ibo ga yô. Kpa, tôô wer imba kwaghôron la ka ian i ú fatyô u zuan a mkav sha mnenge u nan seer yô. Zua nen imôngo, nôngo nen u sôron mbamkposo enev man ar nen sha mkur u vough.

24 Umbur ihongo i Sara yange wa nom na Aberaham kwagh sha mzeiyol ugen, kpa kwagh la zua sha mhen na ga la. Nahan kpa, Aôndo kaa a Aberaham er: “Ungwa imo na.” (Genese 21:9-12) Aberaham yange ungwa, nahan a zua a iveren. Sha gbenda shon môm, aluer kwase nan due a mhen kposo a kwagh u a lu nom ken ishima kpa, abunde kera kera kpaa nana̱ kegh ato. Nahan kpaa, kwase nana de karen ngohol kwaghôron ga kpa nana kegh ato sha kwagh u nom u nan a lu a mi u ôron la. (Anzaakaa 25:24) U nom shin kwase norom sha u ma i er sha ishima i nan hanma shighe la a lu m-ban u dooshima shi a lu ilyahan kpaa.

25. Ka nena kwaghôron u dedoo una seer van a msaanyol ken akaa a biishi biishi a ken ivese laa?

25 Kwaghôron u dedoo ngu hange hange ken myav u  nom a kwase la kpaa. Kangegh man m-ban u iyol kôron tsaha vea fatyô u vihin mlu u biishii u ken ivese ne. Kwaghôron u ken igbar, kua ishima i wan, ka kwagh u hange hange. Zum u hanma nan ker mkpeyol u ugen yô, myav u nom a kwase la ka a lu mzeiyol ga cii. Sha kwagh ne kua akaa a genegh kpaa, “ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.”—1 Mbakorinte 7:3-5; 10:24.

26. Shin er i lu kpee u hanma ivese ia lu a ashighe a doon man a vihin nahan kpaa, ka nena u ungwan Mkaanem ma Aôndo la una wase mba ken ivese u zuan a msaanyolo?

26 Nenge Mkaanem ma Aôndo ma ne kwaghwan u dedoo sha wono! Ka mimi, hanma ivese ia lu a akaa a doon man a vihin. Kpa zum u mba ken ivese ve ne iyol ve sha mhen u Yehova, er i pase ken Bibilo nahan, shi mlu ve a har sha dooshima u sha tindi la man icivir i nan yô, vea fatyô u lun a jighjigh u nan er ivese ve ia lu i tsan shi ia lu a msaanyol kpaa. Nahan vea kera civir ayolave tseegh ga kpaa shi vea civir Orveren u ivese, Yehova Aôndo kpaa.