Aver yem sha atineakaa

Aver yem sha mver u atineakaa

 LU A IEREN I ORKRISTU

Er Se Seer Fan Igbenda I Pasen Kwagh Yô —Tesen mba Se Henen Bibilo a Ve la u Wan Agoyol sha Kwaghhenen

Er Se Seer Fan Igbenda I Pasen Kwagh Yô —Tesen mba Se Henen Bibilo a Ve la u Wan Agoyol sha Kwaghhenen

ER I HII VE KWAGH NE A LU HANGE HANGE YÔ: Mba se henen Bibilo a ve la, ka vea wa agoyol yô, i hemba lun ve ican ga, u kaven shi umbur kwagh u se lu tesen ve la. Aluer mba kaven shi umbur kwagh u i lu tesen ve la seer a seer yô, vea hemba vesen ken jijingi fele. Shi aluer ve va er batisema kera je kpa, a gba u vea waan agoyol sha mbamkombo man tom u pasen kwagh la, sha er vea za hemen u “kuran” yô. (Mt 25:13) Sha nahan yô, aluer ve fa er vea hen kwagh shi mba eren nahan hanma shighe yô, kwagh ne una wase ve sha ayange a uma ve cii. Gba u shighe u se hii u henen Bibilo vea ior la je, se wase ve vea lu a ieren i wan agoyol sha kwaghhenen u ken Bibilo la.

ER U ER KWAGH NE YÔ:

  • Ver ikyav i dedoo. (Ro 2:21) Lu a or u u henen Bibilo a nan la ken ishima, shighe u u lu wan agoyol sha hanma kwaghhenen yô. (km 11/15 3) Tese nan takerada wou, nana nenge er u kpil ihiange sha mbamlumun yô

  • Taver nan ishima, nana waan agoyol. U hiin kwaghhenen a nan je, maa pase nan nana fa er u wan agoyol sha kwaghhenen la, i lu vegher u Bibilo i henen yô, shi ôr nan akaainjaa a nga a due ker la kpaa. Due nan a mbamhen mba vea wase nan nana fa er nana pande shighe u nan eren akaa a nan la, nana na sha u wan agoyol sha kwaghhenen yô. Mbatesen mbagenev ka vea henen kwagh vea or u ve henen Bibilo a nan la yô, ve gema takerada ve u ve kpil ihiange sha mbamlumun la, ve na nan, sha er vea wase nan nana nenge a mbamtsera mba eren nahan yô. Shighe u nan we agoyol yô, wuese nan

  • Tese nan u wan agoyol sha kwaghhenen. Mbatesen mbagenev ka vea hiin kwaghhenen a or je, maa ve tôô shighe ugen u ve tem kwaghhenen la jimin cii, ve tese nan er nana waan agoyol sha kwaghhenen yô