Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Ka a Kaa Ér I Mar Or Hegh Nahan, Mba Ôron Ér Nyi?

Ka a Kaa Ér I Mar Or Hegh Nahan, Mba Ôron Ér Nyi?

Mlumun u Bibilo i ne yô

Bibilo ter ishember i “mar or hegh” la sha u pasen gbenda u Aôndo a eren kwagh a uumace mbagenev yô. (Yohane 3:3, 7) Or u i mar nan hegh yô, ka or u Aôndo a ngohol nan nan hingir wan na yô. (Mbaromanu 8:15, 16; Mbagalatia 4:5; 1 Yohane 3:1) Mba Aôndo a ngohol ve nahan la ka ve hingir u lun vea na sha inja i ter a wan, vough er uumace mbagenev mba ior ka ve tôô ve ve hingir ônov vev sha tindi la kpa, kwagh ve ka a lu nahan.—2 Mbakorinte 6:18.

Er nan ve ka i mar or heghe?

Yesu yange kaa ér: “Saa á mar or hegh, gayô, nana fatyô u nengen [a] tartor u Aôndo ga.” (Yohane 3:3) Kwagh ne tese ér ka a maren or hegh yô, mba wan nan agoyol u za teman tor vea Kristu sha Tartor u Aôndo. Tartor ne ngu sha, u gema ngu hemen tar, sha nahan yô, Bibilo ôr kwagh u ‘maren or hegh’ la ér ka gbenda u nan ior dyako u i “koso un Sha” yô. (1 Peteru 1:3, 4) Ka a mar or hegh yô, i pase nan wang ér ka u nana va “ya tor” a Kristu imôngo.—2 Timoteu 2:12; 2 Mbakorinte 1:21, 22.

Ka i mar or hegh nena?

Shighe u Yesu lu ôron kwagh u maren or hegh la, a kaa ér mba i mar ve hegh mbara vea lu ior mba i ‘mar ve sha mnger kua jijingi’ yô. (Yohane 3:5) Inja na yô, ka u eren or batisema u shin mnger cii man shi a va er nan batisema u sha icighan jijingi la ye.—Aerenakaa 1:5; 2:​1-4.

Ka Yesu a lu or u hiihii u yange i mar un hegh ye. Yange i er un batisema shin Ifi u Yordan, mba been yô, Aôndo shighe un mkurem, shin tsegha un (shin er un batisema) sha icighan jijingi. Yesu maa hingir or u i mar un hegh, u hingir wan u Aôndo ken jijingi, shi lu a ishimaverenkeghen i hiden yemen za lun sha yô. (Marku 1:9-11) Aôndo yange va kure ishimaverenkeghen i Yesu lu a mi ne shighe u nder un shin ku a iyol i ken jijingi la.—Aerenakaa 13:33.

Mbagenev mba i mar ve hegh la kpa ka i er ve batisema shin mnger cii man i va mase tseghan ve sha icighan jijingi ye. * (Aerenakaa 2:38, 41) Maa ve lu a ishimaverenkeghen i za lun uma sha, ishimaverenkeghen i Aôndo una va kure shighe u a nder ve shin ku la.—1 Mbakorinte 15:42-49.

Mbamtsum mba sha kwagh u maren or hegh

Mtsum: Saa a mar or hegh keng ve nana zua a myom shin nana lu Orkristu ye.

Mimi: Ka mba i mar ve hegh, mba vea za tema tor vea Kristu sha la tseegh naagh ku Kristu kura ku yiman ve ga, mba vea lu shin tar sha ikyev i Tartor u Aôndo la kpa naagh ku shon ku yiman ve. (1 Yohane 2:1, 2; Mpase 5:9, 10) Mba ve lu ken kwe u Mbakristu u sha uhar ne, mba a ian i va lun uma gbem sha won ken Paradiso shin tar.—Pasalmi 37:29; Mateu 6:9, 10; Mpase 21:1-5.

Mtsum: Or a fatyô u tsuan iyol i nan ér i mar nan hegh.

Mimi: Hanma or cii yô, nan ngu a ian i civir Aôndo shi zuan a myom. (1 Timoteu 2:3, 4; Yakobu 4:8) Nahan cii kpa, ka Aôndo ka a tsua or u a mar nan hegh, shin a tsegha nan sha icighan jijingi ye. Bibilo kaa ér u maren or hegh la “ka kwagh u or u i sar nan la shin or u nan nenge ngegh la ga, kpa ka sha mhôônom ma Aôndo.” (Mbaromanu 9:16) Ishember i “mar or hegh” la, ka i gema i sha gbenda ugen kpaa, ér “mar or sha,” nahan tese je ér ka “sha” shin hen Aôndo ka i tsua or u a mar nan hegh ye.—Yohane 3:3, NW.

^ par. 9 Ka Korneliu kua mbagenev mba ve lu a na la tseegh yange kwagh ve lu nahan ga ye.—Aerenakaa 10:44-48.