Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

M De Makeranta u Zana?

M De Makeranta u Zana?

Ka kwagh u u er je ne

Tindi u ken tar wou tese ér a hemba kpa wanye nena hen makeranta i̱ kuma nan ve nana de? U hen u nyôr nahan vee? Aluer u vende kwaghwan u Bibilo u a kaa ér “hanma or u uma nana̱ ungwan imo i tahav mbu nan lu mbu sha ikyev la,” u kera hen u nyôr sha iaven i gomoti a soo la ga yô, tese ér u ngu undun makeranta.—Mbaromanu 13:1.

U zua a kwagh u ú soo u zuan a mi ken makeranta la vee? Ka nyi akaa nahan u soo wer makeranta u wase u ú zua a mi? U fa jighilii gaa? Gba u u fa! Gayô, u hingir er pasenja u nan nyer girgidogo kpa nan fe ape nan soo u zan ga nahan. Nahan hen vea mbamaren ou sha ngeren u a dondo shiin, a lu a itinekwagh ér “ Mbaawashima Av ken Makeranta” la. Aluer u ngu a kure mbaawashima we vea mbamaren ou ne nenge sha mi mban ga tsô u de u zan yô, tese ér u ngu undun makeranta.

U undun makeranta ngu er u tsuwen sha girgidogo gban shin inya shighe u u lu a nyôr ape u lu zan ga nahan

Er nan u soo u undun makeranta? Adooga u soo u den sha er u wase tsombor wou u keren inyaregh shin eren ma tom u u tsough a ishima iyol wer u er la yô. Mhen u tangen iyol u adooga or nana lu a mi ve nan undu makeranta yô, ka sha ci u nan soo u palegh ikyaren shin mbaasaimenti. Zayol yô, ka u fan ityôkyaa jighilii i i ne ve u soo u undu makeranta la, aluer ka ityôkyaa i dedoo shin ka hwev yô. Man aluer ka sha ci u nan soo u palegh zayol yô, alaghga u va tagher a kwagh u kpiligh we iyol.

U undu makeranta ngu inja er u tsuwen sha girgidogo gban shin inya zum u u lu a nyôr ape u lu zan la ga nahan. Adooga u u tema shin girgidogo la kpe u iyol ga, shin pasenja mbera mba eren a we sha inja ga, kpa aluer u gba tsuwen tsô yô, u nyôr ape u lu zan la ga, shi alaghga u vihi iyol kehelee. Makeranta kpa kape i lu je la, aluer u bee ga maa u undu u yô, alaghga a hemba taver we u zuan a tom. Shi wea zua a mi je kpa, a kimbi u inyaregh a kuma er yange wea bee makeranta ve ma i kimbi u la ga.

Yô, de undun makeranta ga, guda nôngo a ma zayol u ú lu tagher a min ken makeranta. Aluer u er nahan yô, u hen ishimawan nahan kwagh ne una hemba wan we agoyol u va nôngon a zayol mban zum u u lu eren tom yô.

 Mbaawashima Av ken Makeranta

Kwagh u vesen u makeranta u eren yô, ka u wasen ú u va zuan a tom u ua wase ú u nengen sha iyol you shi va nengen sha tsombor u adooga u va lu a mi la kpaa. (2 Mbatesalonika 3:10, 12) U tsua tom u u soo u va eren la, man er makeranta u u lu henen la ua wase ú u va eren u la kpa? Kwagh u una wase ú u nengen aluer makeranta wou ngu zan a we ape u soo la yô, ka u nan mlumun sha mbampin mban:

  • Ka nyi m fe u erene? (U tesen ikyav yô, u fa u lamen a ior tsembelee kpa? Ka i doo u eren tom sha ave ou shin varen akaa shin sôron akaa? U fa u nengen sha zayol shi sôron unu?)

  • Ka hanma tom ua wasem u eren tom a mfe wam nee?

  • Ka ityom i nyi nahan i lu hen ijiir i m lu nee?

  • Ka nyi kwagh nahan m lu henen u una va wasen u zuan a tom laa?

  • Ka akaa a nyi nahan m soo u henen sha er me va fatyô u kuren awashima wam laa?

Umbur wer, awashima wou ka u been makeranta a mfe u una wase u yô. Nahan de geman tsôron ken makeranta wer u ngu palegh zayol u ken tom ga.