Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Ka Atôakaa Ahar a Nyi Ka a Na Ve Aôndo a Ungwa Mbamsen Mbagenev Ga?

Ka Atôakaa Ahar a Nyi Ka a Na Ve Aôndo a Ungwa Mbamsen Mbagenev Ga?

Mlumun u Bibilo i ne yô

Mbamsen mbagenev Aôndo ongo ve ga. Nenge ase atôakaa ahar a ka a na ve Aôndo a ungwa msen u or ga yô.

1. Msen u i er sha ishima i Aôndo ga yô

Aôndo ongo msen u i er i sen un kwagh u a lu sha ishima na ga, shin kwagh u a hendan a atindi na a i nger ken Bibilo la ga. (1 Yohane 5:14) Ikyav i tesen yô, Bibilo kaa ér se palegh hua u eren. Do u gbidyen ve a hua u eren. (1 Mbakorinte 6:9, 10) Sha nahan yô, aluer u er msen wer Aôndo a wase u u ya do yô, una ungwa msen la ga. Aôndo ka ma jijingi u u yila un wer a er hanma kwagh u u soo cii ga. Jighilii yô, doo u u lu a iwuese sha kwagh ne. Aôndo una lu nahan ga yô, adooga ma u cia kwagh u ior vea sôn Aôndo ér a er la.—Yakobu 4:3.

2. Msen u orhembanato

Aôndo ungwan msen u ior mba ve we ishima u eren kwagh u vihin un la ga. Ikyav i tesen yô, Aôndo yange kaa a ior mba ve senge ér mba civir un kpa ve gema ve lu hemban ato la ér: “Zum u ne seer a seer eren mbamsen kpishi kpaa, M ver ato ga; ave a en iv a awambe.” (Yesaia 1:15) Kpa aluer ve gema igbenda ve, ve “hen . . . kwagh imôngo” vea Aôndo yô, una ungwa ve zum u ve er msen yô.—Yesaia 1:18.