Aver yem sha atineakaa

Mbashiada mba Yehova

Tsua Zwa Tiv

Kwaghbo u A Fatyô u Den Or a Mi Ga la Ka Nyi?

Kwaghbo u A Fatyô u Den Or a Mi Ga la Ka Nyi?

Mlumun u Bibilo i ne yô

Ka anza man aeren a orsholibo ka a na ve i lu u mayange Yehova una de nan a kwaghbo u nan ga ye. Ka nyi ia na ve or a hingir u za lun a ieren i a fatyô u den nan kwaghbo ga laa?

Ior mba ve gem ishima sha mimi, ve lu dondon igbenda i Aôndo shi ve ne wan na Yesu Kristu jighjigh la cii Aôndo ka a de ve kwaghbo ve. (Aerenakaa 3:19, 20) Nahan kpa, alaghga orgen nana nômbo ikyôr eren akaa a a lu a shami ga yô, je shi nana soo u den ieren i nan shin inja i nan i bo la ga. Bibilo kaa ér imbaor la nan ngu a “boshima” u a “cighir . . . sha icugh i isholibo” yô. (Mbaheberu 3:12, 13) Er inyatyuu i i nande i sha usu ka i sesa gbang nahan, kape ishima i imbaor la kpa ka i hendan a Aôndo, i kera hide ijime ga je la. (Yesaia 45:9) Ma ityokyaa i môm ngi i a de imbaor la isholibo i nan ga, sha nahan yô, a fatyô u den nan isholibo i nan la ga.—Mbaheberu 10:26, 27.

Mbahemen kwaghaondo u Mbayuda mbagenev sha ayange a Yesu la yange ve er asorabo a a fatyô u den ve a mi ga yô. Yange ve fa dedoo er i lu icighan jijingi u Yehova a ne ve Yesu a lu eren uivande yô, nahan cii kpa ve yem kaan ér ka Satan Diabolo a ne Yesu tahav mbu eren ivande ye.—Marku 3:22, 28-30.

Asorabo a a fatyô u den or a mi yô

  • Ityuhanev mbi sha lan. Apostoli Paulu kpa yange vande lun or u tyuhwan, kpa va nger kwagh kaa ér: “I zungwem mhôônom gadia m lu eren sha lan man sha jighjigh u nan ga.”—1 Timoteu 1:13.

  • Idya. Bibilo ôr se kwagh u ior mbagenev mba yange ve er idya, kpa ve gema ishima ve undu ieren shon, nahan Aôndo de ve kwaghbo yô.—1 Mbakorinte 6:9-11.

“M er kwaghbo u a fatyô u den mo a mi ga yôô?”

Aluer mimi je u kôr akaabo a yange u er la ihyom shi u soo u geman ishima sha mimi yô, kwagh ne tese ér kwaghbo wou la gande u a de u a mi ga. Aluer u gema ishima sha ma kwaghbo u yange u er, man u va hide u er kwaghbo shon je kpa Aôndo una fatyô u den we isholibo, sha ci u ishima you cighir sha kwaghbo shon zan zan gbem ga.—Anzaakaa 24:16.

Ior mbagenev nenge ér isholibo ve gande u a de ve a mi, sha ci u ishima zer nan ve ibo kpii. Nahan kpa, Bibilo tese se er se fatyô u nan ishima yase jighjigh hanma shighe ga. (Yeremia 17:9) Aôndo na se ian i ôron or môm ijir ga, kua iyol yase je kpaa. (Mbaromanu 14:4, 12) Una fatyô u den se a kwaghbo wase, aluer ishima yase ngi nan se ibo je kpaa.—1 Yohane 3:19, 20.

Yuda Isekarioti yange er isholibo i a fatyô u den un a mi ga yôô?

Een, yange er. Hua yange mgbegha un za ii inyaregh ki yange i ver sha u eren tom u Aôndo a mi yô. Shi yange lu eren ér i fa ér un wa mbaatsanev ikyo, kpa awashima na yô, lu keren ér inyaregh ki ngee kpishi una ii. (Yohane 12:4-8) Er Yuda penda ishima u eren akaabo tseegh yô, a hingir u za nengen Yesu mker sha agbenger a azurufa 30. Yesu yange fa er i lu u a tsa kpa Yuda una gema ishima sha kwagh u a er la ga yô, nahan a yila un ér, “wan u mtim.” (Yohane 17:12) Kwagh ne tese ér, lu u Yuda una kpeen yô, kwagh na bee, a kera nder un shin mbakpenev ga.—Marku 14:21.

Yuda yange tese ér un gema ishima sha mimi ga. Yange za pase asorabo na hen mbahemen kwaghaôndo mba nenge Yesu mker vea ve la, kera lu hen Aôndo ga.—Mateu 27:3-5; 2 Mbakorinte 7:10.