ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት

መጽሓፍ ቅዱስ—ትርጉም ሓዳስ ዓለም See 2013 revision

ማርቆስ 7:1-37

7  ካብ የሩሳሌም ዝመጹ ፈሪሳውያንን ገለ ኻብ ጸሓፍትን ናብኡ ተኣከቡ።  ገለ ኻብ ደቀ መዛሙርቱ ብዝረኸሳ፡ ማለት ብዘይተሓጽባ* ኣእዳው ኪበልዑ ምስ ረኣዩ፡—  ከመይሲ፡ ፈሪሳውያንን ኵሎም ኣይሁድን፡ ስርዓት ቀዳሞት ምእንቲ ኺሕልዉ፡ ክሳዕ ኵርናዕ ኢዶም እንተ ዘይተሓጺቦም ኣይበልዑን ነበሩ፣  ካብ ዕዳጋ ምስ ተመልሱ፡ ብምንጻግ ማይ እንተ ዘይነጺሆም ኣይበልዑን ነበሩ፣ ከም ምጥላቕ ጣሳን ዕትሮን ኣቕሓ ነሓስን ዝኣመሰለ ኺሕልውዎ ዘለዎም ብዙሕ ካልእ ስርዓታት እውን ነበሮም፣—  እዞም ፈሪሳውያንን ጸሓፍትን እዚኦም፡ “ስለምንታይ እዮም ደቀ መዛሙርትኻ ስርዓት ቀዳሞት ከይሕልዉስ፡ ብዝረኸሳ ኣእዳው ዚበልዑ፧” ኢሎም ሓተትዎ።  ንሱ ድማ፡ “ኣቱም ግቡዛት፡ ከምቲ ኣብ ጽሑፍ ዘሎ፡ ኢሳይያስ ብዛዕባኹም ጽቡቕ ተነበየ፦ ‘እዚ ህዝቢ እዚ ብኸናፍሩ የኽብረኒ፡ ልቡ ግና ካባይ ርሑቕ እዩ።  ትምህርቲ ትእዛዛት ሰብ ስለ ዚምህሩ፡ ንኸንቱ የምልኹኒ።’  ትእዛዝ ኣምላኽ ሓዲግኩም፡ ስርዓት ሰብ ትሕልዉ ኣለኹም” በሎም።  ከምዚ ኸኣ በሎም፦ “ስርዓትኩም ምእንቲ ኽትሕልዉ፡ ትእዛዝ ኣምላኽ ብሜላ ተፍርሱ ኣለኹም። 10  ንኣብነት፡ ሙሴ፡ ‘ኣቦኻን ኣዴኻን ኣኽብር፡’ ከምኡ ድማ ‘ንኣቦኡ ወይ ንኣዲኡ ሕማቕ ዚዛረብ ይሙት’ በለ። 11  ንስኻትኩም ግና፡ ‘ሓደ ሰብ ንኣቦኡ ወይ ንኣዲኡ፡ “እቲ ኻባይ እትረኽቦ ጥቕሚ፡ ቍርባን (ማለት፡ መባእ) ገይረዮ እየ” እንተ ኢሉ፡’ 12  ደጊም ንኣቦኡ ወይ ንኣዲኡ ሓንቲ እኳ ኺገብረሎም ኣይትሓድግዎን። 13  በዚ ኸምዚ፡ በቲ እተመሓላልፍዎ ስርዓት ንቓል ኣምላኽ ከንቱ ትገብርዎ። ነዚ ዚመስል ብዙሕ እውን ትገብሩ ኢኹም።” 14  ነቶም ህዝቢ ኸም ብሓድሽ ጸዊዑ፡ “ኵላትኩም ስምዑንን ኣስተውዕሉን። 15  እቲ ኻብ ሰብ ዚወጽእ እዩ ንሰብ ዜርክሶ እምበር፡ እቲ ኻብ ወጻኢ ናብ ሰብ ዚኣቱስ ኬርክሶ ኣይክእልን እዩ” በሎም። 16  *—— 17  ካብቶም ህዝቢ ተፈልዩ ናብ ቤት ምስ ኣተወ፡ ደቀ መዛሙርቱ ብዛዕባ እታ ምሳሌ ሓተትዎ። 18  ከምዚ ኸኣ በሎም፦ “ንስኻትኩም እውንዶ ገና ኣይተስተውዕሉን ኢኹም፧ ካብ ወጻኢ ናብ ሰብ ዚኣቱ፡ ኬርክሶ ኸም ዘይክእልዶ ኣይትፈልጡን ኢኹም፧ 19  ከመይሲ፡ ናብ ልቢ ዘይኰነስ፡ ናብ ከብዲ እዩ ዚወርድ፣ ንግዳም ከኣ ይወጽእ።” በዚ ኸምዚ፡ ንዅሉ ምግቢ ኣንጽሀ። 20  ከምዚ ድማ በለ፦ “እቲ ኻብ ሰብ ዚወጽእ እዩ ንሰብ ዜርክሶ፣ 21  ከመይሲ፡ ካብ ውሽጢ ልቢ ሰብ ዚወጽእ፡ ጐዳኢ ሓሳብ፡ ምንዝርና፡ ስርቂ፡ ቅትለት፡ 22  ዝሙት፡ ስስዐ፡ እከይ፡ ተንኰል፡ ንውርምና፡* ቅንኢ፡* ጸርፊ፡ ትዕቢት፡ ዕሽነት እዩ። 23  እዚ ዅሉ እከይ ካብ ውሽጢ እዩ ዚወጽእ፡ ንሰብ ከኣ የርክሶ።” 24  ካብኡ ተንሲኡ ናብ ዞባታት ጢሮስን ሲዶንን ከደ። ናብ ቤት ከኣ ኣተወ፣ ሓደ እኳ ኺፈልጥ ድማ ኣይደለየን። ግናኸ፡ ኪሕባእ ኣይከኣለን። 25  ብኡብኡ፡ ጓላ ርኹስ መንፈስ ዝሓደራ ሓንቲ ሰበይቲ ብዛዕባኡ ሰሚዓ መጸት እሞ፡ ኣብ እግሩ ተደፍአት። 26  እታ ሰበይቲ ግሪኻዊት፡ ዜግነታ ሶርያ-ፊንቄኣዊት ነበረት፣ ካብ ጓላ ጋኔን ኬውጽኣላ ኸኣ ለመነቶ። 27  ንሱ ግና፡ “እንጌራ ውሉዳት ኣልዒልካ ንዀራኹር ምድርባይ ግቡእ ኣይኰነን እሞ፡ ቅድም እቶም ውሉዳት ይጽገቡ” በላ። 28  ንሳ ግና፡ “እወ ጐይታይ፡ ኰራኹር እውን ካብ ትሕቲ መኣዲ ርፍራፍ ውሉዳት ይበልዑ እዮም” ኢላ መለሰትሉ። 29  ሽዑ፡ ንሱ፡ “ከምኡ ስለ ዝበልኪ፡ ኪዲ፣ እቲ ጋኔን ካብ ጓልኪ ወጺኡ ኣሎ” በላ። 30  ናብ ቤታ ምስ ተመልሰት፡ እታ ቘልዓ ኣብ ዓራት ደቂሳ፡ እቲ ጋኔን ከኣ ወጺኡላ ረኸበታ። 31  የሱስ ካብ ዞባታት ጢሮስ ምስ ተመልሰ፡ ብሲዶን ኣቢሉ፡ ብማእከል ዞባታት ደካጶሊስ* ናብ ባሕሪ ገሊላ ኸደ። 32  ሓደ ጸማምን ለኻትን ድማ ኣምጽኡሉ፣ ኢዱ ኼንብረሉ ኸኣ ለመንዎ። 33  ካብቶም ህዝቢ ንበይኑ ወሲዱ ድማ፡ ኣጻብዑ ኣብ ኣእዛን እቲ ሰብኣይ ኣንቢሩ፡ ጡፍ ኢሉ ልሳኑ ተንከዮ። 34  ናብ ሰማይ ቍሊሕ ኢሉ ኣዕሚቑ ድሕሪ ምስትንፋስ ከኣ፡ “ኤፋታ” በሎ፣ እዚ ኸኣ፡ “ተኸፈት” ማለት እዩ። 35  ሽዑ፡ ኣእዛኑ ተኸፍታ፡ ማእሰርቲ ልሳኑ ተፈትሐ፡ ኣጽርዩ ድማ ተዛረበ። 36  ንሓደ እኳ ኸይነግሩ ኸኣ ኣዘዞም፣ ብመጠን እቲ ዚእዝዞም ዝነበረ ግና፡ ኣዝዮም የውርዩ ነበሩ። 37  ብዙሕ ይግረሙ፡ “ንዅሉ ጽቡቕ ገይርዎ። ጸማማት ከም ዚሰምዑ፡ ዓባሳት ከኣ ከም ዚዛረቡ ገይሩ” ድማ ይብሉ ነበሩ።

እግረ ጽሑፍ

ማር 7:2 * ማለት፡ ብወግዒ ዘይነጽሃ።
ማር 7:16 * እዛ ፍቕዲ እዚኣ፡ ኣብቲ ብዌስትኮትን ሆርትን እተዳለወ ጽሑፍ ግሪኽኛን ኣብ ካልእ መበቈላዊ ጽሑፋት እቲ ናይ ክርስትያን ቅዱሳት ጽሑፋት ግሪኽኛን ኣይትርከብን እያ።
ማር 7:22 * ኣብ ማህደረ ቓላት፡ ኣብ “ንውርምና” ርአ።
ማር 7:22 * ቃል ብቓሉ፡ “ቀናእ ዓይኒ።”
ማር 7:31 * ወይ፡ “ዓሰርተ ኸተማ።”