ናብ ትሕዝቶ ኺድ

ናብ ተወሳኺ ዝርዝር ኪድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት | መጽሓፍ ቅዱስ—ትርጉም ሓዳስ ዓለም See 2013 revision

1 ቈረንቶስ 11:1-34

11  ከምቲ ኣነ ንክርስቶስ ዝመስሎ ዘለኹ፡ ንስኻትኩም ንዓይ ምሰሉ።  ብዅሉ ስለ ዝዘከርኩምንን ከምቲ ዘመሓላለፍኩልኩም ጌርኩም ነቲ ስርዓታት ኣጽኒዕኩም ስለ ዝሓዝኩምዎን፡ እንእደኩም ኣለኹ።  ግናኸ፡ ርእሲ ሰብኣይ ዘበለ ክርስቶስ፡ ርእሲ ሰበይቲ ኸኣ ሰብኣይ፡ ርእሲ ክርስቶስ እውን ኣምላኽ ከም ዝዀነ፡ ክትፈልጡ እደሊ ኣለኹ።  ኣብ ርእሱ መጐልበቢ ገይሩ ዚጽሊ ወይ ዚንበ ሰብኣይ ዘበለ ዅሉ፡ ርእሱ የሕስር እዩ፣  ርእሳ ኸይተጐልበበት እትጽሊ ወይ እትንበ ሰበይቲ ዘበለት ኵላ ግና፡ ከም ልጽይቲ እያ እሞ፡ ርእሳ ተሕስር እያ።  ከመይሲ፡ ሰበይቲ ዘይትጕልበብ እንተ ዀነት፡ ጸጕራ ትቈረጽ፣ ግናኸ፡ ሰበይቲ ጸጕራ ኽትቍረጽ ወይ ክትላጸ ዜሕስራ ኻብ ኰነ፡ ትጐልበብ።  ሰብኣይ ምስልን ክብርን ኣምላኽ ስለ ዝዀነ፡ ርእሱ ኺጕልበብ ኣይግብኦን እዩ፣ ሰበይቲ ግና ክብሪ ሰብኣይ እያ።  ምኽንያቱ፡ ሰበይቲ ኻብ ሰብኣይ እያ እምበር፡ ሰብኣይሲ ኻብ ሰበይቲ ኣይኰነን፣  ከምኡ ድማ፡ ሰበይቲ እያ ምእንቲ ሰብኣይ እተፈጥረት እምበር፡ ሰብኣይሲ ምእንቲ ሰበይቲ ኣይተፈጥረን። 10  ስለዚ ኸኣ እዩ ሰበይቲ ስለ መላእኽቲ ኣብ ርእሳ ምልክት ተገዛእነት ኪህልዋ ዚግባእ። 11  ብጐይታ ግና ሰበይቲ ብዘይ ሰብኣይ ኣይትኸውንን እያ፣ ሰብኣይ ከኣ ብዘይ ሰበይቲ ኣይከውንን እዩ። 12  ከመይሲ፡ ከምቲ ሰበይቲ ኻብ ሰብኣይ ዝዀነት፡ ከምኡ ድማ ሰብኣይ ብሰበይቲ እዩ፣ ኵሉ ግና ካብ ኣምላኽ እዩ። 13  እስከ ባዕላትኩም ፍረዱ፦ ሰበይቲ ርእሳ ኸይተጐልበበት ናብ ኣምላኽ ክትጽሊዶ ይግባእ እዩ፧ 14  ሰብኣይ ጸጕሩ እንተ ኣንውሐ፡ ከም ዜሕስሮስ እቲ ባህርይ ባዕሉዶ ኣይምህረኩምን እዩ፧ 15  ሰበይቲ ጸጕራ እንተ ኣንውሐት ግና፡ ጸጕሪ ኽንዲ መጐልበቢ ስለ እተዋህባ፡ ንዓኣ ኽብራ ደይኰነን፧ 16  ምእንቲ ኻልእ ልምዲ ኺከራኸር ዚደሊ ሰብ እንተሎ ግና፡ ንሕናስ ካልእ የብልናን፣ ጉባኤታት ኣምላኽ እውን ካልእ የብለንን። 17  ግናኸ፡ እዚ ኽእዝዝ ከለኹ፡ ምእካብኩም ንዚገድድ እምበር፡ ንዚሓይሽ ስለ ዘይኰነ፡ ኣይንእደኩምን እየ። 18  ከመይሲ፡ ቅድሚ ዅሉ፡ ኣብ ጉባኤ ኽትእከቡ ኸለኹም፡ ኣብ መንጎኹም ፍልልይ ከም ዘሎ፡ እሰምዕ ኣለኹ፣ ነዚ እውን ብእተወሰነ እኣምኖ እየ። 19  ምኽንያቱ፡ እቶም ብቕዓቶም ዘመስከሩ ኣብ መንጎኹም ምእንቲ ኺግሃዱ፡ ኣብ መንጎኹም ኑፋቐ እውን ኪኸውን ኣለዎ። 20  እምበኣር፡ ብሓደ ኽትእከቡ ኸለኹም፡ ድራር ጐይታ ምብላዕ ኣይተኻእለን። 21  ከመይሲ፡ ኣብ እትበልዑሉ እዋን፡ ነፍሲ ወከፍ ኣቐዲሙ ድራሩ ስለ ዚበልዕ፡ ሓዲኡ ይጠሚ፡ ሓዲኡ ይሰክር ኣሎ። 22  እትበልዑሉን እትሰትዩሉን ኣባይቲዶ የብልኩምን እዩ፧ ወይስ ንጉባኤ ኣምላኽ ትንዕቁ፡ ነቶም ዘይብሎም እውን ተሕፍርዎም ዲኹም ዘለኹም፧ እንታይ እሞ ኽብለኩም፧ ክንእደኩምዶ፧ በዝስ ኣይንእደኩምን እየ። 23  ከመይሲ፡ እቲ ናባኻትኩም ዘመሓላለፍክዎ፡ ካብ ጐይታ ተቐቢለ እየ፦ ጐይታና የሱስ በታ ኣሕሊፍካ ዚውሃበላ ለይቲ፡ እንጌራ ኣልዓለ፣ 24  ኣመስጊኑ፡ ቈሪሱ፡ “እዚ ምእንታኹም ዚውሃብ ስጋይ ማለት እዩ። እዚ ንመዘከርታይ ግበርዎ” በለ። 25  ብዛዕባ እታ ጽዋእ እውን ድሕሪ ድራር፡ “እዛ ጽዋእ እዚኣ፡ ብደመይ ዚግበር ሓድሽ ኪዳን ማለት እያ። ብእትሰትይዋ መጠን፡ እዚ ንመዘከርታይ ግበርዎ” ብምባል ከምኡ ገበረ። 26  ማለት፡ እዛ እንጌራ እዚኣ ብእትበልዕዋ መጠን፡ እዛ ጽዋእ እዚኣ እውን ብእትሰትይዋ መጠን፡ ክሳዕ ጐይታ ዚመጽእ፡ ሞቱ ትነግሩ ኢኹም። 27  ስለዚ፡ ከይተገብኦ ነታ እንጌራ ዚበልዕ ወይስ ነታ ጽዋእ ጐይታ ዚሰቲ፡ ኣብ ስጋን ደምን ጐይታ እዩ ዚዕግብ። 28  ቅድም፡ ሰብ ርእሱ ይመርምር፣ ድሕሪኡ፡ ካብታ እንጌራ ይብላዕ፡ ካብታ ጽዋእ እውን ይስተ። 29  እቲ ዚበልዕን ዚሰትን ነቲ ስጋ እንተ ዘየለለዮ፡ ኣብ ርእሱ እዩ ፍርዲ ዚበልዕን ዚሰትን። 30  ስለዚ ኸኣ እዮም ኣብ መንጎኹም ብዙሓት ድኹማትን ሕሙማትን ዘለዉ፣ ሓያሎ እውን ሞይቶም ኣለዉ። 31  ግናኸ፡ መን ምዃንና እንተ ንፈልጥሲ፡ ኣይምተፈርደናን ነይሩ። 32  ክንፍረድ ከለና ግና፡ ምስ ዓለም ምእንቲ ኸይንዅነን፡ ብየሆዋ ንግሰጽ ኢና። 33  ስለዚ፡ ኣሕዋተየ፡ ነቲ ድራር ክትበልዑ ኽትእከቡ ኸለኹም፡ ንሓድሕድኩም ተጸባበዩ። 34  ምእካብኩም ንፍርዲ ምእንቲ ኸይከውንሲ፡ ዝጠመየ እንተሎ፡ ኣብ ቤቱ ይብላዕ። እቲ ዝተረፈ ግና ምስ መጻእኩ፡ ስርዓት ከትሕዞ እየ።

እግረ ጽሑፍ