Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Yange I Nder Yesu Shin Ku Nahan, Lu ken Iyol i Inyam man Awambe Shin Lu ken Iyol i Jijingi?

Yange I Nder Yesu Shin Ku Nahan, Lu ken Iyol i Inyam man Awambe Shin Lu ken Iyol i Jijingi?

Mlumun u Bibilo i̱ ne yô

Bibilo ôr kwagh u Yesu ér, “iyol Na yô, i wua i kpa i shi i na Un uma [i nder un shin ku] sha Jijingi.”—1 Peteru 3:18; Aerenakaa 13:34; 1 Mbakorinte 15:45; 2 Mbakorinte 5:16.

Kwagh ugen u Yesu iyol na ôr yô tese ér lu u a nder un shin ku ken iyol i inyam man awambe ne ga. Yange kaa ér una na “iyol [na] je, sha ci u uma u tar,” i hingir ipaan sha ci u uumace. (Yohane 6:51; Mateu 20:28) Yange una hidi una lu ken iyol i inyam man awambe ne yô, ma lu inja er a na nagh sha iyol na shon, kpa a hide a ngohol yô, nahan ma wase ga. Nahan kpa, lu u kwagh ne una fatyô u eren ga, sha ci u Bibilo kaa ér yange na nagh sha iyol na i inyam man awambe la “kwa môm vough.”—Mbaheberu 9:11, 12.

Shighe u i nder Yesu shin ku la, yange una lu ken iyol i jijingi nahan, mbahenen nav ma nenge a na kpa?

  • Mbatyomov mba ve lu ujijingi la vea fatyô u geman lun ken iyol i uumace. U tesen ikyav yô, mbatyomov mba yange ve er kwagh ne sha ayange a tsuaa la, ya kwaghyan shi ma kwagh vea uumace imôngo je kpaa. (Genese 18:1-8; 19:1-3) Nahan kpa, ve lu mbatyomov her shi ve fatyô u hiden geman ken iyol i jijingi.—Mbaajiriv 13:15-21.

  • Yesu kpa zum u i nder un shin ku kera la, gema ken mlu u iyol i orumace hen anshighe kpuaa, vough er mbatyomov vande eren nahan. Nahan kpa, er a lu ortyom yô, yange a za ande hen ape mbahenen nav ve lu yô, a kuman un yô, a gba been her tsô. (Luka 24:31; Yohane 20:19, 26) Iyol i inyam man awambe i yange lu geman ker anden hen mbahenen nav sha ashighe kposo kposo la lu kwaghmôm ga. Sha nahan yô, mba yange ve lu azende a Yesu je kpa kav un sha kwaghôron man ieren na tseegh.—Luka 24:30, 31, 35; Yohane 20:14-16; 21:6, 7.

  • Zum u Yesu ande hen apostoli Toma la, yange gema ken iyol i lun a avav a tse. Yange er nahan sha u Toma a na jighjigh yô, sha ci u Toma lu tunan ér i nder Yesu shin ku ga.—Yohane 20:24-29.