Aver yem sha atineakaa

Aver yem sha mver u atineakaa

 LU A IEREN I ORKRISTU

‘Paulu Sugh Aôndo, Nahan Ishima Taver Un’

‘Paulu Sugh Aôndo, Nahan Ishima Taver Un’

Tiônnongo u ken Roma yange ongo ér Paulu ngu van yô, a tsua anmgbianev mba nomso mbagenev, ve er zende u kuman er ukilomita 64 nahan, ve za kegh un gbenda. Dooshima u tangen iyol ga u anmgbianev mbara tese Paulu la bende a na nena? Bibilo kaa ér: “Paulu nengen a ve yô, a sugh Aôndo, nahan ishima taver un.” (Aer 28:15) Er i fa Paulu ér lu or u taver atôônanongo ishima nahan kpa, hen shighe u lu ken purusu ne yô, lu un i taver un ishima ye.—2Kor 13:10.

Nyian ne, mbatamen mba sôron atôônanongo ka ve zenden sha atôônanongo ve taver anmgbianev mba nomso man mba kasev asema. Er ior mba Aôndo cii ka i lu ve nahan, ashighe agen ve kpa ka ve vôr shi ishima i nyian ve shi iyol i kpe ve. Kwagen u ortamen u sôron atôônanongo kua kwase na ve sôr tiônnongo wou yô, ka nyi u fatyô u eren u wasen ve u zuan a ishimataver sha er ne ‘taver ayol a en asema imôngo’?—Ro 1:11, 12.

  • Zaan mbamkombo mba duen kwaghpasen. Ortamen u sôron atôônanongo ka a zua a ishimataver shighe u mbapasenkwagh ve de akaa agen a kar ve sha er vea hemba suen mve na la yô. (1Tes 1:2, 3; 2:20) Wa agoyol u va eren ishuen pania ken uwer u una va la. U fatyô u duen kwaghpasen vea na shin kwase na, shin zan vea mô ve hen or u u henen Bibilo a nan je he? Ka i doo ve u eren tom vea mbapasenkwagh kposo kposo, kua mbahev shin mba ve nengen ayol ave ér ve fa kwagh pasen tsembelee ga la.

  • Tesen erdoo. U fatyô u nan ve ijiir i tsan shin kwaghyan kpa? Aluer u er nahan yô, ortamen u sôron atôônanongo man kwase na vea fa ér ve doo u ishima. Mba keren ér i er ve zegekwagh ga.—Lu 10:38-42.

  • Keghen ato a na shi dondon kwagh u a kaa ér i er la kua kwaghwan na. Ortamen u sôron atôônanongo ka a wase se sha dooshima se fa er se seer civir Yehova yô. Ashighe agen yô, a gba u una wa se kwagh taveraa. (1Kor 5:1-5) Ka i saan un iyol shighe u se ongo kwaghwan shi se dondo kwagh u a kaa ér se er yô, aluer se fa ityôkyaa ga je kpaa.—Heb 13:17.

  • Tesen iwuese. Ôr ortamen u sôron atôônanongo vea kwase na er u zough a iwasen ken iniôngon ve la yô. U fatyô u za lamen a na iyol you shin ngeren un anwashika gayô tindin un a kaade u wuese un.—Kol 3:15.