Aver yem sha atineakaa

Mbashiada mba Yehova

Tsua Zwa Tiv

IWASEN SHA CI U TSOMBOR

Er U Wase Wan Wou Una Hemba Pasen Ikyaren Tsembelee Yô

Er U Wase Wan Wou Una Hemba Pasen Ikyaren Tsembelee Yô

Alaghga wan wou we ikyo sha kwagh u makeranta yum ga shi soon u eren asaimenti ga, shi henen kwagh kpaa ga. Nahan ka nyi i dugh ken ieren na laa? Ka una er ikyaren je, i doo ga shi ieren na kpa kape i lu je la. Nahan u er nan ve u wase wan wou una hemba pasen ikyaren tsembelee?

 Kwagh u i gbe u u fa yô

Aluer u hingir a nan hang yô, kwagh a hemba gban a gba kera. Aluer u kera ngu memen wan wou ga yô, ishima ia hemba nyian nan ken makeranta man ken ya cii! Kwagh la una na yô, alaghga nana nyôr eren aie sha er ahumbe a ta nan iyol yô; shi ikyaren i nan ia doo ga je nan yer i, gayô, nan ii sigeneca wou nan nger sha ikyaren i nan u tesen je ér we kpa u nenge a mi, shin nana kera gba soon makeranta ga. Nahan inyamigyo a hemba vihin a vihi ishe.

Aluer u ngu nan nan iyua kpa, alaghga kwagh la una wase yum ga. Ter ugen u i yer iti na ér Andrew yô, kaa ér “Yange se nôngo se na wan wase u kwase iyua hanma kwa u ikyaren na i doo yô; nahan kpa kwagh la yange na hemba veren ishima sha iyua la. Yange ikyaren na ia doon ga yô, i vihi un kpishi er una kera zua a iyua ga yô, i kera lu sha ci u ikyaren na vihi ga.”

U nan atica ibo la una wase wan wou ga cii. Adooga wanye la nana kure ikyaa er ka hange hange u nana hen kwagh kpoghuloo cii ve ikyaren i nan ia doo ga. Shi mbamaren mbara vea lu tesen wanye la u nan mbagen ibo sha akaa a nan er shami ga la, shi veren ishima ér i lu ior mbagen ve sôron nan mbamzeyol ye. Jighilii yô, wan wou la nana vese a ieren i nan mbagen ibo sha akaa a nan er la, cuku kpa nana kera lumun ibo sha kwagh ga.

 Kwagh u u fatyô u eren yô

Kôr iyol you tsaha. De lamen a wan wou sha kwagh u ikyaren i nan shighe u ishima i lu vihin we ga. Ter ugen u i yer iti na ér Brett yô kaa er: “Shighe u mo vea kwase wam se kundu ishima shi mhôônom ma ker se a mbayev asev yô, ka se hemba wasen ve sha gbenda u injaa”

Kwaghwan u Bibilo: ‘Lu tsev tsev sha u ungwan kwagh kpa gema ngôôr a kwaghôron, ngôôr a iyugh kpaa.’—Yakobu 1:19.

Fa kwagh u a lu zayol jim jim la. De gbe kuren ikyaa wer wan wou wa hwev ga. Atôakyaa nga kpishi aa kwagh a fatyô u lun nahan yô. Ashighe kpishi mbakov mba wanye la ka ve hiin nan, shin i musan nan makeranta, gayô ishima i nyian nan shighe u i lu ngeren ikyaren yô, shin mbamzeyol mba hen tsombor shin nan yaven tsembelee ga, shin nan ver shighe u henen kwagh ga, shin nan veren ishima sha kwagh tsembelee ga.

Kwaghwan u Bibilo: “U nan ver ishima sha Kwaghôron yô, nan zua a kwaghdoon.”—Anzaakaa 16:20.

Sôr ian sha er wan wou una henen kwagh kundu kundu yô. Ver wan wou shighe u una eren mbaasaimenti yô, kua shighe u henen kwagh. Ver wan wou ijiir i una teman a eren mbaasaimenti ken ya ape akaa a danen un aa lu gayô (akaa er televishen man hanseeti nahan). Pav ashighe a i gbe u wan wou a eren akaa a ken makeranta hen ya la kpuaa kpuaa sha er a hemba lun nan zange u veren ishima her yô. Ter ugen ken tar u Jamani u i yer iti na er Hector yô, kaa ér: “Ikyaren ka ia zurum maa se hii u wasen wan wase u umbur akaa a a hen la sha hanma sev, se mba keghen ser saa shighe a va bee cii ga.”

Kwaghwan u Bibilo: “Hanma kwagh ngu a ayange na.”—Orpasenkwagh 3:1.

Taver nan ishima nana henen kwagh. Aluer u wase wan wou u fan mbamtsera mba nana zua a mi ken makeranta hegen ne yô, kwagh la una mgbegha nan u soon makeranta. Ikyav i tesen yô, ayenge aa wase wan wou una fa er una vihin inyaregh nagh sha akaa vough vough yô.

Kwaghwan u Bibilo: “Zua a kwaghfan, zua a mkav. . . . Kende un sha.”—Anzaakaa 4:5, 8.

Kwaghwan: Wase wan wou shighe u a lu eren asaimenti yô, kpa de ngohol eren iyol you ga. Andrew kaa wener, “Se mba eren wan wase u kwase asaimenti hanma shighe, maa kwagh kera gbe orti u eren asaimenti iyol na ga, ngu a gema a gbihi se a mi.” Tese wan wou a fa u eren asaimenti iyol na.