ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት

መጽሓፍ ቅዱስ—ትርጉም ሓዳስ ዓለም

ዘሌዋውያን 5:1-19

ትሕዝቶ

  • ዝርዝር ሓጢኣትን ዚቐርብ መስዋእትን (1-6)

    • ሓጢኣት ካልኦት ዘይሕብር (1)

  • ድኻ ዜቕርቦ ቕያር መስዋእቲ (7-13)

  • ብዘይፍላጥ ንዚግበር ሓጢኣት ዚቐርብ መስዋእቲ በደል (14-19)

5  “‘ሓደ ሰብ* ኪምስክር ጻውዒት ሰሚዑ* ኼብቅዕ፡+ ምስክር ክነሱ፡ ወይ ዝረኣየ ወይ ዝፈለጠ ኽነሱ፡ እንተ ዘይሓቢሩ፡ ብስሕተቱ ተሓታቲ ኪኸውን እዩ።  “‘ወይ ሓደ ሰብ* ገለ ርኹስ ነገር፡ ማለት ገምቢ ርኹስ እንስሳ ዘገዳም፡ ወይ ገምቢ ርኹስ እንስሳ ዘቤት፡ ወይ ገምቢ ርኹስ ሓሰኽሰኽ ዚብል ፍጡር እንተ ተንክዩ፡+ ብዘይፍላጥ እኳ እንተ ገበሮ፡ ርኹስ እዩ፡ በዳሊ ኸኣ ይኸውን።  ወይ ሓደ ብዘይፍላጥ ርኽሰት ሰብ፡+ ማለት ኬርክሶ ዚኽእል ዝዀነ ይኹን ርኹስ ነገር እንተ ተንክዩ እሞ፡ እንተ ተፈሊጥዎ፡ በዳሊ ይኸውን።  “‘ወይ ሓደ ሰብ* ብዛዕባ ዝዀነ ይኹን ነገር ጽቡቕ ወይ ክፉእ ንምግባር ከይፈለጠ ብሃወኽ እንተ ምሒሉ፡ ብሃወኽ ከም ዝመሓለ ምስ ተፈለጦ፡ በዳሊ ይኸውን።*+  “‘ብሓደ ኻብዚ ነገራት እዚ እንተ በዲሉ፡ ብምንታይ ከም ዝሓጥአ ይናዘዝ።+  ብዛዕባ እቲ ዝገበሮ ሓጢኣት ከኣ ንመስዋእቲ በደሉ፡+ ማለት ካብ መጓሰኡ ንመስዋእቲ ሓጢኣት ሓንቲ ኣንስተይቲ፡ ሽበን* ወይ ኣርሕዶ፡* ንየሆዋ የምጽኣሉ። እቲ ኻህን ድማ ብዛዕባ ሓጢኣቱ የተዓርቆ።  “‘ንበጊዕ ዚኣክል ዓቕሚ እንተ ዘይብሉ ግና፡ ብዛዕባ እቲ ሓጢኣት ንመስዋእቲ በደሉ ኽልተ ባሬቶ ወይ ክልተ ጫቚት ርግቢ፡+ ሓንቲ ንመስዋእቲ ሓጢኣት፡ ሓንቲ ኸኣ ንዚሓርር መስዋእቲ፡+ ንየሆዋ የምጽኣሉ።  ናብ ካህን የምጽኣየን፣ ንሱ ድማ ቅድም ነታ ንመስዋእቲ ሓጢኣት እትኸውን ርእሳ ኸይፈለየ፡ ካብ ቅድሚት ክሳዳ ይቐርጥፋ።  ካብቲ ደም መስዋእቲ ሓጢኣት ከኣ ኣብ ጐድኒ እቲ መሰውኢ ይንጸግ፣ ነቲ ዝተረፈ ደም ግና ኣብ እግሪ እቲ መሰውኢ የጽርሮ።+ ንሱ መስዋእቲ ሓጢኣት እዩ። 10  ነታ ኻልአይቲ ድማ ከምቲ ስርዓት ገይሩ ንዚሓርር መስዋእቲ ይግበራ፣+ እቲ ኻህን ድማ ብዛዕባ እቲ ዝገበሮ ሓጢኣት የተዓርቆ፡ ይቕረ ኺብሃለሉ ኸኣ እዩ።+ 11  “‘ንኽልተ ባሬቶ ወይ ንኽልተ ጫቚት ርግቢ ዚኣክል ዓቕሚ እንተ ዘይብሉ ግና፡ ብዛዕባ እቲ ዝገበሮ ሓጢኣት ንመስዋእቱ ዚኸውን ዓስራይ ኣፍ ኤፋ*+ ድኹም ሓርጭ ንመስዋእቲ ሓጢኣት የምጽእ። መስዋእቲ ሓጢኣት እዩ እሞ፡ ዘይቲ ኣይኽዓወሉ፡ ጻዕዳ ዕጣን እውን ኣይግበረሉ። 12  ናብ ካህን ድማ የምጽኣዮ፣ እቲ ኻህን ከኣ ካብኡ ንብምሉኡ ዚውክል መስዋእቲ* ኪኸውን ዕማዅ ወሲዱ፡ ኣብቲ መሰውኢ፡ ኣብ ልዕሊ እቲ ንየሆዋ ብሓዊ ዚግበር መስዋእቲ የሕርሮ። ንሱ መስዋእቲ ሓጢኣት እዩ። 13  እቲ ኻህን ከኣ ብዛዕባ እቲ ብገለ ኻብዚ ሓጢኣት እዚ ዝገበሮ ሓጢኣት የተዓርቆ፡ ይቕረ ኺብሃለሉ ድማ እዩ።+ እቲ ዝተረፈ መስዋእቲ፡ ከም መስዋእቲ እኽሊ፡+ ነቲ ኻህን ይኹን።’”+ 14  የሆዋ ድማ ንሙሴ ኸምዚ ኢሉ ተዛረቦ፦ 15  “ሓደ ሰብ* ብዘይፍላጥ ኣብ ልዕሊ እቲ ናይ የሆዋ ቕዱስ ነገር ብምሕጣእ እንተ ጠሊሙ፡+ ንመስዋእቲ በደል ካብ መጓሰ፡ ከምቲ ብሲቃል መቕደስ* እተገምገመሉ ሲቃል* ብሩር ዝዋግኡ+ ጥዑይ ድዑል ንየሆዋ የምጽኣሉ።+ 16  ብዛዕባ እቲ ኣብ ልዕሊ እቲ መቕደስ ዝገበሮ ሓጢኣት ከኣ ይኽሓስ፡ ሓምሻይ ኣፍ ድማ ይወስኸሉ።+ እቲ ኻህን በቲ ድዑል መስዋእቲ በደል ገይሩ ምእንቲ ኼተዓርቖ ኸኣ፡+ ነቲ ኻህን ይሃቦ፣ ይቕረ ኺብሃለሉ ድማ እዩ።+ 17  “ሓደ ሰብ* ካብ ኵሉ እቲ የሆዋ ኸይግበር ዝኣዘዞ ሓደ ብምግባር እንተ ሓጢኡ፡ ብዘይፍላጥ እኳ እንተ ዀነ፡ በዳሊ እዩ እሞ፡ ብስሕተቱ ተሓታቲ ኪኸውን እዩ።+ 18  ንመስዋእቲ በደል ከምቲ እተገምገመሉ ኻብ መጓሰ፡ ጥዑይ ድዑል ናብ ካህን የምጽእ።+ እቲ ኻህን ድማ ብዛዕባ እቲ ብዘይፍላጥ ከይሓሰበ ዝገበሮ ጌጋ የተዓርቆ፡ ይቕረ ኺብሃለሉ ኸኣ እዩ። 19  እዚ መስዋእቲ በደል እዩ። ብርግጽ ንየሆዋ በዲልዎ እዩ።”

እግረ ጽሑፍ

ወይ፡ “ነፍሲ።”
ቃ.ቃ.፡ “ቃል መርገም (ማሕላ) ሰሚዑ።” ምናልባት ንሓደ በደል ብዚምልከት፡ ኣብ ልዕሊ እቲ በዳሊ ወይ ኪምስክር ፍቓደኛ ዘይኰነ ምስክር፡ መርገም ዘጠቓለለ ጻውዒት ኪኸውን ይኽእል።
ወይ፡ “ነፍሲ።”
ወይ፡ “ነፍሲ።”
መብጽዓኡ ኸም ዘይፈጸመ ዚእምት ሓሳብ ዘለዎ ይመስል።
ሽበን ካብ ዕየት እትዓቢ፡ ንእሽቶ ኣንስተይቲ በጊዕ እያ።
ኣርሕዶ ኻብ ማሕስእ እትዓቢ፡ ንእሽቶ ኣንስተይቲ ጤል እያ።
ዓስራይ ኣፍ ኤፋ፡ 2.2 ሊ. እዩ። ኣብ መ.ጽ. ለ14 ርአ።
ወይ፡ “ንመዘከርታ።”
ወይ፡ “ነፍሲ።”
ወይ፡ “ብቕዱስ ሲቃል።”
ሓደ ሲቃል፡ 11.4 ግ. እዩ። ኣብ መ.ጽ. ለ14 ርአ።
ወይ፡ “ነፍሲ።”