ናብ ትሕዝቶ ኺድ

ናብ ተወሳኺ ዝርዝር ኪድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት | መጽሓፍ ቅዱስ—ትርጉም ሓዳስ ዓለም See 2013 revision

1 ቈረንቶስ 8:1-13

8  ብዛዕባ እቲ ንጣኦታት እተሰውአ ኸኣ፦ ኵላትና ፍልጠት ከም ዘሎና፡ ንፈልጥ ኢና። ፍልጠት ይነፍሕ፡ ፍቕሪ ግና ይሃንጽ።  ሓደ እኳ ገለ ኸም ዚፈልጥ እንተ መሰሎ፡ ከምቲ ኺፈልጦ ዚግብኦ ገይሩ ኣይፈልጦን እዩ።  ሓደ ንኣምላኽ ዜፍቅሮ እንተሎ ግና፡ ንሱ ብእኡ ይፍለጥ እዩ።  ብዛዕባ እቲ ንጣኦታት እተሰውአ ምብላዕ ድማ፡ ጣኦት ኣብ ዓለም ሓንቲ እኳ ኸም ዘይኰነ፡ ብዘይካ ሓደ ኸኣ ካልእ ኣምላኽ ከም ዘየልቦ፡ ንፈልጥ ኢና።  ኣብ ሰማይ ወይስ ኣብ ምድሪ፡ “ኣማልኽቲ” ዚብሃሉ እኳ እንተ ኣለዉስ፡ ከምቲ ብዙሓት “ኣማልኽትን” ብዙሓት “ጐይተትን” ዘለዉ፡  ንዓናስ ኵሉ ኻብኡ ዚኸውን፡ ንሕና ድማ ንዕኡ እንኸውን ሓደ ኣምላኽ፡ ኣቦ፡ ኣሎና፣ ኵሉ ብእኡ ዚኸውን፡ ንሕና ኸኣ ብእኡ እንኸውን ሓደ ጐይታ እውን፡ የሱስ ክርስቶስ፡ ኣሎና።  ግናኸ፡ እዚ ፍልጠት እዚ ኣብ ኵሉ ሰብ ኣይርከብን እዩ፣ ገሊኦም ግና ኣቐዲሞም ምስ ጣኦት ሕብረት ስለ ዝነበሮም፡ ንጣኦት ከም እተሰውአ ገይሮም ይበልዑ ኣለዉ፣ ሕልናኦም ድኹም ብምዃኑ ድማ፡ ረኺሱ እዩ።  ብልዒ ግና ናብ ኣምላኽ ኣየቕርበናን እዩ፣ እንተ ዘይበላዕና፡ ኣይጐድለና፡ እንተ በላዕና እውን፡ ኣይውሰኸና።  ግናኸ፡ እዚ ናይ ምምራጽ መሰልኩም ነቶም ድኹማት መዐንቀፊ ኸይኰኖም፡ ተጠንቀቑ። 10  ከመይሲ፡ ሓደ ሰብ ንዓኻ፡ ፍልጠት ንዘሎካ፡ ኣብ ቤት ጣኦት ኣብ መኣዲ ተቐሚጥካ እንተ ረኣየካ፡ ሕልና እቲ ድኹም ንጣኦታት እተሰውአ ኽሳዕ ምብላዕዶ ኣይኪደፍርን እዩ፧ 11  ብፍልጠትካስ እቲ ድኹም፡ ማለት እቲ ምእንታኡ ክርስቶስ ዝሞተሉ ሓውካ ይጠፍእ ኣሎ። 12  በዚ ኸምዚ ንኣሕዋትኩም ምስ እትብድሉ፡ ነቲ ድኹም ሕልናኦም እውን ምስ እተቝስልዎ፡ ንክርስቶስ ኢኹም እትብድልዎ ዘለኹም። 13  እምበኣር፡ ብልዒ ንሓወይ ዚዕንቅፎ እንተ ዀይኑ፡ ንሓወይ ምእንቲ ኸየዐንቅፎስ፡ ንሓዋሩ ስጋ ኣይክበልዕን እየ።

እግረ ጽሑፍ