ናብ ትሕዝቶ ኺድ

ናብ ተወሳኺ ዝርዝር ኪድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት | መጽሓፍ ቅዱስ—ትርጉም ሓዳስ ዓለም

መዝሙር 50:1-23

ትሕዝቶ

  • ኣምላኽ ኣብ መንጎ እሙናትን እኩያትን ይፈርድ

    • ብመስዋእቲ ምስ ኣምላኽ እተኣትወ ኺዳን (5)

    • “ኣምላኽ ፈራዲ እዩ” (6)

    • ኵሎም እንስሳታት ናይ ኣምላኽ እዮም (10, 11)

    • ኣምላኽ ንእኩያት የቃልዖም (16-21)

ናይ ኣሳፍ መዝሙር።+ 50  የሆዋ ኣምላኽ ኣማልኽቲ*+ ተዛሪቡ፣ ካብ ምብራቕ ጸሓይ ክሳዕ ምዕራባ* ንምድሪ ጸዊዕዋ።   ካብ ጽዮን፡ እታ ፍጽምና ጽባቐ፡+ ኣምላኽ ኣብሪሁ።   ኣምላኽና ይመጽእ፡ ስቕ ድማ ኣይብልን እዩ።+ ኣብ ቅድሚኡ ዚባላዕ ሓዊ ኣሎ፣+ ኣብ ዙርያኡ ኸኣ ብርቱዕ ህቦብላ ይኸውን።+   ንህዝቡ ምእንቲ ኺዳኒ፡+ ንናይ ላዕሊ ሰማያትን ንምድርን ይጽውዖም፣+   “ናብቶም ብመስዋእቲ ገይሮም ምሳይ ኪዳን ዚኣትዉ እሙናተይ ተኣከቡ” ይብሎም።+   ኣምላኽ ፈራዲ እዩ እሞ፡+ ሰማያት ጽድቁ ይእውጁ። (ሴላ)   “ኣታ ህዝበይ፡ ስማዕ፡ ክዛረብ እየ፣ ኣታ እስራኤል፡ ኣንጻርካ ኽምስክር እየ።+ ኣነ ኣምላኽ፡ ኣምላኽካ እየ።+   ኣነ ዝገንሓካስ ብምኽንያት መስዋእትኻ፡ ብምኽንያት እቲ ወትሩ ኣብ ቅድመይ ዘሎ ብምሉኡ ዚሓርር መስዋእትኻ ኣይኰነን።+   ካብ ቤትካ ዝራብዕ፡ ካብ ደምበኻ ኸኣ ድቤላታት ክወስድ ኣየድልየንን እዩ።+ 10  ከመይሲ፡ ኵሎም እንስሳ ዱር፡ ኣብ ሽሕ ኣኽራን ዘለዉ እንስሳታት እውን ናተይ እዮም።+ 11  ንዅለን ኣዕዋፍ ኣኽራን እፈልጠን እየ፣+ ቍጽሪ ዘይብሎም እንስሳታት መሮር ድማ ናተይ እዮም። 12  ፍርያም ምድርን ኣብኣ ዘሎ ዅሉን ናተይ እዩ እሞ፡+ እንተ ዝጠሚ፡ ኣይምነገርኩኻን። 13  ስጋ ኣብዑርዶ እበልዕ እየ፧ ደም ድቤላታትዶኸ እሰቲ እየ፧+ 14  ንኣምላኽ ምስጋና ሰውኣሉ፣+ መብጽዓኻ ድማ ነቲ ልዑል ሃቦ።+ 15  ብግዜ ጭንቂ ጸውዓኒ።+ ኣነ ኸናግፈካ እየ፡ ንስኻ እውን ከተኽብረኒ ኢኻ።”+ 16  ግናኸ፡ ኣምላኽ ንእኩይ ከምዚ ይብሎ፦ “ስርዓታተይ እትጽብጽብ፡+ ወይ ብዛዕባ ኺዳነይ እትዛረብሲ እንታይ መሰል ኣሎካ፧+ 17  ንስኻስ ተግሳጸይ* ትጸልእ፡ ንቓላተይ ድማ ዝባንካ ትህቦ ኢኻ።*+ 18  ሰራቒ ምስ ረኣኻ፡ ትሰምሮ፣*+ ምስ ዘመውቲ ኸኣ ትሓብር። 19  ንኣፍካ ሕማቕ ንምስፍሕፋሕ ትጥቀመሉ፣ ምትላል ድማ ምስ ልሳንካ ለጊቡ ኣሎ።+ 20  ተቐሚጥካ ኣንጻር ሓውካ ትዛረብ፣+ ጕድለት ወዲ ኣዴኻ ኸኣ ትቐልዕ።* 21  እዚ ምስ ገበርካ፡ ኣነ ስቕ ኢለ፣ ስለዚ፡ ከማኻ ዝኸውን መሲሉካ። ሕጂ ግና ክገንሓካ፡ ምሳኻ ዘሎኒ ነገር ድማ ከቕርበልካ እየ።+ 22  ዜናግፈኩም ዘይብልኩም ኣነ ኸይሰላልዓኩምሲ፡ ኣቱም ንኣምላኽ እትርስዕዎ፡ በጃኹም ነዚ ሕሰቡሉ።+ 23  እቲ ምስጋና ዚስውእ የኽብረኒ፣+ ነቲ ውሱን መገዲ ዚስዕብ ከኣ፡ ድሕነት ኣምላኽ ከርእዮ እየ።”+

እግረ ጽሑፍ

ወይ፡ “እቲ መለኮት፡ የሆዋ ኣምላኽ።”
ወይ፡ “ካብ ምብራቕ ክሳብ ምዕራብ።”
ወይ፡ “ትምህርተይ።”
ቃ.ቃ.፡ “ንቓላተይ ናብ ድሕሪ ዝባንካ ትድርብዮ ኢኻ።”
ወይ፡ “ትሓብሮ” ኪኸውን ይኽእል።
ወይ፡ “ንወዲ ኣዴኻ ኸኣ ተጸልሞ።”