ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት

መጽሓፍ ቅዱስ—ትርጉም ሓዳስ ዓለም

ህዝቅኤል 28:1-26

ትሕዝቶ

  • ኣንጻር ንጉስ ጢሮስ እተዘርበ ትንቢት (1-10)

    • “ኣነ ኣምላኽ እየ” (2, 9)

  • ንንጉስ ጢሮስ እተለቕሰሉ ልቕሶ (11-19)

    • ‘ኣብ ኤደን ነበርካ’ (13)

    • “ዜጽልል ቅቡእ ኪሩብ” (14)

    • ‘ኣባኻ ዓመጻ ተረኽበ’ (15)

  • ኣንጻር ሲዶን እተዘርበ ትንቢት (20-24)

  • እስራኤል ኪምለስ እዩ (25, 26)

28  ከምዚ ዚብል ቃል የሆዋ ኸም ብሓድሽ መጸኒ፦  “ኣታ ወዲ ሰብ፡ ንመራሒ ጢሮስ ከምዚ በሎ፦ ‘እቲ ልዑላዊ ጐይታ ዝዀነ የሆዋ ኸምዚ ይብል፦ “ልብኻ ስለ እተዓበየ፡+ ‘ኣነ ኣምላኽ እየ። ኣብ ዝፋን ኣምላኽ፡ ኣብ ልቢ ባሕሪ ተቐሚጠ ኣለኹ’+ ትብል ኣለኻ። ግናኸ፡ ብልብኻ ኣምላኽ ዝዀንካ እኳ እንተ መሰለካ፡ ሰብ ጥራይ ኢኻ እምበር፡ ኣምላኽ ኣይኰንካን።   እንሆ፡ ንስኻስ ያኢ ኻብ ዳንኤል ትጠብብ ኢኻ።+ ኵሉ ምስጢር እውን ኣይሕብኣካን እዩ።   ብጥበብካን ብምስትውዓልካን ንርእስኻ ኣሀብቲምካ ኣለኻ፣ ወርቅን ብሩርን ድማ ኣብ መዛግብትኻ ትእክብ ኣለኻ።+   ክኢላ ነጋዲ ብምዃንካ ዓብዪ ሃብቲ ረኺብካ ኣለኻ፣+ ልብኻ ኸኣ ብሃብትኻ ተዓብዩ ኣሎ።”’  “‘ስለዚ፡ እቲ ልዑላዊ ጐይታ ዝዀነ የሆዋ ኸምዚ ይብል፦ “ብልብኻ ኣምላኽ ዝዀንካ ስለ ዝመሰለካ፡   ጓኖት፡ ኣዝዮም ጨካናት ህዝቢ ኣንጻርካ ኸምጽእ እየ፣+ ንሳቶም ድማ ኣብ ልዕሊ ጽባቐ ጥበብካ ኣስያፎም ኪመልሑ፡ ነቲ ዓብዪ ግርማኻ እውን ኬርክስዎ እዮም።+   ናብ ጕድጓድ* ኬውርዱኻ እዮም፣ ኣብ ልቢ ባሕሪ ተቐቲልካ ኽትመውት ኢኻ።+   እሞኸ ነቲ ዚቐትለካ፡ ‘ኣነ ኣምላኽ እየ’ ኽትብሎ ዲኻ፧ ኣብ ኢድ እቶም ዜርክሱኻ፡ ሰብ ጥራይ እምበር፡ ኣምላኽ ኣይክትከውንን ኢኻ።”’ 10  ‘ብኢድ ጓኖት ኣማውታ ዘይግዙራት ክትመውት ኢኻ፣ ኣነስ ተዛሪበ ኣለኹ’ ይብል እቲ ልዑላዊ ጐይታ ዝዀነ የሆዋ።” 11  ከምዚ ዚብል ቃል የሆዋ ድማ ከም ብሓድሽ መጸኒ፦ 12  “ኣታ ወዲ ሰብ፡ ንንጉስ ጢሮስ ኣልቅሰሉ፡ ከምዚ እውን በሎ፦ ‘እቲ ልዑላዊ ጐይታ ዝዀነ የሆዋ ኸምዚ ይብል፦ “ንስኻ ኣርኣያ ፍጽምና፡* ጥበብ ዝመልኣካን+ ፍጹም ዝጽባቐኻን ነበርካ።+ 13  ኣብ ኤደን፡ ኣብ ገነት* ኣምላኽ ነበርካ። ብዅሉ ኽቡር እምኒ፡ —ሮቢኖስ፡ ቶጳዝዮን፡ ያስጲስ፡ ክሪሶሊት፡ ኦኒክስ፡ ያሸፈ፡ ሰፊሮስ፡ ቱርቆይዝ፡+ ስመራግዶስ፡— ተሰሊምካ ነበርካ። መቓናቱን መትሓዚኡን ከኣ ብወርቂ እተገብረ ነበረ። በታ እተፈጠርካላ መዓልቲ ተዳልዩ ነበረ። 14  ዜጽልል ቅቡእ ኪሩብ ክትከውን መደብኩኻ። ኣብ ቅዱስ ከረን ኣምላኽ ነበርካ፣+ ኣብ መንጎ ኣእማን ሓዊ ድማ ተመላለስካ። 15  ካብታ እተፈጠርካላ መዓልቲ ኣትሒዝካ፡ ክሳዕ እታ ኣባኻ ዓመጻ እተረኽበካ ግዜ፡ ብመገድታትካ ኣበር ዘይብሉ ነበርካ።+ 16  ብሰንኪ ብዝሒ ንግድኻ፡+ ብዓመጻ መላእካ፡ ክትሓጥእ እውን ጀመርካ።+ ስለዚ፡ ካብ ከረን ኣምላኽ ከም ርኹስ ክድርብየካን ከጥፍኣካን እየ፣+ ኣታ ዜጽልል ኪሩብ፡ ካብቲ ኣእማን ሓዊ ኸርሕቐካ እየ። 17  ልብኻ ብሰንኪ ጽባቐኻ ተዓበየ።+ ብሰንኪ ዓብዪ ግርማኻ፡ ጥበብካ ኣበላሾኻ።+ ናብ ምድሪ ኽድርብየካ እየ።+ ኣብ ቅድሚ ነገስታት ከኣ ምርኢት ክገብረካ እየ። 18  ብዓብዪ በደልካን ብናይ ሸፈጥ ንግድኻን ንመቓድስካ ኣርከስካዮ። ካብ ማእከልካ ሓዊ ኸውጽእ እየ፣ ንሱ ድማ ኪበልዓካ እዩ።+ ኣብ ቅድሚ ዅሎም እቶም ዚርእዩኻ፡ ኣብ ምድሪ ሓምዅሽቲ ኽገብረካ እየ። 19  ኵሎም እቶም ኣብ መንጎ ህዝብታት ዚፈልጡኻ፡ ተገሪሞም ኪጥምቱኻ እዮም።+ መወዳእታኻ ሃንደበታውን ዜሰክሕን ኪኸውን እዩ፣ ንሓዋሩ ድማ ኣይክትህሉን ኢኻ።”’”+ 20  ከምዚ ዚብል ቃል የሆዋ ድማ ከም ብሓድሽ መጸኒ፦ 21  “ኣታ ወዲ ሰብ፡ ገጽካ ናብ ሲዶን+ ኣቢልካ ምለስ እሞ ኣንጻራ ተነበ። 22  ከምዚ ኸኣ በል፦ ‘እቲ ልዑላዊ ጐይታ ዝዀነ የሆዋ ኸምዚ ይብል፦ “ኣቲ ሲዶን፡ እንሆ፡ ኣንጻርኪ እየ፣ ኣብ ማእከልኪ እውን ክኸብር እየ። ኣብኣ ፍርዲ ምስ ፈጸምኩን ኣብኣ ምስ ተቐደስኩን ድማ፡ ኣነ የሆዋ ምዃነይ ኪፈልጡ እዮም። 23  ለበዳ ኽሰድደላ እየ፣ ኣብ ጐደናታታ ኸኣ ደም ኪውሕዝ እዩ። ሰይፊ ኻብ ኵሉ ሸነኽ ምስ መጻ፡ ቅቱላት ኣብ ማእከላ ኺወድቁ እዮም፣ ኣነ የሆዋ ምዃነይ ከኣ ኪፈልጡ እዮም።+ 24  “‘“ሽዑ፡ ቤት እስራኤል ደጊም ብዳንዴርን ብዜሳቒ እሾዅን፡+ በቶም ዚንዕቕዎም፡ ኣይኪኽበቡን እዮም፣ ኣነ እቲ ልዑላዊ ጐይታ ዝዀንኩ የሆዋ ምዃነይ ከኣ ኪፈልጡ እዮም።”’ 25  “‘እቲ ልዑላዊ ጐይታ ዝዀነ የሆዋ ኸምዚ ይብል፦ “ንቤት እስራኤል ካብ መንጎ እቶም ፋሕ ዝበሉሎም ህዝብታት መሊሰ ምስ ኣከብክዎም፡+ ኣብ ኣዒንቲ ኣህዛብ ክቕደስ እየ።+ ንሳቶም ድማ ኣብታ ንጊልያይ ያእቆብ ዝሃብክዋ ምድሮም+ ኪቕመጡ እዮም።+ 26  ብደሓን ኣብኣ ኪቕመጡን+ ኣባይቲ ኺሃንጹን ኣታኽልቲ ወይኒ ኺተኽሉን እዮም፣+ ኣብ ኵሎም እቶም ኣብ ዙርያኦም ኰይኖም ዚንዕቕዎም ዘለዉ ፍርዲ ምስ ፈጸምኩ፡ ብደሓን ኪቕመጡ እዮም፣+ ኣነ የሆዋ ኣምላኾም ምዃነይ ከኣ ኪፈልጡ እዮም።”’”

እግረ ጽሑፍ

ወይ፡ “መቓብር።”
ቃ.ቃ.፡ “መርኣያ ትሓትም ነበርካ።”
ወይ፡ “ስፍራ ኣታኽልቲ።”