Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

MBAMPIN MBA AGUMAIOR A PINEN LA

Ka Nyi Me Er sha Akaa a Me Tagher a Mi Shighe u M Hii u Hian Laa?

Ka Nyi Me Er sha Akaa a Me Tagher a Mi Shighe u M Hii u Hian Laa?

“Wanyekwase ka nana hii u hian i yina nan ga. Ishima ka i vihi u ker, shi uma a taver we, shi u fa kwagh u u lu sha mi jighilii ga. Mgem ne doo sha ma gbenda môm tsô kpaa ga!­”​—⁠Mkaanem ma Oksana, gumkwase ugen.

“Yange m saan miniti môm, ugen di m ure. M fa ga, shin kape ken mbayevnomso kpa i lu la-o? Ken mô yô, ka nahan.”​—⁠Mkaanem ma Brian, gumkwase ugen.

Ka wea nguren hian or yô, i lu u er u ngu tan lilo nahan. Ka wea zungur sha mi la i doo u, kpa shi i cier we iyol! U er nena sha akaa a doon man a vihin a iyol you i lu geman ve u lu tagher a mi laa?

  • Ka i hii u hian nena?

  • Akaa a ka a gema sha iyol la

  • Ishima i vihin fele fele

  • Kwagh u u er yô

Ka i hii u hian nena?

Shighe u u hii u hian la, ka shighe u mluashe wou kua mlu wou u ken ishima cii ka a hii u vian seer fele fele zan zan u va mase wan ikyondo yô. Hen shighe ne, iyol you ka i geman ken atô kua ken won fele fele sha u wan we agoyol sha er u fatyô u tseren tsombor shin maren wan yô.

Aluer u ar sha iaven ne kpa, u ngu a kuma u lun ormaren ve ga. Mbamgem mban ka ve tesen wer ér u kar iaven i wanye la. Ka wea nengen nahan yô, shighe ugen i doo u, kpa shighe ugen di ishima i vihi u ker.

Ikyaren: Ken anyom a i tese shin heen kposo kposo ne, tsua agen ker, a u nenge wer wanye ka nana ar sha mi ve nan hii u hian la.

  • 8

  • 9

  • 10

  • 11

  • 12

  • 13

  • 14

  • 15

  • 16

Ansa: Anyom ne cii ka anyom a i tôv i fe ér mbayev ka vea va ar sha mi ve ve hii u hian yô.

Kwagh ne tese ér aluer u zurum anyom pue kar ataan man u ngu a hii u hian ga kpa, ishima i de nyian we joo ga, shin aluer u ngu a nyôr anyom pue ga tsô maa u hii kpa, i de ze u iyol ga. Kwagh la ngu a shighe na. Ka a va kuman je iyol you i hii u geman, wea soo shin wea soo ga kpaa.

Ka wea nguren hian or yô, i lu u er u ngu nahan lilo nahan. Ka wea senen sha mi la i doo u, kpa shi i cier we iyol​—⁠kpa u fatyô u fan kwagh u u er sha akaa a doon man a vihin a u lu tagher a mi la yô

Akaa a ka a gema sha iyol la

Alaghga mgem u u hemba kaven ken iyol you shighe u hii u hian la yô, ka ivesen. Zayol u a lu ken kwagh ne yô, alegh a iyolough a ou agen ka a hemban vesen fele fele a agen. Nahan zum u iyol i leghem we ker ga kpa, ishima i de ze u iyol ga. Fa wer shighe a karen yô, hanma kwagh una hingir vough.

Akaa agen kpa ka a gema sha iyol i wanye shighe u nan hii u hian or la.

Shighe u mbayevnomso ve hii u hian yô:

  • Alegh a iyolough a ve a yaven a kwase la ka a vesen

  • Ka ve hii u menden ice ken kutsaha, man sha unwe, man sha aku-zwa, man shin gbem, kua ken a-ase

  • Ikyenge ve ka i gema

  • Ilyeghegh vev ki yaven a kwase la ka ki gba nôron shighe ugen tsô, shi tugh mbugen ve nyande mnyandem ma wan kwase iyav ken ikyondo

Shighe u mbayevkasev ve hii u hian yô:

  • Ka ve hii u van atumba

  • Ka ve hii u menden ice ken kutsaha man sha unwe

  • Ka ve hii u duen won

Mbayevnomso man mbayevkasev mba ve hii u hian cii:

  • Ka ve huma iyol, sha ci u ankaam mba umav mbagenev (bacteria) ka ve nungwa sha iusa ve.

    Kwagh ne una wase u: Wea huma iyol kpa iyolhuman you ia fatyô u been, aluer u ngu ôôn iyol fele fele shi haan akaa gayô shighen akaa a yangen iyolhuman shin iusa yô.

  • Mnyoholom ka ma due ve sha ishi kpuruaa, kua shin mon man ken ijime cii. Ka Bacteria mba ka ve hange shin atine a icee, sha ajiir a ahôm a kundu la ka ve na mnyoholom ma due nahan ye.

    Kwagh ne una wase u: Ka i taver kpishi u mnyoholom ma bee, kpa aluer u ngu ôôn ishigh fele fele shi shighen akaa a kiren we ishigh yô, kwagh la una wase u.

Ishima i vihin fele fele

Akaa a ka a va hii u zenden we ken awambe sha utaha ve iyol you i hii u geman shighe u u hii u hian or la, aa fatyô u nan we hang kpishi. Alaghga je yô ishima ia vihin we ker fele fele.

“Ka u hungwa sev mbugen u gbaa vaan tsô, kpernan u lu doo doo. Ishima ka i nyoon we miniti môm, miniti ugen di u za uve ken iyou, u gbaa yuen ker tsô.”​—⁠Mkaanem ma Oksana.

Agumaior kpishi ka aa nguren hian yô, ishima i za ve iyol tsung er ior cii mba nengen shi ôron akaa sha a ve nahan. Shi we iyol you kpa ka wea gema wea kenger mluashe wou er a lu geman fele fele nahan, ishima i doo u ga!

“Shighe u m hii u hian la, yange m tôô zege sheti m hua, m gbaa eren kwagh gbeemee. Shin er yange m fa kwagh u a ne ve mluashe wam lu geman nahan kpa, ishima doom ga shi lum er m hee nahan. Yange lum dang.”​—⁠Mkaanem ma Janice, gumkwase ugen.

Alaghga kwagh u vesen ugen u ishima you i a hii u henen sha mi yô, a lu kwagh u ishiôr.

“Yange kera lu mbayev nomso cii kwagh ve nyoon mo iyol ga. Mbagenev hii u doon mo ishima, shi m nenge mer ishiôr ka kwaghbo ga. Jighilii yô, kwagh u asôôr hingir mo kwagh u tan tadi sha mi vea mbagenev.”​—⁠Mkaanem ma Alexis, gumkwase ugen.

Agumaior agen ka aa nguren hian yô, mbayevnomso ve hii u soon kwagh u mbayevnomso mbagenev, shi mbayevkasev kpa ve hii u soon kwagh u mbayevkasev mbagenev. Aluer u hii u soon kwagh u orgen nahan kpa, de henen wer u ngu nomsoor u yaven a nomso, shin kwase u yaven a kasev ga. Ashighe kpishi ka i va kera lu u ken ishima nahan ga.

“Er yange m soo u tôôn iyol yam karen sha mbayevnomso mbagenev yum yô, m va hii u soon kwagh ve. Ka er yange m va hii u wan ikyondo nahan ve mbayevkasev va hii u doon mo ishima ye. Hegen ne isharen i yaven a mbayevnomso la kera ngi ken a mo ga.”​—⁠Mkaanem ma Alan, gumor ugen.

Kwagh u u er yô

  •  Nôngo u nengen a akaa a injaa a u va zua a mi la. Jighilii yô, akaa a ka a geman sha iyol yol kua ken ishima shighe u u lu hian la, ka a waan we agoyol sha akaa agen. Mkaanem ma orpasalmi Davidi man ma a fatyô u nan we ishimataver, ma kaa ér: “U erem m [ngu] kwagh u cieryol man u kpilighyol kpaa.”​—⁠Pasalmi 139:14.

  •  De tôôn iyol you karen sha mbagenev ga, shi de haren ishima sha kwagh u mluashe wou ga. Bibilo kaa ér: “Or nengen mluashe u ken won, kpa TER yô, nengen ken ishima.”​—⁠1 Samuel 16:⁠7.

  •  Eren anumbe shi yaven tsembelee. Aluer u yav tsembelee u va nder yô, u pande ishimavihin man ijungwen shi a lu u iyol tsevaa.

  • De henen sha akaa a nan we ishimavihin ga. Hanma or nan ngu kenger we er u henen nahan mimii? Aluer ior mba kenden alam sha kwagh u mluashe wou je kpa, we yô, de nengen wer kwagh u a lu zan hemen sha iyol you la ka kwaghbo ga. Bibilo kaa ér: “De we ikyo sha akaa a i lu ôron la cii ga.”​—⁠Orpasenkwagh 7:21.

  • Hen u kighir isharen i yaven a or i i lu ken a we la, sha er u eren sha i ga yô. Bibilo kaa ér: “Yevese nen idya. . . . Or u eren idya yô, ka iyol i nan je nan eren i kwaghbo ye.”​—⁠1 Mbakorinte 6:18.

  • Ôr ormaren wou gayô organden u u ne nan jighjigh yô. Ka mimi, alaghga sha hiihii la kunya a kôr u u ôron or. Kpa iniôngon you la ia va u a mtsera kpishi.​—⁠Anzaakaa 17:17.

Jindikwagh: Ka wea hian or yô, u tagher a mbamtaver kpishi. Shi kwagh ne ka a bugh u ian i dedoo i vesen hingir or u wan ikyondo sha iyol man ken ishima shi vian ken jijingi kpaa.​—⁠1 Samuel 2:26.