Aver yem sha atineakaa

Mbashiada mba Yehova

Tsua Zwa Tiv

MBAMPIN MBA AGUMAIOR A PINEN LA

Ieren i Hian a Or la Ka Asenge a Doono?

Ieren i Hian a Or la Ka Asenge a Doono?
  • Ka i hia a or nena?

  • Er nan ve mbagenev ka ve hian a ioro?

  • Ka akaa a vihin a nyi a lu kere?

  • Kwagh u mbakwav wou ve ôron yô

Ka i hia a or nena?

Ior mbagenev ka ve hen ér aluer nomsoor nan ngu ôron kwagh, shin nan ngu eren akaa a kwase shin kwase ngu eren nahan a nomsoor sha u tesen nan ér nan soo u lun ishiôr i nan yô, nomsoor la nan ngu hian a kwase la, shin kwase la nan ngu hian a nomsoor la. Aluer or ngu tesen ér nan soo u lun ishiôr i or nahan, ka kwaghboo? Ka kwaghbo keng ga. Gumkwase ugen iti na ér Ann, a kaa ér, “Aluer ka u pe hiin ishiôr man u soo wer orgen nana lu ishiôr you nahan, u er nan ve u fa wer nan kpa nan soo ér we u lu ishiôr i nana?”

Nahan kpa, ken ngeren ne yô, se lu nengen sha gbenda u hian a or inja er u soo wer nana lu ishiôr you, kpa geman tôôn ken ishima you wer nan ngu ishiôr you ga la.

“U veren ishima sha or u u soo u hiin ishiôr vea nan la ka kposo a u zeren eren akaa a tesen or wer u soo wer nana lu ishiôr you, man va nan nan ishimavihin sha u kaan a nan wer ka asenge la.”—Mkaanem ma Deanna, gumkwase ugen.

Er nan ve mbagenev ka ve hian a ioro?

Mbagenev ka ve hian a ior sha u i nenge ér ve gba kwagh di tsô. Gumkwase ugen iti na ér Hailey, a kaa ér, “Ka wea fa wer ior mba nengen ér u gba kwagh yô, i hemba maan we iyol u hian a ior cii.”

Kpa u eren kwagh a or wer nana na jighjigh ér u soo wer nana lu ishiôr you, geman tôôn ken ishima you wer nan ngu ishiôr you ga la, ka i tese ér cuku tsô kpa kwagh gba u u fan er i lu nan ken ishima ga. Shi aluer u ngu eren a or nahan wer i nenge di tsô ér u gba kwagh yô, tese ér kwaghfan yina u. Bibilo kaa ér: “Ibumegh ka or u lanen kwagh kwagh u iember je.”—Anzaakaa 15:21.

Sha ityôkyaa ne yô, Hailey nenge ér, “Kwagh u a lu ken ieren i hian a or la yô, sha hiihii la ka i lu inja er ka asenge nahan, kpa i va kure i doo ga.”

Ka akaa a vihin a nyi a lu kere?

  • Ka wea hian a ior yô, u zua a iti i bo.

    “Or ka nana hian a ior yô, ior mbara ve nenge ér nan ngu a inja ga shi nan kav kwagh ga. Ka u nenge wer wanyekwase la nan ngu eren kwagh a we sha mimi ga, kpa ka u yan we tseegh nan lu keren ye.”—Mkaanem ma Jeremy, gumor ugen.

    Kwagh u henen sha mi: Iliam you man aeren a ou aa lu nan ve ior vea fa u ér u hian a ioro?

  • Ka u na or u u hian a nan la ishimavihin.

    “Ka mea zua vea or u hian a ior yô, i lum er m kar sha m undu nan nahan. Ka i lum er, ka er m lu wanyekwase ve nomsoor la nan lu lamen a mo nahan. Ior mba ve hian a mo cii mba tesen ér kwagh wam gba ve ishima sha mimi ga; ka u tesen ér ve gba kwagh tseegh ka ve hian a mo ye.”—Mkaanem ma Jaqueline, gumkwase ugen.

    Bibilo kaa ér: “Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.”—1 Mbakorinte 10:24.

    Kwagh u henen sha mi: I gbe nahan or er a we u na jighjigh wer nan soo u lun ishiôr you, kpa u va mase kaven wer nan tôô ken ishima i nan nahan ga vee? Aluer yange or er imba kwagh la a we yô, yange lu u ken ishima nena? U er nan ve u palegh u vihin orgen ishima sha imba gbenda laa?

  • Ka wea hian a ior yô, i va taver we u zuan a ishiôr i mimi.

    “Hanma or u nan hian a kasev cii ka or u injaa u vôson ga, shin lun ishiôr i nan tsô kpaa ga. Aluer or ngu sôôr mo sha mimi ga nahan, a er nan ve me fa nan shin me na nan jighjigh?”—Mkaanem ma Olivia, gumkwase ugen.

    Orpasalmi Davidi nger ken Bibilo ér: ‘Lun yam a mbaayomov imôngo ga.’—Pasalmi 26:4.

    Kwagh u henen sha mi: Or u hian a ior ka nan tese ér nan ngu nyi ôro? Ka imba or u u soo wer nana lu ishiôr you laa?