Aver yem sha atineakaa

Aver yem sha mver u atineakaa

 ITYOUGH 19

“Kwaghfan u Aôndo, ka Kwaghmyer”

“Kwaghfan u Aôndo, ka Kwaghmyer”

1, 2. Ka “kwaghmyer” u nyi i doo u kwagh a gba se a mini, man ka sha ci u nyi?

AKAAMYER! Er kwaghmyer ka a girim ior iyol u fan shi a doo ve, shi ashighe agen a kpilighyol kpaa yô, ka i taver uumace u cirin uwegh sha kwagh ér a̱ lu myer. Kpa, Bibilo gema kaa er: “Icivir i Aôndo yô, ka u cirin kwagh.” (Anzaakaa 25:2) Er Yehova a lu Orhemen Uhemban, shi i lu un a gbe akaa cii kpaa yô, nahan ngu a ian i yeren orumace a akaa agen zan zan saa shighe a kuma ve una mase pasen a ye.

2 Nahan cii kpa, kwaghmyer u kpilighyol ugen ngu u Yehova a pase ken Mkaanem nam yô. Mba yer kwagh shon ér “kwaghmyer u awashima” u Aôndo. (Mbaefese 1:9) Aluer u hen u fa kwaghmyer shon ne yô, a doo u a doo tseegh tsô ga. Una va u a myom, shi una pande a ta u iwanger sha kwaghfan u Yehova, u a ngee i gande u tôvon la kpaa.

I Pase Kwaghmyer Ne Tegh Tegh

3, 4. Kwaghôron u profeti u í nger ken Genese 3:15 la yange na orumace ishimaverenkeghen nena, man lu “kwaghmyer” u nyi yer lu kere?

3 Shighe u Adam man Ifa ve er isholibo la, lu inja er awashima u Yehova lu a mi ér tar jimin cii u lu paradiso, uumace mba lun vough ve lu sha u la vihi saa ishe kuaa je yô. Kpa, fese je maa Aôndo gba mi eren kwagh sha u sôron mvihi la. A kaa ér: “Me ver ihom hen atô wou [we iyô] vea kwase, man hen atô u vor wou a vor na kpaa, u ua cagh u ityough, we di kpaa ú cagh u ikishinguhar.”—Genese 3:15.

4 Mkaanem man lu kwaghôron u sha ikyav u a taver u kaven kpishi yô. Kwase ne lu ana? Man iyô la di yô, lu ana? Gema “vor” shon u ua cagh iyô ityough la di yô, lu ana? Adam man Ifa kav kwagh ne ga. Nahan kpa, mkaanem ma Aôndo man ma na ishimaverenkeghen hen nyityô or u ior  mba banen a jighjigh u nan mban vea mar cii. Kwagh ne tese ér perapera una hemba kpee. Awashima u Yehova una kure keng a bunde ga. Kpa kwagh ne una er nena? Lu pe kwagh ta icur gbang, lu myer her je ne! Bibilo kaa sha kwagh ne ér “kwaghfan u Aôndo, ka kwaghmyer u i yer un” yô.—1 Mbakorinte 2:7.

5. Tese ikyav er i hii ve ngise Yehova lu pasen kwaghmyer na tegh tegh yô.

5 Er Yehova “A pasen akaamyer” yô, lu u ken hemen una ta iwanger sha u pasen er kwaghmyer ne una za a kure yô. (Daniel 2:28) Kpa, una lu tan iwanger ne tegh tegh, sha adondo adondo kpaa. U tesen ikyav yô, hen sha gbenda u wanye u nan doo ter u nan ishima tsung nana̱ pine ter u nan ér, “Baba, yange í er nan jim ve i mareme?” ve, ter la una pase nan yô. Ter u lun a kwaghfan nana pase wanye u kiriki la kwagh u nana kôr cio u kaven hen shighe la tseegh. Kpa wanye la nana nguren vesen yô, ter u nan una gba tan nan iwanger sha mpin la seer. Kape Yehova kpa ka a de zan zan shighe a kuma u ior nav vea kav ishima na man awashima na cii ve, a mase pasen ve je la.—Anzaakaa 4:18; Daniel 12:4.

6. (a) Mba ye ikyuryan a or sha ci u nyi? (b) Mye u Yehova ya ikyuryan a uumace kwa imôngo la ka kwagh u doon tsung nena?

6 Yehova lu pasen akaa ne nena? A pase akaa ne kpishi sha uikyurmbayan mba a lu yan a ior nav la. Alaghga we kpa ú vande tseghan zwa a or sha ma kwagh—alaghga ú gba injô hen or shin ú na or injô. Imba iceghzwa la ka kwagh u sha tindi u tesen ér ne lumun u eren kwagh sha iceghzwa yen la. Kpa, ka sha ci u nyi ve Yehova lu yan ikyur a uumace? Mkaanem nam tseegh yô ma kuma u tesen ér una kure uityendezwa nav ga shinii? Sha mimi yô kape í lu je la, kpa erdoo u Aôndo na yô shi a kighir uikyurmbayan kpa sha mkaanem nam acin imôngo je. Uikyurmbayan mba í kange gban gban mban ve na se uumace mba se yen ne se hemba mban a vangertiôr sha uityendezwa mba Yehova cii.—Mbaheberu 6:16-18.

 Ikyuryan vea Aberaham

7, 8. (a) Ka ikyuryan i nyi yange Yehova ya a Aberahama, man kwagh ne seer tan iwanger sha kwaghmyer la nena? (b) Yehova yange pase ape Vor la ua due jighilii la tegh tegh inja nena?

7 Yange mba zende orumace ken Paradiso kera anyom nga kar ka hembe dubu uhar yô, Yehova kaa a wanakiriki na u jighjigh Aberaham ér: “Me ver u doo doo, Me seer tsombor wou iyenge er asan a Sha . . . nahan, akuraior a sha won cii aa zua a iveren ken tsombor wou, sha ci u, u we imo Yam iko yô.” (Genese 22:17, 18) Kwagh ne hemba ityendezwa inya; Yehova ôr kwagh ne u tesen ér un ya ikyur a na, shi a seer ibumun sha mi kpaa. (Genese 17:1, 2; Mbaheberu 6:13-15) Kwagh ne doo kpishi, gadia Tor u Hembancii bum wener una ver orumace doo doo!

“Me . . . seer tsombor wou iyenge er asan a Sha nahan.”

8 Ikyuryan i Aôndo ya a Aberaham la i̱ tese ér a lu oruma nana lu Vor shon u i tende zwa a mi la ye, gadia ua due ken tsombor u Aberaham. Kpa a lu an jimi? Shighe kar yô, Yehova pase ér ken ônov mba Aberaham cii, á lu Isaka una lu tertamen u Vor la ye. Ken ônov mba Isaka mba uhar la di, lu Yakob í tsua ye. (Genese 21:12; 28:13, 14) Ken masejime yô, Yakob ôr mkaanem ma profeti man sha wan na ugen ken atô u ônov nav mba ve lu 12 mbara. A kaa ér: “Tôgh kua kar hen Yuda kera ga, gbough ku ortaregh kpaa kua kar hen atô u angahar a na kera ga, zan zan Un u ku lu ku Nagh la, Una va; ka Un akuraior aa ungwan imo Na ye.” (Genese 49:10) Lu hen shighe ne i mase fan ér Vor la a lu tor, shi una due ken tsombor u Yuda kpaa ye!

Ikyuryan vea Iserael

9, 10. (a) Lu ikyuryan i̱ nyi Yehova ya a ikyurior i Iseraele, man ikyuryan shon i̱ kura ve nena? (b) Ngise Tindi u Mose la tese ér kwagh gba orumace sha ipaan nena?

9 Ken inyom i 1513 cii shighe u Yesu la, Yehova er kwagh ugen u shi bugh ian i una seer pasen kwaghmyer la yô. A ya ikyur a Iserael, ikyurior i due ken Aberaham la. Er hegen se kera lu sha ikyev i Tindi u Mose ga nahan kpa, ikyuryan i ngise Yehova ya  sha Tindi shon u a na la lu kwagh u hange hange sha mve u Vor u i tende zwa la. Inja nena? Nenge ase igbenda i itiar ne. Hiihii yô, Tindi la lu inja er ka kpekpe u kuran ior nav nahan. (Mbaefese 2:14) Lu atindi a perapera a í na Mbayuda pav ve ver kposo a Atôatyev ye. Nahan Tindi wase u kuran tsombor u Vor u i tende zwa ua due ker la zan zan. Ka mkor ne kpa na ve, ikyurior la i̱ lu her zan zan shighe u Aôndo ver ér Mesiya a va la kar kuman, maa í mar Mesiya ken ipaven i Yuda ye.

10 Sha uhar yô, Tindi la tese gbar gbar ér kwagh gba uumace a ipaan. Er Tindi la lu a mshi shio yô, a pon igbekera i uumace mba lun a isholibo wanger wanger, gadia ior lu peren tindi shon, ve fatyô u kuran un vindi vindi ga. Nahan, lu “sha ci u mbamper mba i per tindi la man i seer a ye, zan zan vor u i tende zwa sha mi la ua kar van.” (Mbagalatia 3:19) Iniav mbi nanden mbi Tindi tese ér i̱ naan sha uzendenya la mbi hila wamen asorabo. Kpa, er Paulu nger nahan, “awambe a anomabua man ivo aa fatyô u tôôn asorabo kera je ga,” nahan iniav mbin mbi lu di a lu ikyav i tesen nagh ku ipaan ku lu u Kristu una va na la tsô. (Mbaheberu 10:1-4) Nahan hen Mbayuda mbajighjigh yô, ikyuryan i sha tindi la hingir ‘orkuran u zan a ve ken Kristu.’—Mbagalatia 3:24.

11. Ka ian i civirigh i nyi ngise ikyuryan i sha Tindi la i̱ na Mbaiseraele, kpa er nan ve ian ne kar ikyurior la jimin ciilii?

11 Sha utar yô, ikyuryan la i na ikyurior i Iserael ishimaveren i doon kpishi. Yehova kaa a ve ér aluer ve kura ikyuryan la yô, vea hingir “tartor u upristi kua icighanikurior” kpaa. (Ekesodu 19:5, 6) Ken masejime yô lu ken atô u Mbaiserael mba sha marami la í hii zuan a mba lu u vea za lu upristi sha tartor u sha la ye. Nahan kpa, kohol cii yô, Mbaiserael hemba ato, ve er sha ikyuryan i sha Tindi i̱ í ya a ve la ga, shi ve venda Mesiya shon u lu Vor la kpaa, nahan ian i hingir tartor u upristi la kar ve. Nahan gema lu unô ior ve mase kohol hingir tartor shon u upristi laa? Man ikyurior shon i í ver i doo doo ne i̱ zua sha Vor u i tende-zwa a mi la nena? Yange í pase asember angan a kwaghmyer ne ga, zan zan shighe u Aôndo ver la kar kuman.

 Ikyuryan i Tartor u Davidi

12. Kanyi ikyuryan Yehova ya a Davidii, man kwagh la seer tan iwanger sha kwaghmyer u Aôndo nena?

12 Ken derianyom u sha 11 C.S.W. la, Yehova seer tan iwanger sha kwaghmyer ne zum u a shi a ya ikyur igen yô. A er ityendezwa a Davidi Tor u perapera er: “Me ver wan wou ken ijime you . . . Me taver tor na. . . . Mo kpaa Me ver ikônough nagh ki torough kia lu gbem.” (2 Samuel 7:12, 13; Pasalmi 89:3) Nahan mkaanem man pase jighilii ér á lu ken tsombor u Davidi Vor u i tende zwa la ua va ye. Kpa orumace u kaka nahan nana er nan ve nana hemen “gbem” sha wono? (Pasalmi 89:20, 29, 34-36) Man or shon u nana lu tor la nana fatyô u yiman uumace cii sha ikyev i isholibo man ku kpa?

13, 14. (a) Sha kwagh u i nger ken Pasalmi 110 yô, Yehova er ityendezwa a Tor na u un ver la kaa ér nyi? (b) Yehova seer tan iwanger sha kwagh u Vor u ua va la sha ikyev i uprofeti nav nena?

13 Jijingi u Aôndo mgbegha Davidi nger kwagh er: “TER kaa a Terem er: Temam ken uwegh ku yanegh, zan zan Me gema mbaihomov Ou vea hingir We kwagh u pendan angahar sha mi. TER bum Una kera vaa afanyô ga: We U ngu pristi u tsôron gbem sha won sha inja i mlu u tom u Melkisedeki la.” (Pasalmi 110:1, 4) Mkaanem ma Davidi ne ma kôr sha Mesiya, Vor u i tende zwa u van a mi la jighilii. (Aerenakaa 2:35, 36) Tor ne una hemen, kpa á lu ken Yerusalem ga, á lu shaala, “ken uwegh ku yanegh” ku Yehova. Nahan una lu aa tahav sha tar cii, a kera lu sha tar u Iserael tseegh ga. (Pasalmi 2:6-8) Heen kpa shi í seer pasen kwagh ugen. Ver ishima wer Yehova er iceghzwa je shi bum kighir sha mi, er Mesiya ne una lu “pristi . . . sha inja i mlu u tom u Melkisedeki.” Di er ngise Melkisedeki lu tor, shi lu pristi kpa kighir sha mi sha ayange a Aberaham la nahan, kape Vor shon u ú lu van la kpa a lu Aôndo iyol na una ver ú Tor kua Pristi kpaa je la!—Genese 14:17-20.

14 Yehova shi seer tan iwanger anyom anyom sha kwaghmyer shon sha ikyev i uprofeti nav. U tesen ikyav yô, Yesaia pase ér ku ú Vor la ua lu nagh ku i ne sha u paan u uumace yô. (Yesaia 53:3-12) Mika di tsengapasen ijiir i a mar Mesiaya yô. (Mika  5:2) Daniel je yô pase shighe u Vor la ua ande man shighe u ua kpe kpaa jighilii.—Daniel 9:24-27.

I Pase Kwaghmyer la Ve!

15, 16. (a) Yange er nan ve hingir u ‘kwase nana mar’ Wan u Yehova? (b) Ka dyako u nyi Yesu ya hen mbamaren nava, man lu hanma shighe Vor u i tende zwa shon va?

15 Er a hii ve akaaôron a profeti ne aa kure jighilii la yô, lu kwaghmyer her, zan zan Vor la kar anden. I kaa ken Mbagalatia 4:4 er: “Er shighe va kuma vough yô, Aôndo tindi Wan Na, kwase va mar Un.” Ken inyom i 2 cii shighe u Yesu la, ortyom u sha ôr kwagh a Maria iniunkwase i ken Mbayuda, er: “Nenge, ú va wa iyav, ú mar wan u nomso, ú ii Un iti wer Yesu. Un, Una lu Zegeor, á yilan Un er Wan u Uhembansha; Ter Aôndo kpaa Una na Un ikônough ki torough ki Ter Na Davidi. . . . Icighan Jijingi Una sen sha a we, man agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye.”—Luka 1:31, 32, 35.

16 Ken masejime yô, Yehova mough a uma u Wan na shaala, kar va wa ken iyav mbu Maria, nahan kwase hingir u maren un. Maria yina, lu a isholibo iyol. Kpa, Yesu ya dyako u myen na la ga, gadia un lu “Wan u Aôndo” je. Kpa, mbamaren mba Yesu due ken tsombor u Davidi, nahan kwagh ne na yô lu a ian i yan dyako u Davidi sha marami kua sha tindi kpaa. (Aerenakaa 13:22, 23) Yange mba eren Yesu batisema ken inyom i 29 la kera yô, Yehova na un icighan jijingi na, shi kaa er: “Ngun ka Wan Wam u ishima ishima” je ne. (Mateu 3:16, 17) Vor shon u í lu veren ashe a ú la ú va ve! (Mbagalatia 3:16) Hen shighe ne shighe kuma u a seer pasen kwaghmyer la.—2 Timoteu 1:10.

17. Yange shi í va ta iwanger sha kwagh u i nger ken Genese 3:15 la nena?

17 Shighe u Yesu lu shin tar lu pasen kwaghaôndo la, a pase ér iyô shon i̱ í er kwagh u i̱ ken Genese 3:15 la ka Satan, shi vor u iyô shon la di gema ka mbadondon mba Satan. (Mateu 23:33; Yohane 8:44) Ken masejime yô, í mase va pasen er á cagh iyô shon kua vor u i̱ kpaa gbem sha won yô. (Mpase  20:1-3, 10, 15) Shi i va pase kpaa ér kwase la ka “Yerusalem u Sha,” inja na yô ka nongo u Yehova u sha, u ior mba ken jijingi la, nongo shon u ú lu sha inja i kwase ya la. *Mbagalatia 4:26; Mpase 12:1-6.

Ikyuryan i He

18. Awashima u “ikuryan i he” la yô, kanyi?

18 Gbenda u hemban doon u í pase kwaghmyer la je yô, lu kwagh u “ikuryan i he” u Yesu pase mbahenen nav mba jighjigh hen tugh mbu mase lun vea ve cii ve, i mase wuan un la. (Luka 22:20) Er ikyuryan i Tindi u Mose kpa lu nahan, ikyuryan i he ne kpa lu u ia lu a “tartor u upristi.” (Ekesodu 19:6; 1 Peteru 2:9) Kpa ikyuryan i he ne yô, lu u ia kohol ma ikyurior i kpôô kpôô ia ver kposo ga, kpa á lu ikyurior i ken jijingi, á lu “Iserael u Aôndo,” u í lu mbaperapera mba dondon Kristu mba i shighe ve mkurem la tseegh. (Mbagalatia 6:16) Mba ken ikyuryan i he shon ne vea kohol vea Yesu imôngo, vea va uumace cii a iveren!

19. (a) Er nan ve ikyuryan i he ne i ker cio u lun a “tartor u upristi”? (b) Er nan i yer Mbakristu mba i shigh ve mkurem mbara er ka mba i gbe ve ‘heghe,’ man ka ve iorov ume vea lu sha vea Kristu imôngô?

19 Kpa ikyuryan i he ne i̱ kôr cio u lun a “tartor u upristi” ú ua va uumace a iveren la nena? Ityôkyaa yô, ikyuryan ne i̱ na mbahenen mba Kristu ibo sha ci u mba mbaasorabo yum ga, kpa i̱ de ve a de asorabo a ve sha ci u nagh ku na kura. (Yeremia 31:31-34) Ve mban ka vea hingir perapera sha ishigh ki Yehova je tsô, maa a ngohol ve ve hingir ior mba ken tsombor u sha u mba i shigh ve mkurem sha icighan jijingi yô. (Mbaromanu 8:15-17; 2 Mbakorinte 1:21) Nahan i ‘mar ve hegh sha mhôônom Nam ma zungwen ma vesen, mba a ishimaverenkeghen i zuan a dyako u i koso un Sha la.’ (1 Peteru  1:3, 4) Er imba ian i̱ vesen ne i̱ lu kwagh u he hen uumace yô, ka nahan ve i er kwagh u Mbakristu mba i shigh ve mkurem, mba i mar ve ken jijingi la er i gba ve “hegh” ye. (2 Mbakorinte 5:17) Bibilo pase er ken masejime yô, iorov 144,000 vea lu sha, vea tema tor sha uumace mba a paa ve la.—Mpase 5:9, 10; 14:1-4.

20. (a) Ka mpase u nyi í va pase sha kwaghmyer ken inyom i 36 laa? (b) Ka unô vea zua a averen a í tôndo-zwa u nan Aberaham laa?

20 Mba i shigh ve mkurem mban kpa vea hingir “tsombor u Aberaham” imôngo vea Yesu. * (Mbagalatia 3:29) Lu Mbayuda mba sha marami mbara i hii tsuan ye. Kpa, mba va ar ken inyom i 36 yô, i shi i pase vegher ugenegh u kwaghmyer ne: i pase ér Atôatyev, shin mba ve lu Mbayuda ga kpaa, vea fatyô u hingir ken mba vea yem sha yô. (Mbaromanu 9:6-8; 11:25, 26; Mbaefese 3:5, 6) Kpa, a lu Mbakristu mba i shigh ve mkurem mbara tseegh vea zua a averen a í tôndo zwa u nan Aberaham la yee? Ei, gadia nagh ku Yesu kura ku sha ci u tar cii. (1 Yohane 2:2) Shighe kar yô, Yehova shi pase wener “zegeikpelaior” i i̱ ngee je í fe i̱ iyenge ga kpaa ia va war mkur u botar u Satan ne. (Mpase 7:9, 14) Shi a va nder mbagenev kpaa akum imôngo vea lu a ian i lun uma gbem sha won ken Paradiso!—Luka 23:43; Yohane 5:28, 29; Mpase 20:11-15; 21:3, 4.

Kwaghfan u Aôndo man Kwaghmyer

21, 22. Kwaghmyer u Yehova la tese kwaghfan na sha nyi gbenda?

21 Kwaghmyer ka gbenda u kpilighyol u tesen “kwaghfan u Aôndo u a dumbur la.” (Mbaefese 3:8-10) Gbenda u Yehova va a kwaghmyer shon ne, kua er a lu pasen kwaghmyer shon kure kure la kpaa, akaa ne cii kpilighyol je gande! Er kwaghfan na a gande u ôron yô, á fa mlu u uumace, nahan á de ve ér ve̱ tese ken igbar er asema ve a lu ker jim yô.—Pasalmi 103:14.

22 Shi mtsough u Yehova a tsough Yesu er a̱ lu Tor la kpa  ka ieren i kpilighyol i sha kwaghfan. Gadia Wan u Yehova ne ngu a mimi iyol hemba nyityô or igen sha won cii. Er Yesu kpa va hingir orumace yô, a ya atsan kposo kposo. Nahan á fa mbamzeyol mba uumace vindi vindi. (Mbaheberu 5:7-9) Man mba vea hemen vea Yesu imôngo la di ye? Ken uderimbaanyomov mba ve kar imôngo ne, í shighe nomso man kasev mba i tsough ve ken akuraior cii kua ken ijô kposo kposo la mkurem, aseeraior man ashagbaaior kpaa cii. Ve tagher a mbamzeyol kposo kposo kpa ve hemba ci ca cii. (Mbaefese 4:22-24) Se lu sha ikyev i hemen u utor man upristi mba lun a mhôônom mban nahan, a saan se iyol kpishi!

23. Ka ian i civirigh i nyi Mbakristu ve lu a mi sha kwaghmyer u Yehova laa?

23 Apostoli Paulu nger er: “Kwaghmyer u a lu myer hii sha zum u shighe lu a lu ga man ikov i ior kpaa lu a lu ga la, . . . hegen yô, i pase uicighan Nav kwagh la.” (Mbakolose 1:26) Kape í lu je la, ior mba Yehova mba i shigh ve mkurem la ve va kav kwaghmyer la wanger ve, shi mba pasen kwagh ne hen ior mbagenev umiliôn imôngo kpaa. Nenge ian i civirigh í se cii se lu a mi ne sha wono! Yehova “pase se kwaghmyer u awashima Na” la. (Mbaefese 1:9) Nahan de se kpa se pase mbagenev kwaghmyer u kpilighyol ne, se wase ve, ve kpa ve̱ gbir ashe ve̱ nenge a kwaghfan u Yehova Aôndo u á gande u tôvon la!

^ par. 17 Shi í va pase “kwaghmyer u a lu sha mcivir u se civir Aôndo la” ken Yesu kpaa. (1 Timoteu 3:16) Ngise ngise la ma or fatyô u fan aluer or nana lu perapera sha ishigh ki Yehova a u nôngon gbev shio ga. Kpa Yesu va pase kwagh ne. Hanma imeen i Satan va a mi sha a na cii yô, za hemen a perapera na her je tenger ga.—Mateu 4:1-11; 27:26-50.

^ par. 20 Yesu shi er ityendezwa a nongo shon ne sha u nan ve “tartor.” (Luka 22:29, 30) Inja na yô, Yesu tôndo-zwa a “anikumuile u kpeghee” ér vea tema tor a na sha, vea lu vegher u sha uhar u vor shon u Aberaham la.—Luka 12:32.