ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት

መጽሓፍ ቅዱስ—ትርጉም ሓዳስ ዓለም See 2013 revision

2 ቈረንቶስ 5:1-21

5  እዛ ምድራዊት ናይ ድንኳን ቤትና እንተ ፈረሰት፡ ካብ ኣምላኽ ህንጻ፡ ማለት ብኢድ ዘይተገብረት ናይ ዘለኣለም ቤት ኣብ ሰማያት ከም እትህልወና፡ ንፈልጥ ኢና።  ከመይሲ፡ ነታ ኻብ ሰማይ ዝዀነት ክንለብስ እናናፈቕና፡ ኣብዛ መንበሪት እዚኣ ነስቈርቍር ኣለና፣  ምስ ለበስናያስ፡ ዕሩቓት ኴንና ኣይክንርከብን ኢና።  ንሕና ኣብዛ ድንኳን እዚኣ ዘለናስ፡ እቲ መዋቲ ብህይወት ምእንቲ ኺውሓጥ፡ ነታ ሓንቲ ኽንለብስ እምበር፡ ክንቅንጥጥ ስለ ዘይንደሊ፡ ከቢዱና ነስቈርቍር ኣለና።  እቲ ነዚ ዘዳለወና፡ ከም ዕርቡን ገይሩ ኸኣ መንፈስ ዝሃበና፡ ኣምላኽ እዩ።  እምበኣር፡ ኵሉ ሳዕ ትብዓት ኣሎና፣ ኣብዚ ሰብነት እዚ ኽሳዕ ዝሰፈርና ድማ፡ ካብ ጐይታ ርሑቓት ከም ዝዀንና፡ ንፈልጥ ኢና፣  ከመይሲ፡ ብምርኣይ ዘይኰነስ፡ ብእምነት ኢና እንመላለስ ዘለና።  ግናኸ፡ ትብዓት ኣሎና፣ ካብዚ ሰብነት እዚ ርሒቕና ምስ ጐይታ ኽንነብር እውን ምፈተና።  ስለዚ፡ ምስኡ ሰፊርና ንሃሉ ወይ ካብኡ ንርሓቕ፡ ብእኡ ተቐባልነት ኪህልወና ንጽዕት ኣለና። 10  ነፍሲ ወከፍ ከምቲ በዚ ሰብነት እዚ ኸሎ ዝገበሮ፡ ጽቡቕ ወይስ ክፉእ፡ ምእንቲ ኪቕበልሲ፡ ኵላትና ኣብ ቅድሚ መንበር ፍርዲ ክርስቶስ ክንቀርብ ኣሎና። 11  እምበኣር፡ ፍርሃት ጐይታ ስለ እንፈልጥ፡ ንሰባት ነእምን ኣለና፡ ንኣምላኽ ግና ግሁዳት ኢና። ንሕልናኹም እውን ግሁዳት ክንከውን ተስፋ እገብር። 12  ነቶም በቲ ኣብ ልቢ ዘሎ ዘይኰነስ፡ ብደጋዊ ትርኢት ዚምክሑ ምላሽ ምእንቲ ኽትህቡ፡ ብኣና ኽትምክሑ ምኽንያት ንህበኩም ኣለና እምበር፡ ከም ብሓድሽ ርእስና ኣይኰንናን ንንእድ ዘለና። 13  ከመይሲ፡ እንተ ተጸለልና፡ ንኣምላኽ ኢና፣ ምስ ቀልብና እንተ ዀንና ኸኣ፡ ንዓኻትኩም ኢና። 14  እታ ክርስቶስ ዘላቶ ፍቕሪ ደሪኻትና እያ፣ ምኽንያቱ፡ ሓደ ሰብ ምእንቲ ዅሉ ኸም ዝሞተ ደምዲምና ኢና፣ ስለዚ፡ ኵሎም ሞይቶም እዮም፣ 15  እቶም ብህይወት ዘለዉ ነቲ ምእንትኦም ዝሞተን ዝተንስአን እምበር፡ ደጊም ንርእሶም ከይነብሩ፡ ንሱ ምእንቲ ዅሎም ሞይቱ እዩ። 16  ስለዚ፡ ካብ ሕጂ ንደሓር ብስጋዊ መገዲ ንሓደ እኳ ኣይንፈልጥን ኢና። ንክርስቶስ ብስጋ እኳ እንተ ፈለጥናዮ፡ ሕጅስ ከምኡ ጌርና ኣይንፈልጦን ኢና። 17  ስለዚ፡ ሓደ እኳ ምስ ክርስቶስ ሓድነት እንተ ኣለዎ፡ ንሱ ሓድሽ ፍጥረት እዩ፣ እቲ ብሉይ ሓሊፉ፡ እንሆ፡ ሓድሽ ኰይኑ ኣሎ። 18  ኵሉ ግና ካብቲ ብክርስቶስ ኣቢሉ እተዓረቐናን ኣገልግሎት ዕርቂ ዝሃበናን ኣምላኽ እዩ፣ 19  ማለት፡ ኣምላኽ ኣበሳኦም ከይቈጸረ፡ ብክርስቶስ ኣቢሉ ንዓለም ምስ ርእሱ ይዓርቃ ኣሎ፣ ነቲ ቓል ዕርቂ ድማ ንዓና ብሕድሪ ሃበና። 20  እምበኣር፡ ንሕና ኣብ ክንዲ ክርስቶስ ኣምባሳደራት ኢና፣ ስለዚ፡ ኣምላኽ ብኣና ገይሩ ይምሕጸን ከም ዘሎ እዩ። ኣብ ክንዲ ክርስቶስ ኴንና፡ “ምስ ኣምላኽ ተዓረቑ” ኢልና ንልምን ኣለና። 21  ንሕና ብእኡ ጽድቂ ኣምላኽ ምእንቲ ኽንከውንሲ፡ እቲ ሓጢኣት ዘይፈለጠ፡ ኣብ ክንዳና ሓጢኣት ከም ዚኸውን ተገብረ።

እግረ ጽሑፍ