Aver yem sha atineakaa

Mbashiada mba Yehova

Tsua Zwa Tiv

Ka Unô Yange Ve Lu Akôraior Laa?

Ka Unô Yange Ve Lu Akôraior Laa?

Mlumun u Bibilo i ne yô

Akôraior la lu anomaior, mbayev mba mbatyomov mba wan tswam mar vea ônkasev mba iorov, sha ayange a Noa la. *

Bibilo kaa ér “ônov mba Aôndo nenge ônkasev mba iorov doo ashe.” (Genese 6:2) “Ônov mba Aôndo” mbera yange ve lu ior mba ken jijingi mba ve hemba Aôndo ato shighe u “ve undu ijiir ve i teman” sha, ve gema ve tôô iyol i uumace, man “ve er kasev mba sha asema a ve cii” la.—Yuda 6; Genese 6:2.

Ônov mba mbatyomov man ônkasev mba iorov mba ve zua ivese i sha gbaaôndo ga la mar ne, gba lun ônov di nahan tsô ga. (Genese 6:4) Akôraior ne lu anomaior a anger ior, a wan tswam, a yange na ipila iv shin tar yô. (Genese 6:13) Bibilo ôr kwagh ve kaa ér, yange ve “lu ior mba ageev, mba sha ayange a ngise la, mbaduenati je.” (Genese 6:4) Yange ve va kera lu ga kpa, ior za hemen a ieren ve i tan ior mciem iyol shi eren ipila la.—Genese 6:5; Numeri 13:33. *

Mtsum u sha kwagh u Akôraior la

Mtsum: Akôraior nga uma sha tar zan zan nyian.

Mimi: Yehova yange na mngerem ma deemee ma va tim tar u wan tswam, u sha ayange a tsuaa la cii kera. Yange i tim Akôraior la cii kera kua ior mba wan tswam mbara kpaa. Nahan kpa, Noa vea tsombor na yô, kwagh ve doo Yehova ishima, nahan lu ve tseegh i yima ve sha shighe la ye.—Genese 6:9; 7:12, 13, 23; 2 Peteru 2:5.

Mtsum: Yange lu uumace ve mar Akôraior la ye.

Mimi: I yila uter vev ér “ônov mba Aôndo.” (Genese 6:2) Bibilo yila mbatyomov sha iti i ônov mba Aôndo la. (Yobu 1:6; 2:1; 38:7) Mbatyomov yange ve lu a tahav mbu geman hingir uumace. (Genese 19:1-5; Yosua 5:13-15) Apostoli Peteru ôr kwagh u ‘ujijingi mba ve lu ken uikyangen la érka ve mba ngise ve lu hemban ato zum u Aôndo lu wan ishima sha ayange a Noa’ la. (1 Peteru 3:19, 20) Yuda u un kpa a nger Bibilo la, shighe u lu ôron kwagh shon môm môm la, a pase ér mbatyomov mbagenev, “ve kera wa ikyo sha tahav vev mbu i ver ve sha mi hiihii la ga, ve undu ijiir ve i teman” la.—Yuda 6.

Mtsum: Akôraior la lu mbatyomov mba ve sen sha yô.

Mimi: Avur a akase Genese 6:4 la tese ér Akôraior la lu mbatyomov ga, kpa lu ônov mba mbatyomov mba ve gema ve hingir uumace ve mar vea ônkasev mba iorov la. Mbatyomov yange “ve er kasev mba sha asema a ve” mba been kera yô, Yehova kaa ér, ken atô u anyom 120 una er kwagh sha u timin tar u mba ve fa Aôndo ga la. (Genese 6:1-3) Kwaghôron u Bibilo la shi kaa ér “sha ayange la,” mbatyomov mba ve gema ve hingir uumace la, “tsa a ônkasev mba iorov,” nahan ve mar “ior mba ageev, mba sha ayange a ngise la.” Ka Akôraior je la.—Genese 6:4.

^ par. 3 Iti i ken zwa Heberu i i gem ér “Akôraior” la inja na yô, alaghga a lu “Mbanan Mgbe.” Bibilo i i yer ér, Wilson’s Old Testament Word Studies la kaa ér, iti la ngi ôron kwagh u “mba ve daan ior ve taan inya sha apera shi ve iin ve, nahan ior mbara ve hingir u gban” la.

^ par. 5 Ikyav tese ér mbamkerev mba ken Mbaiserael mba i er kwagh ve ken Numeri 13:33 la, yange ve nenge a ior mba indi ve umbur ve kwagh u Akôraior a a kpe kera anyom uderi imôngo ken ijime la.—Genese 7:21-23.