Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Aluer Mba Meen Mo Ér M Yav a Or di Ye?

Aluer Mba Meen Mo Ér M Yav a Or di Ye?

Alaghga u pine wer: “Hemba doon u gban eren tsô gaa? Kera kpa ior cii mba eren nahan gaa?”

Hide hen ase sha mi!

Kwagh u a lu u mimi yô: Ka hanma or nan lu eren nahan ga.

Ka mimi alaghga u ungwa er ior kpishi ve lu eren nahan yô. U tesen ikyav yô, kwaghtôvon u ken tar u Amerika tese ér ken atô u mbayev 3 mba ve bee kôleeji yô, mbayev 2 ker ka ve yav a or. Nahan kpa, kwagh la shi tese ér wanye 1 ken mbayev 3 mbara nan eren nahan ga. Kwagh ne ka ingyegh ki vesen je.

Mba ve gem ve yav a ior la di ye? Mbatôvon sha akaa kav ér amba la ka a nôngo u tagher a môm ken mbamzeyol mba ve dondo shin heen mban keng.

Ishima i nan ibo. Mbayevikyaior kpishi mba yange ve yav a or shighe u ve lu a er ivese ga la kaa ér, yange ve hide ve vaa afanyô.

Aluer u ngu yaven a or shighe u u lu a er ivese ga yô, ka inja er u tôô foto u dedoo u ver hen hunda hingir we kwagh u ndyaren angahar nahan

U banen or a jighjigh. Ka vea yaven a ayol a ve cii yô, hanmô ve nan hide nan gba henen ér ‘Shin ka an ugen kpa nan yav a na-o?’

Ahenge a van. Mbayevkasev ka ve hemba soon or u nana kura ve, nana hee ve a hee ga yô. Shi mbayevnomso kpishi ka ve kera soo kwagh u wanyekwase u nan lumun ér ve yav a nan la ga.

Jindikwagh: Iyol you ngi a inja kpishi, ka u u gba nan kera ga. Nahan tese wer u ngu a tahav mbu eren kwagh dedoo sha u dondon kwaghwan u Aôndo sha kwagh u idya. Nahan yange u vôso kwase shin nom tsô u yav a nan. Shighe la u kera nyôr ken mbamzeyol kua ishimanyian man afanyô a vaan, a ijimba i eren i ve a mi la ga.—Anzaakaa 7:22, 23; 1 Mbakorinte 7:3.