Mlumun u Bibilo i ne yô

 Bibilo ôr akaa kposo kposo kua aeren a ior vea lu a mi hen shighe u ‘mkur u tar ne a zurum’ shin hen shighe u ‘mkurtar’ ne yô. (Mateu 24:3; Icighan Bibilo) Bibilo yila shighe ne ér “ayange a masejime” kua “shighe u mkur” man ‘shighe u mkurtar’—2 Timoteu 3:1; Daniel 8:19.

Ka akaaôron a profeti a nyi Bibilo i ôr sha kwagh u “ayange a masejime?”

 Bibilo yange i tsengaôron akaa kpishi aa kohol aa lu “ikyav” i tesen ér se mba ken ayange a masejime yô. (Luka 21:7) Se nenge ase akaa ne agen:

 A lu nôngon ityav sha ajiir kposo kposo sha tar. Yesu yange tsengaôron ér: “Ikyurior igen ia mough ityav a ikyurior igen, tartor ugen kpaa ua mough ityav a tartor ugen.” (Mateu 24:7) Heela tseegh ga, Mpase 6:4 kpa yange tsengaôron kwagh u orgen u henda nyinya, man ikyav i kwagh shon i gem i lu ityav mbi mbia ‘tôô bem sha tar kera’ yô.

 Ijen. Yesu yange tsengaôron ér: “Ijen ia gba.” (Mateu 24:7) Takeda u Mpase kpa yange u tsengaôron kwagh u orgen u henda nyinya, man ikyav i kwagh shon yô, i lu ijen i ia gba sha ajiir kposo kposo sha tar yô.—Mpase 6:5, 6.

 Ityartenger i vesen. Yesu yange kaa ér “ityartenger i vesen ia lu . . . sha ajiir kposo kposo.” (Mateu 24:7; Luka 21:11) Ityartenger i vesen ia lu tenger sha ajiir kposo kposo sha tar ne ia na ior kpishi vea ya ican shi mbagen kpishi ia wua ve.

 Iangev. Yesu yange kaa wener, ubombauangev vea lu shin iangev mbi cieryol mbia ta ijar.—Luka 21:11.

 Ifer. Er ior ve lu vanden eren afer sha tar ica i gbe nahan kpa, Yesu yange tsengaôron ér ken ayange a masejime yô, “ifer ia lu seer a seer.”—Mateu 24:12.

 Mba vihin tar. Mpase 11:18 yange tsengaôron ér uumace vea lu “vihin tar.” Vea er kwagh ne sha igbenda kpishi je, a lu sha ipila kua anyighe man aferakaa agen tsô ga, kpa vea lu vihin ikyasen u haregh u tar ne la kpaa.

 Aeren shin anza a bo aa lu seer a seer. Ken 2 Timoteu 3:1-4 la, Bibilo yange i tsengaôron ér ior vea lu “mba wuese kwagh ga man mba eren kwagh a ior sha mimi ga, . . . man mba lumun u gban zwa môm a mbagenev sha ma kwagh ga, man mba vihin ior iti man mbakôron iyol ve tsaha ga, man mbatoron-asema man mba soon kwagh u dedoo ga, man mba eren kwagh a azende a ve sha mimi ga, man mba norom sha kwagh, man mbakenden a iyol sha.” Yange i tsenga ôron ér ior vea lu a aeren shin anza ne kpshi je yô, Bibilo maa yila shighe shon ér “ashighe a bo aa . . . uma una taver” yô.

 Mvihi u Tsombor. Bibilo yange i tsenga ôron ken 2 Timoteu 3:2,3 la ér ior kpishi vea lu “mba lun a dooshima” sha icombor ve ga, shi mbayev kpa vea lu “mba hemban mbamaren vev ato.”

 Ior vea lu soon kwagh u Aôndo ga seer a seer. Yesu yange tsenga ôron ér: “Dooshima u ior kpishi una ndôhôr.” (Mateu 24:12) Yesu yange lu kaa ér ior kpishi Aôndo una kera doo ve ishima ga. Shi 2 Timoteu 3:4 kpa kaa ér ken ayange a masejime yô, ambaaior a “soon u keren msaanyol ve tseegh, kpa Aôndo yô a doo ve ishima ga” la aa lu.

 Imanger i Ukwaghaôndo. Bibilo yange i tsenga ôron ken 2 Timoteu 3:5 ér sha ashe yô, ior vea lu er ka mbacivir Aôndo nahan, kpa vea gema a lu kuran atindi a Aôndo ga.

 A lu seer zuan a iwanger shin kaven akaaôron a profeti a Bibilo. Takeda u Daniel yange u tsenga ôron ér sha “shighe u mkur” la, ior kpishi vea seer zuan a mfe u mimi u Bibilo i tese la, shi kaven akaaôron a profeti shon kpaa vough—Daniel 12:4, ngeren u shin kpe.

 Tom u pasen kwagh sha tar. Yesu yange tsenga ôron ér: “A pase loho u dedoo u Tartor ne a tser tar.”—Mateu 24:14.

 Mba wan kwagh ikyo ga man ior mba nahan tar vea ta ijar. Yesu yange tsenga ôron ér ior kpishi kwagh a gba ve sha ikyav i i tese wang ér mkur zurum ne ga. (Mateu 24:37-39) Heela tseegh ga, 2 Peteru 3:3, 4 yange tsenga ôron ér mbagen je yô, vea hure kwagh la kera, vea lu nahan tar kaan ér ka ikyav i kwagh ga.

 Akaaôron a profeti cii aa kure sha mi. Yesu yange kaa ér, ken ayange a masejime ne, akaaôron a profeti ne cii aa lu kuren sha mi hen icin môm yemen, a lu di a kpuaa shin agen kpishi tsô ga —Mateu 24:33.

Se mba ken “ayange a masejime”?

 Een. Akaa aa lu eren shin tar la kua akaa aa er sha ashighe a Bibilo yange i tsenga ôron vough vough la tese ér ayange a masejime ne yange hii ken inyom i 1914, inyom shon i yange i hii u nôngon Ityav mbi Tar Cii mbi Hiihii la. Wea soo u nengen er akaa aa lu eren shin tar la a tese ér se mba ken ayange a masejime yô, nenge vidio i i lu heen ne:

 Ken inyom i 1914 la, Tartor u Aôndo di hii u hemen sha, man kwagh u hiihii u yange u hii eren yô, yange u zenda Satan Diabolo man azôv a na cii sha, u haa ve shin tar ne. (Mpase 12:7-12) Gbenda u Satan a lu tuur ior ken ijime ér ve er akaa la, se fatyô u nengen a mi wang sha anza a bo a ior ve lu a mi la kua akaa a ve eren aa ne ve ayange a masejime ne a lu ‘ashighe a bo shi uma taver’ yum yô—2 Timoteu 3:1.

 Ior kpishi ishima ka shi nyian ve sha kwagh u ashighe a bo ne. Ishima ka i za ve iyol kpishi er ior ve kera lu fantyô u lun imôngo ga yô. Mbagen je yô, mba cian gighir gighir ér alaghga uumace vea va hide a tim mbagen kuaa.

 Nahan cii kpa, mbagen mba ve kpa mlu u tar ne a due ve ishima la mba a ishimaverenkeghen ér a va doo ken hemen. Ve na jighjigh ér ica a gba ga tsô Tartor u Aôndo ua bee a mbamzeyol mba tar kera vindi vindi. (Daniel 2:44; Mpase 21:3, 4) Mba wan ishima keghen Aôndo ér a va kure uityendezwa nav shi mkaanem ma Yesu man ka ma sur ve ishima kpishi. Yange kaa ér: “Ka or u nan taver ishima zan zan mkur la a yima nan ye.”—Mateu 24:13; Mika 7:7.