ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት

መጽሓፍ ቅዱስ—ትርጉም ሓዳስ ዓለም See 2013 revision

ሉቃስ 3:1-38

3  ኣብ መበል ዓሰርተው ሓሙሽተ ዓመት መግዛእቲ ጢቤርዮስ ቄሳር፡ ጶንጥዮስ ጲላጦስ ኣብ ይሁዳ ሹም ኰይኑ ኸሎ፡ ሄሮድስ ድማ ገዛኢ ኣውራጃ ገሊላ ኸሎ፡ ፊልጶስ ሓዉ ግና ገዛኢ ኣውራጃ ሃገረ ኢጡርያን ጥራኮኒቲስን ከሎ፡ ሊሳንያስ እውን ገዛኢ ኣውራጃ ኣቢለኔ ኸሎ፡  ሃናን ቀያፋን ሊቃውንቲ ኻህናት ከለዉ፡ ቃል ኣምላኽ ናብ ዮሃንስ ወዲ ዘካርያስ፡ ኣብ በረኻ መጸ።  ንሱ ድማ ንሕድገት ሓጢኣት ዚኸውን ጥምቀት ንስሓ እናሰበኸ፡ ኣብ ኵሉ ኸባቢ ዮርዳኖስ ዞረ፣  እዚ ኸኣ ከምቲ ኣብ ቃል መጽሓፍ ነብዪ ኢሳይያስ ከምዚ ዚብል እተጻሕፈ እዩ፦ “እንሆ፡ ከምዚ እናበለ ኣብ በረኻ ይጭድር ኣሎ፦ ‘መገዲ የሆዋ ኣዳልዉ! ጽርግያታቱ ኣቕንዑ!  ስንጭሮ ዘበለ ይመላእ፡ ከረንን ኵርባን ዘበለ ለጥ ይበል፡ ጥውይዋይ ከኣ ትኽ ይበል፡ ድንጉር እውን እተመድመደ መገዲ ይኹን፣  ስጋ ዘበለ ዅሉ ድማ፡ ኣምላኽ ዜድሕነሉ መገዲ ኺርኢ እዩ።’”  ነቶም ብእኡ ኺጥመቑ ዚመጹ ህዝቢ ኸኣ ከምዚ በሎም፦ “ኣቱም ውሉዳት ኣፍዑት፡* ካብቲ ዚመጽእ ቍጥዓ ኸተምልጡ ደኣ መን ኣጠንቀቐኩም፧  እምበኣር፡ ንንስሓ ዚበቅዕ ፍረ ፍረዩ። ብልብኹም፡ ‘ኣብርሃም ኣቦ ኣሎና’ ኢልኩም ኣይትሕሰቡ። ከመይሲ፡ ኣምላኽ ንኣብርሃም፡ ካብዚ ኣእማን እዚ ውሉዳት ኬተንስኣሉ ይኽእል እዩ፡ እብለኩም ኣለኹ።  ድሮ እኳ ፋስ ኣብ ሱር እቲ ኣእዋም ተነቢሩ ኣሎ። እምበኣር፡ ጽቡቕ ፍረ ዘይፈሪ ዅሉ ኦም ይቝረጽ፡ ናብ ሓዊ ድማ ይድርበ።” 10  እቶም ህዝቢ ኸኣ፡ “እንታይ እሞ ንግበር፧” ኢሎም ይሓትትዎ ነበሩ። 11  ንሱ ድማ፡ “ክልተ ቐምሽ ዘለዎ፡ ነቲ ዘይብሉ ይምቀሎ፣ ዚብላዕ ዘለዎ እውን፡ ከምኡ ይግበር” ኢሉ ይምልሰሎም ነበረ። 12  ኣከብቲ ቐረጽ እውን ኪጥመቑ መጺኦም፡ “መምህር፡ እንታይ ንግበር፧” በልዎ። 13  ንሱ ኸኣ፡ “ካብቲ እተመደበ ቐረጽ፡ ሕልፊ ኣይተኽፍሉ” በሎም። 14  ወተሃደራት እውን፡ “ንሕናኸ እንታይ ንግበር፧” ኢሎም ሓተትዎ። ንሱ ኸኣ፡ “ንሓደ እኳ ኣይትግፍዑ፡ ብሓሶት እውን ኣይትኽሰሱ፣ ደሞዝኩም ይእከልኩም” በሎም። 15  እቶም ህዝቢ ይጽበዩ ነበሩ እሞ፡ ኵላቶም ብዛዕባ ዮሃንስ፡ “ክርስቶስ ደዀን ይኸውን፧” ኢሎም ብልቦም ይሓስቡ ነበሩ። 16  ዮሃንስ ከኣ ንዅላቶም ከምዚ ኢሉ መለሰሎም፦ “ኣነስ ብማይ አጥምቐኩም ኣለኹ፣ እቲ ኻባይ ዚብርትዕ፡ ኣነ ስራኽ ኣሳእኑ ንምፍታሕ ዘይበቅዕ ግና ይመጽእ ኣሎ። ንሱ ብመንፈስ ቅዱስን ብሓውን ኬጥምቐኩም እዩ። 17  ንዓውዱ ኣጸቢቑ ዜጽርየሉ፡ ንስርናዩ ኸኣ ኣብ ማዕከኑ ዚእክበሉ መዝረዊኡ ኣብ ኢዱ እዩ፣ ነቲ ብቝቡቝ ግና ብዘይጠፍእ ሓዊ ኼንድዶ እዩ።” 18  ነቶም ህዝቢ ብዙሕ ካልእ እናመዓዶም ድማ የበስሮም ነበረ። 19  ግናኸ፡ ንሄሮድስ እቲ ገዛኢ ኣውራጃ፡ ብዛዕባ ሄሮድያዳ ሰበይቲ ሓዉን ብዛዕባ እቲ ዝገበሮ ዅሉ እከይን ምስ ገንሖ፡ 20  ንሱ እዚ ዅሉ ኸይኣኽሎ፡ ንዮሃንስ ኣብ ቤት ማእሰርቲ ዳጐኖ። 21  ኰነ ድማ፡ ኵሉ እቲ ህዝቢ ምስ ተጠምቀ፡ የሱስ እውን ተጠምቀ። ኪጽሊ ኸሎ ድማ፡ ሰማይ ተኸፍተ፡ 22  መንፈስ ቅዱስ እውን ከም ርግቢ ኣብኡ ወረደ፣ ካብ ሰማይ ከኣ፡ “ዝሰመርኩኻ፡ ፍቑር ወደይ ንስኻ ኢኻ” ዚብል ድምጺ መጸ። 23  የሱስ ዕዮኡ ኺጅምር ከሎ፡ ወዲ ሰላሳ ዓመት ኣቢሉ ነበረ፣ ወዲ ዮሴፍ ድማ ይመስሎም ነበረ፡ ወዲ ሄሊ፡ 24  ወዲ ማጣት፡ ወዲ ሌዊ፡ ወዲ መልኪ፡ ወዲ ያና፡ ወዲ ዮሴፍ፡ 25  ወዲ ማጣትዩስ፡ ወዲ ኣሞጽ፡ ወዲ ናሆም፡ ወዲ ኣስሊ፡ ወዲ ናጌ፡ 26  ወዲ መኣት፡ ወዲ ማጣትዩስ፡ ወዲ ሴሜን፡ ወዲ ዮሴኽ፡ ወዲ ዮዳ፡ 27  ወዲ ዮናን፡ ወዲ ሬሳ፡ ወዲ ዘሩባቤል፡ ወዲ ሰኣልቲኤል፡ ወዲ ኔሪ፡ 28  ወዲ መልኪ፡ ወዲ ኣዲ፡ ወዲ ቆሳም፡ ወዲ ኤልማዳም፡ ወዲ ዔር፡ 29  ወዲ የሱስ፡ ወዲ ኤልዔዘር፡ ወዲ ዮሪም፡ ወዲ ማጣት፡ ወዲ ሌዊ፡ 30  ወዲ ስምኦን፡ ወዲ ይሁዳ፡ ወዲ ዮሴፍ፡ ወዲ ዮናም፡ ወዲ ኤልያቂም፡ 31  ወዲ ሜልያ፡ ወዲ ሜና፡ ወዲ ማጣታ፡ ወዲ ናታን፡ ወዲ ዳዊት፡ 32  ወዲ እሴይ፡ ወዲ ዖቤድ፡ ወዲ ቦኣዝ፡ ወዲ ሰልሞን፡ ወዲ ነኣሶን፡ 33  ወዲ ኣሚናዳብ፡ ወዲ ኣርኒ፡ ወዲ ሔጽሮን፡ ወዲ ፋሬስ፡ ወዲ ይሁዳ፡ 34  ወዲ ያእቆብ፡ ወዲ ይስሃቅ፡ ወዲ ኣብርሃም፡ ወዲ ታራ፡ ወዲ ናሆር፡ 35  ወዲ ሴሩግ፡ ወዲ ረጉ፡ ወዲ ፌሌግ፡ ወዲ ዔበር፡ ወዲ ሸላሕ፡ 36  ወዲ ቃይናን፡ ወዲ ኣርፋክሳድ፡ ወዲ ሴም፡ ወዲ ኖህ፡ ወዲ ላሜክ፡ 37  ወዲ ማቱሳላ፡ ወዲ ሄኖክ፡ ወዲ ያሬድ፡ ወዲ መላልኤል፡ ወዲ ቃይናን፡ 38  ወዲ ሄኖስ፡ ወዲ ሴት፡ ወዲ ኣዳም፡ ወዲ ኣምላኽ።

እግረ ጽሑፍ

ሉቃ 3:7 * መርዛም ዓይነት ተመን።