Aver yem sha atineakaa

Bibilo Tese Ér Or Ka Nana Kpe yô, I Hide I Mar Nan ken Iyol Igene?

Bibilo Tese Ér Or Ka Nana Kpe yô, I Hide I Mar Nan ken Iyol Igene?

Mlumun u Bibilo i ne yô

Ei, i̱ tese nahan ga. Bibilo ter ishember i “hide mar or ken iyol igen” shin i ôr kwagh u tesen ér or ka nana kpe yô, i hide i mar nan ken iyol igen tsô kpaa ga. Ityesen ne har sha jighjigh u ior ve ne ér uma kpen ga la. * Nahan kpa, Bibilo tese ér ka or jimin cii i yer nan ér uma ye, sha nahan yô, uma kpen. (Genese 2:7; Esekiel 18:4) Or ka nana kpe yô, nan kera lun uma mape môm ga.—Genese 3:19; Orpasenkwagh 9:5, 6.

Ityesen i i kaa ér or ka nana kpe yô, i hide i mar nan ken iyol igen la, i kaha kposo a kwagh u mnder u shin ku nena?

Kwagh u Bibilo i tese sha kwagh u mnder u shin ku la har sha kwagh u i kaan ér uma kpen ga la ga. A va nder ior mba ve kpe la shin ku vea hide a lu uma sha tahav mbu Aôndo. (Mateu 22:23, 29; Aerenakaa 24:15) Kwagh u mnder u shin ku la na se ishimaverenkeghen i doon tsung ér a va nder ior shin ku vea hide a lu uma ken tar u he u perapera, shi a kera lu u vea kpe mayange ga.—2 Peteru 3:13; Mpase 21:3, 4.

Mbamtsum mba ior ve lu a mi sha kwagh u ityesen i i kaa ér or ka nana kpe yô, i hide i mar nan ken iyol igen, man kwagh u Bibilo i kaa yô

Mtsum: Bibilo kaa ér yange i hide i mar Eliya hingir Yohane u Eren Batisema.

Mimi: Aôndo yange tsengapasen ér: “Tindim Yam ne a profeti Eliya,” shi Yesu va tese ér kwaghôron u profeti ne yange kure sha Yohane u Eren Batisema. (Malaki 4:5, 6; Mateu 11:13, 14) Nahan kpa, kwagh ne tese ér ka Eliya je yange i va hide i mar un lu Yohane u Eren Batisema ga. Yohane iyolna kpa yange kaa ér un ngu Eliya ga. (Yohane 1:21) Kpa gema ka Yohane ne yange er tom u u lu kwaghmôm a tom u Eliya yange er la ye; ka tom u pasen ior loho u Aôndo shi kaan a ve ér ve gema asema je la. (1 Utor 18:36, 37; Mateu 3:1) Shi Yohane ne yange lu a ishimataver man agee er Eliya nahan.—Luka 1:13-17.

Mtsum: Ka ityesen i i kaa ér or ka nana kpe yô, i hide i mar nan ken iyol igen la je Bibilo i er kwagh u i ér ka u ‘maren or hegh’ ye.

Mimi: Bibilo tese ér mmar u he la ka mmar u ken jijingi, u ka i mar or shighe u nan lu uma her la je yô. (Yohane 1:12, 13) Mmar ne ka mtsaha u i gbe u or nana ya keng sha ci u akaabo a yange nan vande eren ken ijime la ga, kpa ka iveren i Aôndo a ne mba ve lu a ishimaverenkeghen i va zuan a iyua i doon tsung ken hemen yô.—Yohane 3:3; 1 Peteru 1:3, 4.

^ par. 3 Jighjigh u ior ve ne ér uma kpen ga, shi or ka nana kpe yô, i hide i mar nan ken iyol igen la yange hii ken Babilon u tsuaa la je. Shighe kar yô, mbafantakerada mba ken tar u India va due a ityesen igen, i yilan ér Karma. Takerada ugen (Britannica Encyclopedia of World Religions) kaa ér Karma ka ityesen i i har sha “tindi u igbetar u a kaa ér kwagh gbe eren ga la, man tindi ne gema pase ér ka kwagh u or nan lee ken uma u hegen ne shi ka nan va sunda ken uma ugen u nana va lu la ye.”—Nenge Peeji 913.