Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Er Nan i Yer Yesu Ér Wan u Aôndo?

Er Nan i Yer Yesu Ér Wan u Aôndo?

Mlumun u Bibilo i ne yô

Aôndo ngu a kwase u a mar un onov ga. Kpa ka un a gba akaauma cii ye. (Mpase 4:11) Sha nahan yô, Adam or u hihii u Aôndo gba la i yila un ér “wan u Aôndo.” (Luka 3:38) Kape Yesu kpa Bibilo i tese ér ka Aôndo yange gba un je la. Nahan Yesu kpa i yila un ér “Wan u Aôndo.”—Yohane 1:49.

Aôndo yange vande gban Yesu cii ve mase gban Adam ye. Apostoli Paulu yange nger kwagh u Yesu ér: “Un ka ibeen i Aôndo u i nengen a Na ga la, ka Waniunda ken akaa a i gbe a cii.” (Mbakolose 1:15) Yesu yange vande lun uma ica i gba cii i va masen maren un hen ityôghile ken Betelehem ye. Jighilii yô, Bibilo kaa ér “mdugh Na hii tsuaa je sha ayange a ngise ngise la.” (Mika 5:2) Er Yesu lu Waniunda yô, yange lu or u ken jijingi sha cii i va mar un lu or shin tar ye. Yesu iyol na kaa ér: “M sen Sha.”—Yohane 6:38; 8:23.