Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Naagh Ku Yesu Hingir “Ipaan sha Ci u Ior Kpishi” Nena?

Naagh Ku Yesu Hingir “Ipaan sha Ci u Ior Kpishi” Nena?

Mlumun u Bibilo i ne yô

Ka sha naagh ku Yesu kura Aôndo una yima shin una war uumace sha ikyev isholibo man ku ye. Bibilo kaa ér awambe a Yesu a i hee inya la, ka ishe i i kimbi sha u paan se yô. (Mbaefese 1:7; 1 Peteru 1:​18, 19) Sha nahan yô, Yesu kaa ér un va sha u “una na uma Na a̱ hingir ipaan sha ci u ior kpishi.”—Mateu 20:⁠28.

Er nan ve yange gba u a na “ipaan sha ci u ior kpishi”?

Yange i gba Adam, orumace u hiihii la lu vough, inja na yô, lu a isholibo iyol ga. Lu u una lu uma gbem sha won, kpa gema tsua u ungwan imo i Aôndo ga. (Genese 3:​17-19) Va maren ônov yô, ve due a mlu u isholibo na la. (Mbaromanu 5:12) Sha ityôkyaa ne yô, Bibilo tese ér Adam yange ‘tee’ iyol na kua ônov nav cii, ve hingir ikpan sha ikyev i isholibo man ku. (Mbaromanu 7:14) Er ve lu mbaasorabo yô, or ve môm nana fatyô u paan, shin hiden a kwagh u Adam yange ta kera la ga.—Pasalmi 49:​7, 8.

Kpa kunya kôr Aôndo a ônov mba Adam, shin tsombor u uumace u ua due ken Adam la. (Yohane 3:16) Nahan kpa, er Aôndo a ôron ijiir sha mimi yô, lu u una gba den ve asorabo tsô ga, kpa gba hange hange u una lu a ityôkyaa i injaa, i una tile sha mi ve una de ve asorabo yô. (Pasalmi 89:14; Mbaromanu 3:​23-26) Uumace doo Aôndo ishima, nahan a va a gbenda u a nenge ér saa una kar sha mi ve a lu sha tindi yô, ka gbenda u una de uumace asorabo ve tseegh ga, shi una kar a isholibo ve la kera elegh elegh yô. (Mbaromanu 5:​6-8) Gbenda shon yô, ka naagh ku ipaan kura.

Naagh ku ipaan wa ker nena?

Bibilo tese er naagh ku ipaan ku we ker la sha igbenda i itiar ne:

  1. Ka ishe i i kimbi sha kwagh .Numeri 3:​46, 47.

  2. Ka ku wase u paan shin yiman uma.—Ekesodu 21:⁠30.

  3. Ku kuma sha ishe i uma u i paa a ku la, shin ku kuma u cirin gayô yangen kwagh u a ne ve i gbe u a saa a paa uma la. *

Tôô ase igbenda i itiar ne kar sha naagh ku ipaan ku Yesu Kristu la.

  1. Ishe i i kimbi sha kwagh. Bibilo kaa ér ka “sha ishe je i yam” Mbakristu ye. (1 Mbakorinte 6:20; 7:23) Ishe la ka awambe a Yesu, a a “yam Aôndo ior sha [mi] ken hanma nongo man hanma zwa man hanma nongoior man hanma ikyurior” la.​—⁠Mpase 5:​8, 9

  2. Mpaa. Naagh ku Yesu kura ka gbenda u ‘paan’ se sha ikyev i isholibo.—1 Mbakorinte 1:30; Mbakolose 1:14; Mbaheberu 9:15.

  3. Ishe i naagh kura. Naagh ku Yesu kura ku ishe kwaghmôm a uma u vough shin u lun a isholibo shio, u Adam yange ta kera la. (1 Mbakorinte 15:​21, 22, 45, 46) Bibilo kaa ér: “Er ior kpishi ve hingir mbaasorabo sha ihyembeato i or môm yô, kape ior kpishi di ve hingir mbaperapera sha ikyo i wan i Or môm kpaa la.” (Mbaromanu 5:19) Kwagh ne pase er i hii ve i lu u ku u or môm ua fatyô u paan mbaasorabo kpishi yô. Jighilii yô, naagh ku Yesu kura ka “ipaa sha ci u ior cii,” mba ve lu eren akaa a i gbe u saa or a er keng ve nana kuma u zuan a mtsera u naagh ku shon la.—1 Timoteu 2:​5, 6.

^ par. 11 Ishember i ken zwa Grika i i gem ken Bibilo ér “ipaan” la, ngi ôron kwagh u ishe i i kimbi sha kwagh, shin kwagh u injaa u i tôô i ne sha kwagh yô. U tesen ikyav yô, mba teren ishember i ken zwa Heberu i i yer ér ka·pharʹ la sha gbenda u ka ieren shi ka iti i ieren shon kpaa. Ka a ter i sha gbenda u ka ieren la yô, i ôron jighilii ér “cir.” Ishember ne ka i ôron kwagh u cirin shin esen isholibo kera. (Pasalmi 65:⁠3) Kpa ka a ter i sha gbenda u ka iti i ieren ne yô, i lu kwagh u i ne sha u cirin isholibo, shin paan uma la i ôron ye. (Ekesodu 21:30) Kape ishember i ken zwa Grika i i yer ér lyʹtron, i ka i gema ér “paa” la kpa, shi a fatyô u geman i ér “ipaan” gayô “ishe i paan” je la. (Mateu 20:28; The New Testament in Modern Speech, by R. F. Weymouth) Mbagrika mba ngeren akaa yange vea teren ishember ne yô, mba ôron kwagh u i kimbi sha u paan or u i kôr nan ken utya i wuhe shin pasen or u i kôr na kpan yô.