ናብ ትሕዝቶ ኺድ

ናብ ተወሳኺ ዝርዝር ኪድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት | መጽሓፍ ቅዱስ—ትርጉም ሓዳስ ዓለም See 2013 revision

ግብሪ ሃዋርያት 4:1-37

4  እቶም ክልተ ንህዝቢ ኺዛረቡ ኸለዉ፡ ሊቃውንቲ ኻህናትን ሓለቓ ቤተ መቕደስን ሰዱቃውያንን መጽዎም፣  ንህዝቢ ይምህሩን የሱስ ካብ ምዉታት ምትንሳኡ የፍልጡን ስለ ዝነበሩ ኸኣ፡ ሓረቑ፣  ኣእዳዎም ዘርጊሖም ሓዝዎም፣ መስዩ ነበረ እሞ፡ ክሳዕ ንጽብሒቱ ናብ ቤት ማእሰርቲ ኣእተውዎም።  ካብቶም ነቲ ዘረባ ዝሰምዕዎ ብዙሓት ግና ኣመኑ፣ ቍጽሪ እቶም ሰብኡት ድማ ኣስታት 5,000 ኰነ።  ንጽብሒቱ፡ ኣሕሉቖምን ዓበይቶምን ጸሓፍቶምን ኣብ የሩሳሌም ተኣከቡ፣  (ምሳታቶም እውን ሃና እቲ ሊቀ ኻህናትን ቀያፋን ዮሃንስን እስክንድሮስን ቤተ ሰብ ሊቀ ኻህናት ዘበሉን ነበሩ)፣  ኣብ ማእከል ደው ኣቢሎም ድማ፡ “በየናይ ሓይሊ ወይስ ብስም መን ኢኹም እዚ ዝገበርኩም፧” ኢሎም ሓተትዎም።  ሽዑ፡ ጴጥሮስ ብመንፈስ ቅዱስ ተመሊኡ ኸምዚ በሎም፦ “ኣቱም ኣሕሉቕ ህዝብን ዓበይትን፡  ሎሚ ንሕና ብዛዕባ እቲ ንሓደ ሕሙም ሰብ እተገብረሉ ጽቡቕ ግብሪ ኻብ እንምርመር፡ ንዕኡ መን ከም ዘሕወዮ ኸኣ ክትፈልጡ ኻብ ደለኹም፡ 10  ብስም እቲ ንስኻትኩም ዝሰቐልኩምዎ፡ ኣምላኽ ግና ኻብ ምዉታት ዘተንስኦ የሱስ ክርስቶስ እቲ ናዝሬታዊ፡ ብእኡ እዚ ኣብ ቅድሜኹም ጥዕዩ ደው ኢሉ ኸም ዘሎ፡ ኣብ ኵላትኩምን ኣብ ኵሉ ህዝቢ እስራኤልን ይፈለጥ። 11  ‘እቲ ንስኻትኩም ነደቕቲ ዝነዓቕኩምዎ እሞ ርእሲ መኣዝን ዝዀነ እምኒ፡’ ንሱ እዩ። 12  ብእኡ ኽንድሕን ዚግባእ ካልእ ስም ኣብ ትሕቲ ሰማይ ንሰብ ኣይተዋህበን እሞ፡ ድሕነት ብኻልእ የልቦን።” 13  ትብዓት ጴጥሮስን ዮሃንስ ምስ ረኣዩ፡ ዘይተማህሩ ተራ ሰባት ምዃኖም ከኣ ምስ ተገንዘቡ፡ ገረሞም። ምስ የሱስ ከም ዝነበሩ ድማ ኣለለይዎም። 14  እቲ ዝሓወየ ሰብ ምሳታቶም ደው ኢሉ ይርእይዎ ብምንባሮም፡ ዚምልስዎ ኣይነበሮምን። 15  ስለዚ፡ ካብቲ ዋዕላ ኺወጹ ኣዘዝዎም እሞ፡ ንሓድሕዶም ተማኸሩ፡ 16  ከምዚ እናበሉ፦ “ኣሉ ኽንብላ ዘይንኽእል፡ ኣብ ኵሎም ነበርቲ የሩሳሌም እተጋህደት ፍልጥቲ ትእምርቲ ብኣታቶም ተገይራ እያ እሞ፡ ነዞም ሰባት እዚኦም እንታይ ንግበሮም፧ 17  ኣብ ህዝቢ ኣዝዩ ምእንቲ ኸይውረ ግና፡ በዚ ስም እዚ ንሓደ ሰብ እኳ ኸይዛረቡ ነፈራርሃዮም።” 18  ጸዊዖም ድማ፡ ብስም የሱስ ንሓደ እኳ ኸይዛረቡ ወይ ከይምህሩ ኣዘዝዎም። 19  ጴጥሮስን ዮሃንስን ግና፡ “ካብ ንኣምላኽ፡ ንዓኻትኩም ምስማዕ፡ ኣብ ቅድሚ ኣምላኽ ቅኑዕ እንተ ዀይኑ፡ ባዕላትኩም ፍረዱ። 20  ንሕና ግና፡ ብዛዕባ እቲ ዝረኣናዮን ዝሰማዕናዮን ምዝራብ ክንሓድግ ኣይንኽእልን ኢና” ኢሎም መለሱሎም። 21  ንሳቶም ከኣ ዜቕጽዕ ምኽንያት ስለ ዝሰኣኑ፡ ኵሎም እቶም ህዝቢ ድማ በቲ ዝዀነ ንኣምላኽ የመጕስዎ ስለ ዝነበሩ፡ መሊሶም ኣፈራሪሆም፡ ፈትሕዎም። 22  ከመይሲ፡ እቲ ትእምርቲ ምሕዋይ እተገብረሉ ሰብ፡ ዕድሚኡ ልዕሊ ኣርብዓ ዓመት ነበረ። 23  ምስ ተፈትሑ ኸኣ፡ ናብ ሰቦም ከይዶም፡ ሊቃውንቲ ኻህናትን ዓበይትን እንታይ ከም ዝበልዎም፡ ነገርዎም። 24  እዚ ምስ ሰምዑ፡ ሓቢሮም ድምጾም ናብ ኣምላኽ ኣልዒሎም ከምዚ በሉ፦ “ኦ ልዑላዊ ጐይታ፡ ሰማይን ምድርን ባሕርን ኣብኡ ዘሎ ዅሉን ዝገበርካ ንስኻ ኢኻ፣ 25  ብመንፈስ ቅዱስ፡ ብኣፍ ኣቦና ዳዊት ኣገልጋሊኻ ኸምዚ ዝበልካ እውን ንስኻ ኢኻ፦ ‘ስለምንታይ ኣህዛብ ረበሹ፡ ህዝብታትሲ ኸንቱ ሓሰቡ፧ 26  ንየሆዋን ንቕቡኡን ኪጻረሩስ፡ ነገስታት ምድሪ ቘሙ፡ ኣሕሉቕ ከኣ ተኣከቡ።’ 27  ብሓቂ ሄሮድስን ጶንጥዮስ ጲላጦስን ምስ ኣህዛብን ምስ ህዝቢ እስራኤልን ኰይኖም፡ ኣብዛ ኸተማ እዚኣ ነቲ ዝቐባእካዮ ቕዱስ ኣገልጋሊኻ የሱስ ንምጽራር ተኣኪቦም እዮም፣ 28  እዚ ድማ፡ እቲ ኢድካን ምኽርኻን ኣቐዲሙ ዝመደቦ ምእንቲ ኪኸውን እዩ። 29  ሕጂ ኸኣ፡ ኦ የሆዋ፡ ናብ ምፍርራሆም ቈላሕታኻ ግበር፣ ንባሮትካ እውን ብዅሉ ትብዓት ቃልካ ኺዛረቡ ፍቐደሎም፣ 30  ንምሕዋይ ከኣ ኢድካ ዘርግሕ፣ ብስም እቲ ቕዱስ ኣገልጋሊኻ የሱስ እውን ትእምርትታትን ተኣምራትን ግበር።” 31  ምስ ተማህለሉ ኸኣ፡ እታ ተኣኪቦምላ ዝነበሩ ቦታ ተናወጸት፣ ኵላቶም ድማ ብመንፈስ ቅዱስ ተመልኡ፡ ቃል ኣምላኽ እውን ብትብዓት ይዛረቡ ነበሩ። 32  ኵሎም እቶም ዝኣመኑ ድማ ሓንቲ ልብን ሓንቲ ነፍስን ነበሩ፣ ሓደ እኳ ንገንዘቡ ናተይ ኣይብልን ነበረ፣ የግዳስ፡ ኵሉ ናይ ሓባር ነበረ። 33  ሃዋርያት ከኣ ብዛዕባ ትንሳኤ ጐይታና የሱስ ብዓብዪ ሓይሊ ይምስክሩ ነበሩ፣ ኣብ ኵላቶም ድማ ዓብዪ ጸጋ ነበረ። 34  ሓደ ሽጉር እኳ ኣይነበሮምን፣ ከመይሲ፡ ኵሎም እቶም መሬት ወይ ኣባይቲ ዝነበሮም፡ ንዕኡ ሸይጦም፡ ንዋጋ እቲ እተሸጠ የምጽእዎ ነበሩ፣ 35  ኣብ ኣእጋር ሃዋርያት ከኣ የንብርዎ ነበሩ። እዚ ድማ፡ ንነፍሲ ወከፍ ከከም ዜድልዮ ይዕደል ነበረ። 36  እቲ ብሃዋርያት በርናባስ፡ ማለት ወዲ ምጽንናዕ እተባህለ ዮሴፍ ዝስሙ ሌዋዊ ብዓል ቆጵሮስ ከኣ፡ 37  መሬቱ ሸይጡ፡ ነቲ ገንዘብ ኣምጺኡ፡ ኣብ ኣእጋር ሃዋርያት ኣንበሮ።

እግረ ጽሑፍ