Aver yem sha atineakaa

Mbashiada mba Yehova

Tsua Zwa Tiv

Ican i Icôronuange—Bibilo Ia Fatyô u Wasen Je He?

Ican i Icôronuange—Bibilo Ia Fatyô u Wasen Je He?

Mlumun u Bibilo i ne yô

Een. Aôndo wa ikyo sha kwagh u mbacivir un mba ve gbe angev la. Bibilo ôr kwagh u or u nan civir Aôndo sha mimi yô, ér “TER Una suwe nan sha gambe u nan u uange.” (Pasalmi 41:3) Aluer u ngu a icôronuange yô, akaa a atar a i ter shin heen ne aa wase u u wan ishima a mi:

  1. Sôn Aôndo a̱ na u agee a wan ishima. U fatyô u zuan a “bem u Aôndo u a gande hanma mfe wase cii,” u una na ishima a kera nyian we ga shi una za hemen u taver we zum u u lu yan ican kpaa yô.—Mbafilipi 4:6, 7.

  2. De yen ishima ga. Bibilo kaa ér: “Ishima i saan saan ka icigh ki dedoo, kpa ishima i yinan yô, i om akuhe.” (Anzaakaa 17:22) Ôron akaa a hômon, sha ci u ka wea seen yô, ishima i kera vihin we ga shi i kundu u iyol kpaa.

  3. Lu a ishimaverenkeghen sha kwagh u mlu wou u ken hemen la. Aluer u ngu a ishimaverenkeghen wer mlu wou una va doo ken hemen yô, a saan we iyol, wea gba icôronuange je kpaa. (Mbaromanu 12:12) Bibilo tsengapasen ér ken hemen yô, “ma or u nan tem [sha tar] nana kera kaa er: Kwagh nyoon mo, ga.” (Yesaia 33:24) Sha shighe la, Aôndo una bee a iangev mbi bov mbi mbi hembe mbatwerev u sôron hegen la cii. U tesen ikyav yô, Bibilo pase er ken hemen se va kera been iyol ga, orbeenyol nana hide a hingir hegh yô. I̱ kaa ér: “Zum la inyam i nan ia hingir hegh á hemba i wanye kpaa; nana hide nana hingir er sha ayange a nan lu iyev la yô.”​—Yobu 33:25.

Fa kwagh ne: Mbashiada mba Yehova fa er Aôndo a wasen ve u wan ishima a angev yô, kpa shi mba keren igbenda i sôron uicôronmbauangev kpaa. (Marku 2:17) Nahan kpa, se mba tsuan ma twersôron sha ci u or ga; se nenge ser doo u hanma or nana tsua gbenda u sôron angev mbu nan iyol i nan.