ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት

መጽሓፍ ቅዱስ—ትርጉም ሓዳስ ዓለም

መዝሙር 72:1-20

ትሕዝቶ

  • ሰላማዊ ግዝኣት እቲ ኣምላኽ ዝሸሞ ንጉስ

    • ‘ጻድቕ ኪዕምብብ እዩ’ (7)

    • ካብ ባሕሪ ኽሳብ ባሕሪ ተገዛእቲ ኺህልውዎ እዮም (8)

    • ካብ ዓመጻ ኼናግፎም እዩ (14)

    • ኣብ ምድሪ ብዙሕ እኽሊ ኪኸውን እዩ (16)

    • ስም ኣምላኽ ንዘለኣለም ይወደስ (19)

ብዛዕባ ሰሎሞን። 72  ኦ ኣምላኽ፡ ንንጉስ ፍርድታትካ ሃቦ፣ ንወዲ ንጉስ ከኣ ጽድቅኻ ዓድሎ።+   ንሱ ድማ ንህዝብኻ ብጽድቂ፡ ንትሑታትካ እውን ብፍትሒ ይማጐተሎም።+   ኣኽራን ንህዝብኻ ሰላም፡ ኵርባታት ከኣ ጽድቂ የምጽኡሉ።   ነቶም ኣብ መንጎ ህዝብኻ ዘለዉ ትሑታት ይጣበቐሎም፣* ንደቂ ድኻ ድማ የድሕኖም፣ ንዓማጺ ኸኣ ይጨፍልቆ።+   ጸሓይ ክሳዕ ዘላ፡ ወርሒ እውን ክሳዕ ዘላ፡ ንውሉድ ወለዶ ኺፈርሁኻ እዮም።+   ኣብ እተዓጽደ ሳዕሪ ኸም ዚዘንም ዝናም፡ ከምቲ ንምድሪ ዜስቲ ብርቱዕ ካፋ ኪኸውን እዩ።+   ብዘመኑ፡ ጻድቕ ኪዕምብብ፡*+ ወርሒ ኽሳዕ እትጠፍእ ከኣ ሰላም ኪበዝሕ እዩ።+   ካብ ባሕሪ ኽሳብ ባሕሪ፡ ካብቲ ፈለግ* ክሳብ ወሰናት ምድሪ ተገዛእቲ ኺህልውዎ እዮም።*+   ተቐማጦ ምድረ በዳ ኣብ ቅድሚኡ ኺሰግዱ፡ ጸላእቱ እውን ሓመድ ኪልሕሱ እዮም።+ 10  ነገስታት ተርሲስን ደሴታትን ኪግብሩሉ፡+ ነገስታት ሳባን ሴባን ድማ ህያባት ኪህብዎ እዮም።+ 11  ኵሎም ነገስታት ኣብ ቅድሚኡ ኺሰግዱ፡ ኵሎም ኣህዛብ ከኣ ኬገልግልዎ እዮም። 12  ንሱስ ንዜእዊ ድኻን ረዳኢ ንዘይብሉ ትሑትን ኬናግፍ እዩ። 13  ንትሑትን ንድኻን ኪድንግጸሎም፡ ህይወት* ድኻታት ድማ ኬድሕን እዩ። 14  ካብ ጭቈናን ካብ ዓመጻን ኬናግፎም፡* ደሞም ከኣ ኣብ ቅድሚ ኣዒንቱ ኽቡር ኪኸውን እዩ። 15  ብህይወት ይንበር፡ ወርቂ ሳባ እውን ይወሃቦ።+ ወትሩ ድማ ምእንታኡ ይጸለ፣ ምሉእ መዓልቲ እውን ይባረኽ። 16  ኣብ ምድሪ ብዙሕ እኽሊ ኪኸውን፡+ ኣብ ርእሲ ኣኽራን ከኣ ኣኺሉ ኺተርፍ እዩ። ፍሪኡ ኸም ኣብ ሊባኖስ ኪስስን እዩ፣+ ኣብ ከተማታት፡ ሰባት ከም ኣትክልቲ ምድሪ ኺዕምብቡ እዮም።+ 17  ስሙ ንዘለኣለም ይንበር፣+ ጸሓይ ክሳዕ ዘላ ድማ ይግነን። ሰባት ብእኡ በረኸት ይረኽቡ፣*+ ኵሎም ኣህዛብ ከኣ ሕጉስ ይበልዎ። 18  እቲ በይኑ ዜደንቕ ነገራት ዚገብር+ የሆዋ ኣምላኽ፡ ኣምላኽ እስራኤል፡ ይወደስ።+ 19  እቲ ኽቡር ስሙ ንዘለኣለም ይወደስ፣+ ክብሩ እውን ንብዘላ ምድሪ ይምልኣያ።+ ኣሜን፡ ኣሜን። 20  ጸሎት ዳዊት ወዲ እሴይ+ ኣብዚ ይውዳእ።

እግረ ጽሑፍ

ቃ.ቃ.፡ “ይፍረደሎም።”
ቃ.ቃ.፡ “ኪጥጥዕ።”
ማለት፡ ኤፍራጥስ።
ወይ፡ “ኺገዝእ እዩ።”
ወይ፡ “ነፍሲ።”
ወይ፡ “ነፍሶም ኪብጆ።”
ማለት፡ ጽዒሮም ኪረኽቡ።