Aver yem sha atineakaa

Mbashiada mba Yehova

Tsua Zwa Tiv

Ka Nyi i Lu Tartor u Aôndo?

Ka Nyi i Lu Tartor u Aôndo?

Mlumun u Bibilo i ne yô

Tartor u Aôndo ka gomoti kpôô kpôô u Yehova Aôndo a ver yô. Bibilo yila “tartor u Aôndo” la kpaa ér “tartor u sha,” sha ci u ngu hemen sha. (Marku 1:14, 15; Mateu 4:17) Akaa agen a ugomoti mba uumace ve eren la zua sha akaa a Tartor u Aôndo u eren la, kpa Tartor u Aôndo gema hemba ugomoti mba uumace sha igbenda kpishi.

  • Mbahemen. Aôndo tsua Yesu Kristu ér a lu Tor u Tartor na shi a na un tahav hemba hanma orumace u nan hemen cii. (Mateu 28:18) Yesu er tom a tahav mbu i ne un la sha gbenda u dedoo, nahan a tese ken igbar ér un ngu Orhemen u jighjigh man u lun a mhôônom ma zungwen. (Mateu 4:23; Marku 1:40, 41; 6:31-34; Luka 7:11-17) Sha iniezwa i Aôndo yô, Yesu tsua ior ken hanma ikyurior ér ve yem sha, ve za “tema tor sha tar” vea a na imôngo.—Mpase 5:9, 10.

  • Shighe. Gomoti u uumace ngu a va shi a yem, kpa Tartor u Aôndo yô, “u ua gba mayange ga.”—Daniel 2:44.

  • Mba ve lu sha ikyev i gomoti la. Hanma or u nan eren ishima i Aôndo cii nana lu sha ikyev i Tartor u Aôndo, nana due ken nyityô tar je kpaa.—Aerenakaa 10:34, 35.

  • Atindi. Atindi a Tartor u Aôndo u we la ka a kura se sha u palegh kwaghbo tseegh tsô ga, kpa ka a wase mba ve lu sha ikyev i Tartor shon la u seer lun a aeren a dedoo. Ikyav i tesen yô, Bibilo kaa ér: “Ter Aôndo wou A̱ doo u Ishima a Ishima you cii man a uma wou cii man a mfe wou cii. Ngun ka tindi u tamen man ka u hiihii kpaa. Man u sha uhar u a lu er un yô, or u nan we ndor a we yô, nana̱ doo u ishima er we iyol you nahan.” (Mateu 22:37-39) Mba ve lu sha ikyev i Tartor la cii Aôndo man mbawanndor a ve doo ve ishima, nahan mba keren kwagh u dedoo sha ci u ior mbagenev.

  • Ityesen. Tartor u Aôndo ka u tesen mba ve lu sha ikyev i u la aeren a dedoo, shi u tese ve er vea er ve vea lu a aeren shon la kpaa.—Yesaia 48:17, 18.

  • Awashima u Tartor la. Mbahemen mba ken Tartor u Aôndo mba mbien mba ve tem tor sha a ve la sha er vea hingir mbanyarev ga. Kpa vea gema vea va kure awashima u Aôndo a lu a mi la. Awashima ne kua ityendezwa i a er ér mba un doo ve ishima cii vea va lu ken paradiso shin tar gbem sha won la kpaa.—Yesaia 35:1, 5, 6; Mateu 6:10; Mpase 21:1-4.