Aver yem sha atineakaa

Mbashiada mba Yehova

Tsua Zwa Tiv

Aôndo Ngu a Iti Jee?

Aôndo Ngu a Iti Jee?

Mlumun u Bibilo i ne yô

Hanma orumace cii nan ngu a iti. Doo u Aôndo kpa una lu a iti gaa? Azende nga ye ati shi nga yer ayol a ve sha ati shon kpaa. Kape mlu wase vea Aôndo kpa i doo u una lu la ga he?

Aôndo ôr kwagh na ken Bibilo ér: “Ka Mo [Yehova], ka iti yam je ne.” (Yesaia 42:8) Ka mimi, Aôndo ngu a atiatom ngee, amba er, “Aôndo uhembanagee,” “TER” man “u A gbe akaa cii la” nahan. Kpa a na mbacivir un cii icivir sha u kaan a ve ér ve yilan un sha iti na kpôô kpôô.—Genese 17:1; Aerenakaa 4:24; 1 Peteru 4:19.

Mba mgem mba Bibilo kpishi nger iti i Aôndo ken Ekesodu 6:3. Ivur la kaa ér: “M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.

Yehova ka iti i Aôndo sha myer u ken zwa Tiv u i yer anyom anyom yô. Shin er mbafaantakerada mbagenev ve hembe ngeren ér “Yawe” nahan kpa, Yehova ka sepelin u i hembe fan tar sha won cii yô. Vegher u hiihii u Bibilo (Ikyuryan i Tse) cii yange i nger ken zwa Heberu, man kwaghngeren u ken zwa ne yange hiin ken iyan hiden a hide ken imese. I nger iti i Aôndo ken zwa ne sha asangaabaacaa anyiin ér יהוה. I gema asangaabaacaa a anyiin a ken zwa Heberu ne ér YHWH. Mba yer a ér Tetragrammaton.