Aver yem sha atineakaa

Mbashiada mba Yehova

Tsua Zwa Tiv

Me Er Nan Ve Me Ya Ikyaren ken Makeranta?

Me Er Nan Ve Me Ya Ikyaren ken Makeranta?

Kwagh u u fatyô u eren yô

Lu a mhen u vough! De u keren mgbejime sha u henen wer u fatyô u zan ikyura ga la. Shighe u u lu a mbamhen mba kpeegh sha akaa a u fatyô u eren yô, gema hen sha akaa a dedoo a u lu a mi la. Ikyav i tesen yô, shighe u mbagenev lu puun kwaghôron u Paulu (man alaghga lu sha mimi ga) la, a kaa a ve ér: “Aluer mea lu or u fan kwaghôron ga kpaa, sha kwaghfan yô, m yina ga.” (2 Corinthians 10:10; 11:6) Paulu yange fa mbamyen nav. Kpa shi fa akaa a una fatyô u eren yô. We di ye? Ka nyi nahan we u fatyô u erene? Aluer wea fa ga yô, pine organden u nan we u ikyo yô. Nana wase u u nenge a mfe u ú lu a mi sha akaa la shi eren tom a mi sha inja.

Henen kwagh sha inja. Gbenda ugen ngu u u kar ve u ya ikyaren ken makeranta sha mimi ga; a gba u saa u hen kwagh keng. Ka mimi, kwaghhenen lu zange ga. Kpa gema ngu a inja. Sha kpôô yô, ka wea nôngo cuku tseegh kpa u hen kwagh i doo u. Kpa u we henen kwagh sha inja yô, a gba u u sôr shighe wou u ver sha inja. Umbur wer, gba u kwaghhenen una lu kwagh u hiihii. Bibilo kaa ér “shighe u ahan a sen” ngu, kua “shighe u yaren kwan.” (Orpasenkwagh 3:1, 4; 11:9) Sha nahan yô, we kpa a doo u u veren shighe u za eren anumbe, er agumaior agen nahan. Kpa Orpasenkwagh 11: 4 ta icin ér: “Or u nan ver ishima sha ahumbe yô, nana lôô ga; man shi or u nan ver ishima sha abeen kpaa nana sunda ga.” Kwagh ne tese se nyi? De zeren wan a wa ahô ga. U wa ahô yô, u kôrcio u eren kwagh u injaa ga. Vande henen kwagh man u mase za eren anumbe ye. Ishima i de ze u iyol ga, u fatyô u zuan a shighe u eren akaa ne cii!

Er myohom ma kenden ka ma na or nan va agbende nahan, kape kwaghhenen u sha inja kpa ngu a wase or u yan ikyaren ken makeranta je la.