Aver yem sha atineakaa

Mbashiada mba Yehova

Tsua Zwa Tiv

Paseka Ka Nyi?

Paseka Ka Nyi?

Mlumun u Bibilo i ne yô

Paseka ka iniongo i Mbayuda i ember mdugh u Aôndo due a Mbaiserael ken Igipiti kera ken inyom 1513 C.S.Y yô. Aôndo yange kaa a Mbaiserael ér ve umbur iniongo i injaa ne hanma inyom sha iyange i sha 14 i uwer u Mbayuda u Abiba. Shighe kar yô, i va gema yilan uwer ne ér Nisan.—Ekesodu 12:42; Levitiku 23:5.

Mba yer iniongo ne ér Paseka sha ci u nyi?

Ishemberti i “Paseka” la ngi ôron kwagh u shighe u Aôndo yima Mbaiserael sha ikyev ican i i wua hanma waniunda ken Igipiti la. (Ekesodu 12:27; 13:15) Cii man Aôndo va a ican i vihin tsung ne yô, a vande ôron a Mbaiserael ér ve sôngo waniyôngo shin ivo, ve mishi awambe sha kpandehunda. (Ekesodu 12:21, 22) Lu u Aôndo una nengen a ikyav ne yô, una “aver” a kar uyaav vev, nahan ônov mbaiundav vev vea war.—Ekesodu 12:7, 13.

Yange i er iniongo i Paseka la sha ayange a i ngeren Bibilo la nena?

Aôndo yange tese er a er iniongo i Paseka i sha hiihii la yô. * Akaa agen a i eren sha uiniongo mba Paseka, a i nger ken Bibilo yô, ka a je ne.

  • Nagh: Icombor yange i kôr waniyôngo u a kom inyom i môm yô (shin ivo) sha iyange i sha pue i uwer u Abiba (Nisan) la, man ve songo sha iyange i sha 14 la maa sha iyange i sha 14 la ve sôngo un.—Ekesodu 12:3-9.

  • Kwaghyan: Dugh waniyôngo (shin ivo) i Mbaiserael yange ve ya sha iyange i Paseka la kera yô, shi yange ve ya bredi u i we kwa sha mi ga la man ikyayue i yuan.—Ekesodu 12:8.

  • Iniongo: Mbaiserael yange ve er iniongo i Paseka vea been kera yô, ve er Iniongo i Beredi u Í We Kwa ga yô ayange a ataankarahar, hen shighe ne ve kera ya bredi u i we kwa sha mi la ga.—Ekesodu 12:17-20; 2 Kroniku 30:21.

  • Ityesen: Mbamaren yange ve er tom a shighe u iniongo i Paseka la, ve tese mbayev vev kwagh u Yehova Aôndo.—Ekesodu 12:25-27.

  • Zende: Shighe kar yô, Mbaiserael ve er zende ve yem ken Yerusalem ve za er iniongo i Paseka.—Duteronomi 16:5-7; Luka 2:41.

  • Aeren a tyôô agen: Sha ayange a Yesu la, a eren iniongo i Paseka yô, shi i ma wain shi i gber atsam kpaa.—Mateu 26:19, 30; Luka 22:15-18.

Akaa tsumen sha kwagh u Paseka

Mtsum: Mbaiserael yange ve ya Paseka sha iyange i Nisan 15.

Mimi: Aôndo yange kaa a Mbaiserael ér ve sôngo waniyôngo sha iyange i Nisan 14, zum u iyange mir kera yô. Shi ve ya un hen aikighe u utu shon. (Ekesodu 12:6, 8) Iyange i Mbaiserael yange i hii sha iyange i been zan zan i za kure kpernan iyange i been. (Levitiku 23:32) Sha nahan yô, Mbaiserael yange ve sôngo waniyôngo ve ya Paseka a mi sha mhii u Nisan 14.

Mtsum: Mbakristu kpa ve eren iniongo i Paseka.

Mimi: Yesu yange eren iniongo i Paseka sha iyange i Nisan 14 inyom i 33 la been kera yô, va a iniongo igen: Kwaghyan u Ter u Aikighe. (Luka 22:19, 20; 1 Mbakorinte 11:20) Er Kwaghyan ne a lu kwaghyan u umbur nagh ku Kristu “Waniyôngo wase u Paseka” la yô, a kar a tile sha ityough ki Paseka. (1 Mbakorinte 5:7) Nagh ku Yesu kura, hemba nagh ku Paseka la, sha ci nagh ku Yesu kura paa ior cii sha ikyev i isholibo man ku.—Mateu 20:28; Mbaheberu 9:15.

^ par. 7 Nahan kpa, er shighe kar yô, gba u a nyôôso akaa sha kwagh ne. Ikyav i tesen yô, Mbaiserael yange ve er iniongo i Paseka i sha kwa hiihii la “fele fe fele” sha ci u gba u vea wa iyol a due ken Igipiti kera. (Ekesodu 12:11) Nahan kpa, mba za nyer ken Tar u Ityendezwa yô, kera gba u vea er iniongo ne fele fe fele ga.