Aver yem sha atineakaa

Aver yem sha mver u atineakaa

 LU A IEREN I ORKRISTU

Kwagh u U Er Ve U Hemba Zuan a Iwasen ken Kwaghhenen Wou u sha Tseeneke la Yô

Kwagh u U Er Ve U Hemba Zuan a Iwasen ken Kwaghhenen Wou u sha Tseeneke la Yô

ER I HII VE I LU HANGE HANGE YÔ: Ka sea henen Mkaanem ma Aôndo sha tseeneke wase yô, kwagh ne a wase se u “kaven er igbanger man iniembe man mtav man mze” u mimi a lu la. (Ef 3:18) Ka ma wase se se kera lu a ahuar man acôghor a wan iyol ga ken botar ne, nahan se kusu “kwaghôron u uma la gbang gbang.” (Fil 2:15, 16) Ka sea henen Mkaanem ma Aôndo sha tseeneke wase yô, kwagh ne a na se ian i tsuan kwagh u sha ishima yase u se soo u henen la. Se er nan ve se hemba zuan a iwasen ken shighe u ka se tôô u ôron shi henen Bibilo laa?

ER SE ER KWAGH NE YÔ:

  • Ver ikyav sha avur a Bibilo shi nger akaa a u zough a mi ken Bibilo you i henen kwagh a mi sha tseeneke la, gayô nger akaa shon sha kwatakerada shin ken anar wou

  • Shighe u u lu ôron Mkaanem ma Aôndo yô, pinen iyol you mbampin mban: ‘Ka an i lu ôron kwagh u nana? Ka nyi i lu ôrono? Ka hanma shighe? Ka hanma ijiiri? Ka sha ci u nyi? Kwagh ne er nena?’

  • Nôngo fa akaa a i gbe u u fa mimi u a la. Er tom a ikyav mbi wasen se u tôvon sha kwagh la, u keren ma itinekwagh shin ma ivur Bibilo

  • Gbidye kwar sha kwagh u u ôr la sha er u fa gbenda u kwagh shon a bende a we yô

  • Dondo kwagh u u hen la ken uma wou ayange ayange.—Lu 6:47, 48

NENGE VIDIO I KUSU KWAGHÔRON U UMA LA GBANG GBANG—SHA U HENEN BIBILO SHA INJA LA, MAA NA MLUMUN SHA MBAMPIN MBA VE DONDO NE:

  • Mbagen pase kwagh u a lu u henen kwagh sha tseeneke la nena?

  • Gba u se hii kwaghhenen wase u sha tseeneke la sha msen sha ci u nyi?

  • Ka nyi ia wase se ve se hemba kaven kwagh u se lu ôron ken Bibilo laa?

  • Ka akav a nyi nahan se fatyô u veren ken Bibilo yase i henen kwagh a mi sha tseeneke laa?

  • Shighe u se lu henen Mkaanem ma Aôndo yô, ka a inja u se gbidyen kwar sha mi sha ci u nyi?

  • Ka nyi i gbe u se er a kwagh u se hen laa?

“Atindiakaa a Ou, doom ishima zee! Kam kwagh u shin henen sha mi didi.”—Ps 119:97