ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት

መጽሓፍ ቅዱስ—ትርጉም ሓዳስ ዓለም

ኣስቴር 1:1-22

ትሕዝቶ

  • ንጉስ ኣሓሽዌሮስ ኣብ ሱሳን ዝገበሮ ድግስ (1-9)

  • ንግስቲ ዋሽቲ ምእዛዝ ኣበየት (10-12)

  • ንጉስ ምስ ጥበበኛታቱ ተማኸረ (13-20)

  • ትእዛዝ ንጉስ ወጸ (21, 22)

1  ብዘመን ኣሓሽዌሮስ፡*—እዚ ኣሓሽዌሮስ እዚ፡ እቲ ኻብ ህንዲ ኽሳብ ኢትዮጵያ* 127 ኣውራጃ ዝገዝአ እዩ፡+  በቲ ዘመን እቲ ንጉስ ኣሓሽዌሮስ ኣብ ሱሳን*+ እታ ዕርዲ ኸተማ፡* ኣብ ዝፋን መንግስቱ ምስ ተቐመጠ፡  ኣብ ሳልሰይቲ ዓመት ንግስናኡ፡ ንዅሎም መሳፍንቱን ገላዉኡን ድግስ ገበረሎም። ሰራዊት ፋርስን+ ሜዶንን+ ልዑላንን መሳፍንቲ ኣውራጃታትን ከኣ ኣብ ቅድሚኡ ነበሩ፣  ንሱ ድማ ሃብቲ እታ ኽብርቲ መንግስቱን ክብርን ግርማን ዕቤቱን ብዙሕ መዓልትታት፡ 180 መዓልቲ፡ ኣርኣዮም።  እተን መዓልትታት እቲአን ምስ ተወድኣ፡ ንጉስ ንዅሎም እቶም ኣብ ሱሳን* እታ ዕርዲ ኸተማ* እተረኽቡ፡ ካብ ዓብዪ ኽሳዕ ንእሽቶ፡ ኣብ ኣጸድ ስፍራ ኣታኽልቲ ቤተ መንግስቲ ንጉስ፡ ሸውዓተ መዓልቲ ድግስ ገበረሎም።  በፍታን ቅጭን ዓለባ ጡጥን ሰማያዊ ዓለባን ምስ ገመድ ቅጭን ዓለባን ጁዅ ኣብ ዝሕብሩ ጸምሪ ምስ እተለገበ ቐላብቲ ብሩርን ምስ ኣዕኑድ እምነ በረድን ተተሓሒዙ ነበረ፣ ዓራውቲ ወርቅን ብሩርን ድማ ኣብ ልዕሊ እቲ እምኒ ጶርፌሪን ጻዕዳ እምነ በረድን ሉልን ጸሊም እምነ በረድን እተነጽፎ ባይታ ነበረ።  ወይኒ ኸኣ ብጽዋኣት* ወርቂ ቐረበ፣ እቲ ጽዋኣት ድማ በብዓይነቱ ነበረ። እቲ ወይኒ ንጉስ ከኣ ከም ልግሲ ንጉስ ኣኺሉ ዚተርፍ ነበረ።  ንጉስ ምስ ሰበ ስልጣን ቤተ መንግስቱ ዀይኑ፡ ነፍሲ ወከፍ ኪሕጐስ መሰናድዎ ገይሩ ነበረ እሞ፡ ብዛዕባ መስተ ሓደ እኳ ኸይግደድ* ስርዓት ወጺኡ ነበረ።  ንግስቲ ዋሽቲ+ እውን ኣብ ቤተ መንግስቲ ንጉስ ኣሓሽዌሮስ ንኣንስቲ ድግስ ገበረት። 10  ኣብ ሻውዐይቲ መዓልቲ፡ ልቢ ንጉስ ብወይኒ ምስ ተሓጐሰ፡ ንመሁማንን ንቢዝታን ንሓርቦናን+ ንቢግታን ንኣባግታን ንዜታርን ንካርካስን፡ ነቶም ንንጉስ ኣሓሽዌሮስ ብብሕቲ ዜገልግልዎ ሸውዓተ ኣገልገልቲ ቤተ መንግስቲ፡ 11  ንግስቲ ዋሽቲ ኣዝያ መልክዐኛ ነበረት እሞ፡ መልክዓ ንህዝብታትን ንመሳፍንትን ንምርኣይ፡ ዘውዲ* ገይራ ናብ ቅድሚ ንጉስ ኬምጽእዋ ኣዘዞም። 12  ንግስቲ ዋሽቲ ግና፡ በቲ እቶም ኣገልገልቲ ቤተ መንግስቲ ዝነገርዋ ትእዛዝ ንጉስ ምምጻእ ፈጺማ ኣበየት። ሽዑ፡ ንጉስ ኣዝዩ ተቘጥዐ፣ ነድሩ ኸኣ ኣብ ውሽጡ ነደደ። 13  ሽዑ፡ ንጉስ ነቶም ብዛዕባ ዝቐደመ ስርዓት* ኣጸቢቖም ዚፈልጡ ጥበበኛታት ተዛረቦም፣ (ከመይሲ፡ ነገር ንጉስ ኣብ ቅድሚ ዅሎም ፈላጣት ሕግን ጕዳይን ይቐርብ ነበረ፣ 14  እቶም ቀረባኡ ዝነበሩ ኸኣ ካርሽናን ሼታርን ኣድማታን ተርሲስን ሜረስን ማርሰናን መሙካንን፡ እቶም ሸውዓተ መሳፍንቲ+ ፋርስን ሜዶንን፡ እቶም ኣብ ቅድሚ ንጉስ ዚቐርቡን ኣብታ መንግስቲ ዝለዓለ ቦታ ዝሓዙን ነበሩ።) 15  ንጉስ ከኣ፡ “ንግስቲ ዋሽቲ ነቲ በቶም ኣገልገልቲ ቤተ መንግስቲ እተነግራ ትእዛዝ ንጉስ ኣሓሽዌሮስ ስለ ዘይተኣዘዘት፡ ብመሰረት ሕጊ እንታይ ትገበር፧” ኢሉ ሓተቶም። 16  ሽዑ፡ መሙካን ኣብ ቅድሚ ንጉስን እቶም መሳፍንትን ከምዚ በለ፦ “ንግስቲ ዋሽቲ ንንጉስ ጥራይ ዘይኰነስ፡ ንዅሎም መሳፍንትን ኣብ ኵሉ ኣውራጃታት ንጉስ ኣሓሽዌሮስ ንዘለዉ ዅሎም ህዝብታትን እውን እያ በዲላ።+ 17  እዚ ንግስቲ ዝገበረቶ ነገርሲ፡ ብዅለን ኣንስቲ ኺፍለጥ እዩ፣ ንሳተን ከኣ ንሰብኡተን ኪንዕቃ፡ ‘ንጉስ ኣሓሽዌሮስ ንንግስቲ ዋሽቲ ናብ ቅድሚኡ ኼምጽእዋ ኣዚዙስ፡ ንሳ ግና ምምጻእ ኣብያ’ ድማ ኪብላ እየን። 18  በዛ መዓልቲ እዚኣ እቲ ንግስቲ ዝገበረቶ ዝፈለጣ ልዕልትታት ፋርስን ሜዶንን፡ ንዅሎም መሳፍንቲ ንጉስ ከምኡ ኺዛረባኦም፡ እዚ ኸኣ ንዕቀትን ቍጥዓን ኬስዕብ እዩ። 19  ንንጉስ ጽቡቕ ኰይኑ እንተ ተራእይዎስ፡ ንጉሳዊ ትእዛዝ ካብኡ ይውጻእ፣ ኣብቲ ኺስረዝ ዘይከኣል ሕግታት ፋርስን ሜዶንን ድማ ይጸሓፍ፣+ ዋሽቲ ደጊም ኣብ ቅድሚ ንጉስ ኣሓሽዌሮስ ኣይትእቶ፣ ንጉስ ከኣ ነቲ መዓርግ ንግስናኣ፡ ካብኣ ንእትሓይሽ ይሃብ። 20  ትእዛዝ ንጉስ ኣብ ኵሉ እቲ ሰፊሕ ግዝኣቱ ምስ ተሰምዐ ኸኣ፡ ኵለን ኣንስቲ ንሰብኡተን፡ ካብ ዓብዪ ኽሳዕ ንእሽቶ፡ ክብሪ ኺህባኦም እየን።” 21  እዚ እማመ እዚ ድማ ንንጉስን ነቶም መሳፍንትን ባህ ኣበሎም፣ ንጉስ ከኣ ከምቲ መሙካን ዝበሎ ገበረ። 22  ነፍሲ ወከፍ ሰብኣይ ኣብ ቤቱ ጐይታ* ኪኸውንን ብቛንቋ ህዝቡ ኺዛረብንሲ፡ ናብ ኵለን ኣውራጃታት ንጉስ፡ ነናብ ሃገር ከከም ኣጸሓሕፋኡ፡ ነናብ ህዝቢ ድማ ከከም ቋንቋኡ ደብዳበታት ሰደደ።+

እግረ ጽሑፍ

እዚ ዘርክሲስ ቀዳማይ፡ ወዲ ዳርዮስ እቲ ዓብዪ (ዳርዮስ ሂስታስፒስ) ከም ዝዀነ እዩ ዚእመን።
ወይ፡ “ኩሽ።”
ወይ፡ “ሱሳ።”
ወይ፡ “ቤተ መንግስቲ፣ ዕርዲ።”
ወይ፡ “ሱሳ።”
ወይ፡ “ቤተ መንግስቲ፣ ዕርዲ።”
ወይ፡ “ብኣቕሑ፣ ብዋናጩ።”
ወይ፡ “ኸይቅየድ።”
ወይ፡ “ናይ ንግስና ስልማት ርእሲ፣ መጠምጠምያ።”
ቃ.ቃ.፡ “ግዜያት።”
ወይ፡ “መስፍን።”