Aver yem sha atineakaa

“Uishindan mba Tartor” Mbara Ka Nyi?

“Uishindan mba Tartor” Mbara Ka Nyi?

Mlumun u Bibilo i ne yô

Ishember i “uishindan mba tartor” la ngi ôron kwagh u ian shin tom u bughun ior gbenda u vea “nyôr ken tartor u Aôndo” yô. (Mateu 16:19; Aerenakaa 14:22) * Yesu yange na Peteru “uishindan mba tartor u Sha.” Inja na yô, yange i ver Peteru sha ian i pasen er i gbe u mbadondon Kristu mba mimi vea ngohol icighan jijingi u Aôndo ve vea kuma u nyôron ken Tartor u Aôndo u sha la yô.

Lu unô uishindan mbara wase ve?

Peteru yange bugh iniongoior itiar gbenda u nyôron ken Tartor sha ian i Aôndo ver un sha mi la:

  1. Mbayuda man ior mba ve nyôr Mbayuda yô. Yesu yange kpe ica i gba je maa Peteru lam a ikpela i Mbayuda mba nan Aôndo jighjigh, taver ve ishima ér ve lumun ér ka Yesu Aôndo a tsua ér a lu Tor u Tartor u Sha la ye. Peteru tese ve kwagh u vea er ve a yima ve yô. Sha nahan yô, yange bugh ve gbenda u nyôron ken Tartor u Aôndo, shi ior udubu imôngo “lumun kwaghôron na la.”—Aerenakaa 2:38-41.

  2. Mbasamaria. Ken masejime yô, i va tindi Peteru hen Mbasamaria. * A za er tom a ian, shin, ishindan i Tartor igen vea apostoli Yohane, “ve er msen sha er [Mbasamaria] ve̱ ngohol Icighan Jijingi yô.” (Aerenakaa 8:14-17) Maa ian bugh Mbasamaria u nyôron ken Tartor u Sha.

  3. Atôatyev. Yesu yange kpe anyom nga karen atar man tiôn yô, Aôndo pase Peteru ér Atôatyev (ior mba ve lu Mbayuda ga) kpa vea fatyô u nyôron ken Tartor u Sha. Nahan Peteru er nena? Peteru er tom a ishindan igen sha u pasen atôatyev kwagh, nahan gbenda bugh ve u zuan a iyua i icighan jijingi, ve hingir Mbakristu mba lun a ishimaverenkeghen i va nyôron ken Tartor u Sha.—Aerenakaa 10:30-35, 44, 45.

Ka a ter kwagh u “nyôr ken Tartor u Sha” la yô, mba ôron ér nyi?

Mba ve “nyôr ken Tartor u Sha” la ka ve za hingir mbateman tor a Yesu imôngo sha. Bibilo tsengaôron ér vea “tema sha mkônom ma torom,” vea “tema tor sha tar,” inja na yô, vea hemen tar.—Luka 22:29, 30; Mpase 5:9, 10.

Mbamtsum mba sha kwagh u uishindan mba Tartor

Mtsum: Ka Peteru una tsua or u nana yem sha Tartor u Sha la ye.

Mimi: Bibilo kaa ér ka Peteru ga, kpa ka Kristu Yesu “Una va ôr mbaumav man mbakpenev ijir” ye. (2 Timoteu 4:1, 8; Yohane 5:22) Jighilii yô, Peteru iyol na yange kaa ér ka Yesu “Aôndo ver Un Orjir u mbaumav man mbakpenev” ye.—Aerenakaa 10:34, 42.

Mtsum: Ka shighe u Peteru yange una tsua u eren tom a uishindan mba Tartor la, Sha kpa i dondo ye.

Mimi: Shighe u Yesu lu ôron kwagh u uishindan mba Tartor la, a kaa a Peteru ér: “Hanma kwagh u wea kange shin tar ne yô, una lu uikyangen Sha, man hanma kwagh u wea sagh un shin tar ne yô, á sagh un Sha kpaa.” (Mateu 16:19) Shin er mbagenev ve henen ér mkaanem man tese ér saa Peteru yange a tsua u eren kwagh ve i dondo sha nahan kpa, asember a ken zwa Grika a pasen ieren, a i gem heen ne tese ér, ka Sha yange i tese Peteru kwagh ve a dondo shin a er ye, yange a vande tsuan u eren kwagh cii ve i dondo sha ga. *

Hen ijiir igen la kpa Bibilo tese ér yange lu u Peteru una dondon shighe u i tsough sha ér a er tom a uishindan mba Tartor yô. U tesen ikyav yô, yange dondo kwaghwan u Aôndo shighe u lu eren tom a ishindan u sha utar la.—Aerenakaa 10:19, 20.

^ par. 3 Ashighe agen Bibilo ka ia ter ishember i “ishindan” la yô, i ôron kwagh u ian shin tom u i ver or sha mi yô.—Yesaia 22:20-22; Mpase 3:7, 8.

^ par. 7 Mbasamaria yange ve lu ken kwaghaôndo u lu kposo a kwaghaôndo u Mbayuda, kpa gema dondon atesen man aeren agen ken Tindi u Mose la yô.

^ par. 15 Nenge ngeren u henen kwagh a mi u ken Mateu 16:19.