Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

MBAMPIN MBA AGUMAIOR A PINEN LA

Gba u Me Ver a Ver Ityogholov mbi Me Ungwa Yôô?

Gba u Me Ver a Ver Ityogholov mbi Me Ungwa Yôô?

“Ka mea waan iyol i duen kpa m wa ityogholov m ungwan. Mea lu shin mato kpa m wa ityogholov. Mea tema hen ya mea memen, shin mea sôron iyou ker, shin mea ôron takerada kpa m ungwan ityogholov. Hanma shighe cii yô, ka m ungwan ityogholov.” ​​—⁠Mkaanem ma Carla, gumkwase ugen.

We kpa u soo ityogholov er carla nahana? Aluer ka nahan yô, ngeren ne una wase u u zuan a mbamtsera mba ve lu ker la, shi palegh kwaghbo u a lu ker la kpaa, shi tsuan ityogholov sha kwaghfan.

  • Mbamtsera mba ve lu ker la

  • Kwaghbo u a lu ker la

  • Kwagh u mbakwar wou ve ôr yô

Mbamtsera mba ve lu ker la

Ityogholov mbi ungwan mbi er ka kwaghyan u u lu yan nahan. Er ka wea ya kwaghyan u injaa akuma akuma i hemba wasen we nahan, kape ka wea ungwan ityogholov mbi injaa akuma akuma ve i wase u je la. Nenge ase ikyav:

  • Ityogholov ka mbi na i saan we yol.

    “Sev ka mbua doom ga yô, m ungwan ityogholov mbi m hembe soon la, nahan ishima i kera zer vihim mo ker ga.”​​—⁠Mkaanem ma Mark, gumor ugen.

  • Ityogholov ka mbi na u umbur kwagh u doon we.

    “Icam igen ka i zer umbur mo kwagh u doon mo gbem, nahan hanma shighe u m ongo i cii yô, ka i saan mo iyol.”​​—⁠Mkaanem ma Sheila, gumkwase ugen.

  • Ityogholov ka mbi na u lu vea ior kangenaa.

    “Yange m za mkohol u ityar ityar u Mbashiada mba Yehova, nahan mba yange ve za mkohol la cii mba ngur wan icam i kuren yô, mliam haam a ashe. Se due ken ijô kposo kposo, kpa icam la na yô, se lu ken mzough.”​​—⁠Mkaanem ma Tammy, gumkwase ugen.

  • Ityogholov ka mbi wase u u lun a aeren a dedoo.

    “Ka wea henen ityogholov mbi kuhwan yô, kwagh la a wase u u lun a ishimawan shi veren ishima eren kwagh. Ka kwagh u u fatyô u fan fese ga. Saa u zer karen iyol ve u fa tsembelee ye.”​​—⁠Mkaanem ma Anna, gumkwase ugen.

U Fa Kpa? Pasalmi u a lu takerada u Bibilo u hemban kehen la, ngu a atsam 150.

Heren a her ityogholov er kwaghyan kpa ka u her a her nahan

Kwaghbo u a lu ker la

Ityogholov mbigen ka mbi lu er kwaghyan u i haa icigh ki wuan or sha mi nahan. Nenge ase er i hii ve se ôr nahan yô.

  • Amo agen kpishi ka a ôr kwagh u ijimbagh jighilii.

    “Ka inja er ka a amo a sha kwagh u ijimbagh tseegh ior ve hemban ungwan nahan. Mba kera we a sha asember a ijimbagh a ken myer kpaa ga.”​​—⁠Mkaanem ma Hannah, gumkwase ugen.

    Bibilo kaa ér: “Idya man hanma inja i hôngorough kua hua u eren yô, u teren tsô kpaa, de teren her a ven ga er i kom uicighanmbaiorov yô.” (Mbaefese 5:⁠3) Pine ase iyol you wer, ‘Ityogholov mbi m ongo la mbi yangen mo u dondon kwaghwan nee?’

  • Ityogholov mbigen mbia na a saan we iyol ga.

    “Tugh mbugen ka m nyôr kpa m yav ga, m ungwan ityogholov sha gambe; ityogholov mbi ka mbi na m hen sha akaa a nan mo ijungwen man ishimavihin yô. Ityogholov mbin nahan ka mbi na u hen sha akaa a vihin we.”​​—⁠Mkaanem ma Tammy, gumkwase ugen.

    Bibilo kaa ér: “Hemba kuran ishima you a akaa a u kor a cii, gadia ka ken i uma a dugh ye.” (Anzaakaa 4:23) Pine iyol you wer, ‘Ityogholov mbi m ungwan la ka mbi na m henen sha akaa a vihinii?’

  • Ityogholov mbigen mbia na u hingir ishima mgbagh mgbagh.

    “Ityogholov mbi i koho sha ishimavihin man mbi mbia na u kôr iyol you shin orgen ihyom la cii kam kwaghbo. Yange mea ungwa ityogholov mbira nahan yô, m yue tsung tsung. Tsombor wam kpa nenge kwagh ne nahan.”​​—⁠Mkaanem ma John, gumor ugen.

    Bibilo kaa ér: “Dugh nen akaa ne kera; iyugh man ishima i nyoon man ifer man ityuhwanev man kwaghôron u dang ken zwa wen.” (Mbakolose 3:⁠8) Pine ase iyol you wer, ‘Ityogholov mbi m ungwan la ka mbi na m nyoon ishima mgbagh mgbagh, je shighe ugen m wa ikyo sha kwagh u ior vea lu henen ken ishima gaa?’

Ka nyi i lu jindikwagh? Heren a her ityogholov mbi u ungwa yô. Ka kwagh u Julie, gumkwase ugen ka a nôngon u eren je la. A kaa ér, “Hanma shighe yô, ka m henen sha ityogholov mbi m tsough la, nahan m tswer mbi m nenge mer doo u me ungwa ga yô. Ashighe agen ka i taver u eren kwagh ne, kpa m fa ka kwagh u vough.”

Gumkwase ugen iti na ér Tara, un kpa ngu henen u eren imbakwagh ne. A kaa ér, “Ashighe agen ka mea bugh redio yô, tashan ugen a kuhwa ityogholov mbi doo u ungwan dedoo, kpa mea keghen ato mea ungwan amo a i gberen ker la yô, m nenge mer doo u me kar hen tashan la kera. Ka wea kar her sha nahan yô, i lu inja vough er u nyima kyeeke i nyohon tsung kwa môm tseegh maa u gema i u ta kera nahan! Kpa aluer m kôrcio u vendan mer me ungwa imo i or nan gber sha kwagh u idya ga yô, me hemba kôron cio u vendan ieren i yaven a or hen ya cii moughon vôson nom la. M soo u nengen kwagh u ityogholov mbi m ungwan mbia va a mi sha iyol yam la beelee ga.”