ናብ ትሕዝቶ ኺድ

ናብ ተወሳኺ ዝርዝር ኪድ

ናብ ትሕዝቶ ኺድ

ናይ የሆዋ መሰኻኽር

ትግርኛ

መጽሓፍ ቅዱስ ኢንተርነት | መጽሓፍ ቅዱስ—ትርጉም ሓዳስ ዓለም See 2013 revision

ሉቃስ 24:1-53

24  በታ ቐዳመይቲ መዓልቲ ሰሙን ግና፡ ነቲ ዘዳለዋኦ ሽቱ ሒዘን፡ ኣንጊሀን ናብቲ መቓብር ከዳ።  እቲ እምኒ ኸኣ ካብቲ መቓብር ተንከባሊሉ ረኸባኦ፣  ምስ ኣተዋ ድማ፡ ሬሳ ጐይታና የሱስ ኣይረኸባን።  በዚ ደንጽዩወን ከሎ፡ እንሆ፡ ብርቕርቕ ዚብል ክዳን እተኸድኑ ኽልተ ሰብኡት ኣብ ጥቓአን ደው በሉ።  ፈሪሀን ገጸን ናብ ምድሪ ምስ ኣድነና ኸኣ፡ “ስለምንታይ ነቲ ህያው ኣብ መንጎ ምዉታት ትደልያኦ ኣለኽን፧  [ኣብዚ የሎን፡ ተንሲኡ እዩ።]* ኣብ ገሊላ ኸሎ፡ እንታይ ከም እተዛረበ ዘክራ፣  ወዲ ሰብ ኣብ ኢድ ሓጥኣን ሰባት ኣሕሊፍካ ኺውሃብን ኪስቀልን ብሳልሰይቲ መዓልቲ ኺትንስእን ምዃኑ ተዛሪቡ ነይሩ” በልወን።  ንሳተን ከኣ ነቲ ዘረባኡ ዘከራኦ፣  ካብቲ መቓብር ተመሊሰን ድማ፡ እዚ ዅሉ ነቶም ዓሰርተው ሓደን ንዅሎም ካልኦትን ነገራኦም። 10  ንሳተን፡ ማርያም መግደላዊትን ዮሃናን ማርያም ኣደ ያእቆብን ነበራ። ምሳታተን ዝነበራ ኻልኦት ኣንስቲ እውን፡ እዚ ንሃዋርያት ይነግራኦም ነበራ። 11  እዚ ዘረባ እዚ ግና፡ ሃተውቀጠው ኰይኑ ተራእዮም፡ ኣይኣመንወንን ከኣ። 12  [ጴጥሮስ ግና ተንሲኡ ናብቲ መቓብር ጐየየ፣ ድንን ኢሉ ኸኣ፡ መግነዝ ጥራይ ረኣየ። በቲ ዝዀነ ብልቡ እናተገረመ እውን ከደ።]* 13  እንሆ ኸኣ፡ በታ መዓልቲ እቲኣ፡ ክልተ ኻባታቶም ካብ የሩሳሌም ዓሰርተው ሓደ ኪሎ ሜተር ኣቢላ ናብ እትርሕቕ ኤማሁስ እትብሃል ቍሸት ይኸዱ ነበሩ፣ 14  ብዛዕባ እቲ ዝዀነ ዅሉ ኸኣ፡ ይዘራረቡ ነበሩ። 15  ኪዘራረቡን ኪመያየጡን ከለዉ ድማ፡ የሱስ ባዕሉ ቐሪቡ ምሳታቶም ከደ፣ 16  ኣዒንቶም ግና ኬለልያኦ ኣይከኣላን። 17  ንሱ ድማ፡ “እናኸድኩም እትዘራረቡሉ ዘለኹም ዘረባስ እንታይ እዩ፧” በሎም። ንሳቶም ከኣ ገጾም ብጕሁዩ ደው በሉ። 18  ሓደ ቀለዮጳ ዝስሙ ድማ፡ “በዘን መዓልትታት እዚአን ኣብ የሩሳሌም ዝዀነ ነገር ዘይትፈልጥሲ፡ ንስኻ በይንኻዶ ጋሻ ኢኻ፧” ኢሉ መለሰሉ። 19  ንሱ ኸኣ “እንታይ እዩ፧” በሎም። ንሳቶም ድማ ከምዚ በልዎ፦ “እዚ ናይ የሱስ እቲ ናዝሬታዊ ነገር፡ ኣብ ቅድሚ ኣምላኽን ኵሉ ህዝብን ብግብርን ብቓልን ብርቱዕ ዝነበረ ነብዪ፣ 20  ሊቃውንቲ ኻህናትናን ኣሕሉቕናን ከመይ ገይሮም ንፍርዲ ሞት ኣሕሊፎም ከም ዝሃብዎን ከም ዝሰቐልዎን፣ 21  ንሕና ግና፡ እቲ ንእስራኤል ዜድሕን ንሱ ኸም ዝዀነ ተስፋ ንገብር ኔርና፣ ኣብ ርእሲ እዚ ዅሉ ኸኣ፡ እዚ ኻብ ዚኸውን፡ ሎሚ ሳልሰይቲ መዓልቲ እያ። 22  ግናኸ፡ ካባታትና ገለ ኣንስቲ ኣስተንከራና፣ ኣንጊሀን ናብቲ መቓብር ከይደን ነበራ፣ 23  ንሬሳኡ ግና ኣይረኸባኦን፡ ህያው ምዃኑ ዝነገርወን መላእኽቲ ብራእይ ከም ዝረኣያ ኸኣ መጺአን ነገራና። 24  ገለ ኻባና ናብቲ መቓብር ከዱ፣ ከምቲ እተን ኣንስቲ ዝበላኦ ዀይኑ ረኸቡ፣ ንዕኡ ግና ኣይረኣይዎን።” 25  ንሱ ድማ፡ “ኣቱም ንዅሉ እቲ ነብያት እተዛረብዎ ንምእማን ልቦም ዝድንጉይ ዓያሹ! 26  ክርስቶስ እዚ መከራ እዚ ኺጸግብን ናብ ክብሩ ኺኣቱን ናይ ግዲ ደይኰነን፧” በሎም። 27  ካብ ሙሴን ካብ ኵሎም ነብያትን ጀሚሩ ኸኣ፡ እቲ ብዛዕባኡ ኣብ ኵሉ ቕዱሳት ጽሑፋት ዘሎ ተርጐመሎም። 28  ናብታ ዚኸድዋ ዝነበሩ ቝሸት ምስ ቀረቡ ኸኣ፡ ሓሊፉ ኸም ዚኸይድ መሰለ። 29  ንሳቶም ግና፡ “መስዩ እዩ፡ መዓልቲ እውን ዓሪባ እያ እሞ፡ ምሳና ሕደር” ኢሎም ግዲ በልዎ። 30  ምሳታቶም ኣብ መኣዲ ምስ ተቐመጠ፡ እንጌራ ኣልዒሉ፡ ባሪኹ፡ ቈሪሱ ሃቦም። 31  ሽዑ፡ ኣዒንቶም ተኸፍታ እሞ፡ ኣለለይዎ፣ ንሱ ግና ካባታቶም ተሰወረ። 32  ንሓድሕዶም ከኣ፡ “ኣብ መገዲ ኺዛረበናን ነቲ ቕዱሳት ጽሑፋት ኪገልጸልናን ከሎዶ ግዳ ልብና ይነድድ ኣይነበረን፧” ተባሃሃሉ። 33  በታ ሰዓት እቲኣ ተንሲኦም ናብ የሩሳሌም ተመልሱ፣ ነቶም ዓሰርተው ሓደን ነቶም ምሳታቶም ዝነበሩን ከኣ ተኣኪቦም ረኸብዎም፣ 34  “ጐይታ ብሓቂ ተንሲኡ፡ ንስምኦን እውን ተራእይዎ” ኪብሉ ኸኣ ጸንሕዎም። 35  ንሳቶም ባዕላቶም ድማ፡ እቲ ኣብ መገዲ ዝዀነን እንጌራ ምስ ቈረሰ ብኸመይ ከም ዘለለይዎን፡ ነገርዎም። 36  እዚ ኺዘራረቡ ኸለዉ ኸኣ፡ ንሱ ባዕሉ ኣብ ማእከሎም ደው በለ፣ [“ሰላም ንዓኻትኩም ይኹን” ድማ በሎም።]* 37  ተሸቢሮምን ፈሪሆምን ስለ ዝነበሩ ግና፡ መንፈስ ዝረኣዩ መሰሎም። 38  ንሱ ኸኣ፡ “ስለምንታይ እትርበሹ፧ ስለምንታይከ ኣብ ልብኹም ጥርጣረ ዚፍጠር፧ 39  ኣነ ባዕለይ ምዃነይ፡ ኣእዳወይን ኣእጋረይን ርኣዩ፣ መንፈስሲ ኸምዚ ኣባይ እትርእይዎ ዘለኹም ስጋን ዓጽምን የብሉን እሞ፡ ኣረምስሱንን ርኣዩንን” በሎም። 40  [እዚ ኢሉ ኸኣ፡ ኣእዳዉን ኣእጋሩን ኣርኣዮም።]* 41  ካብ ሓጐስ እተላዕለ ምእማን ስኢኖም ኪግረሙ ኸለው፡ ንሱ፡ “ገለ ዚብላዕዶ ኣብዚ ኣሎኩም፧” በሎም። 42  ንሳቶም ከኣ ምቃል ጥቡስ ዓሳ ሃብዎ፣ 43  ንሱ ድማ ተቐቢሉ ኣብ ቅድሚኦም በልዐ። 44  ንሱ ኸኣ፡ “እዚ እቲ ምሳኻትኩም ከለኹ፡ ኣብ ሕጊ ሙሴን ኣብ ነብያትን ኣብ መዝሙራትን ብዛዕባይ እተጻሕፈ ዅሉ ኺፍጸም ከም ዚግባእ ዝነገርኩኹም ቃለይ እዩ” በሎም። 45  ሽዑ፡ ነቲ ቕዱሳት ጽሑፋት ኬስተውዕልዎ፡ ኣእምሮኦም ከፈተሎም፣ 46  “ከምዚ ተባሂሉ ተጻሒፉ እዩ፦ ክርስቶስ መከራ ኺጸግብ፡ ብሳልሰይቲ መዓልቲ ድማ ካብ ምዉታት ኪትንስእ፡ 47  ብስሙ ኸኣ ንሕድገት ሓጢኣት ዚኸውን ንስሓ ኻብ የሩሳሌም ጀሚሩ ኣብ ኵሎም ኣህዛብ ኪስበኽ እዩ፣ 48  ንስኻትኩም ናይዚ መሰኻኽር ክትኰኑ ኢኹም። 49  እንሆ ድማ፡ እቲ ኣቦይ ዘተስፈወኩም ክሰድደልኩም እየ። ንስኻትኩም ግና ካብ ላዕሊ ሓይሊ ኽሳዕ እትለብሱ፡ ኣብዛ ኸተማ ጽንሑ” እውን በሎም። 50  ናብ ወጻኢ ድማ፡ ክሳዕ ቢታንያ ወሰዶም፣ ኣእዳዉ ኣልዒሉ እውን ባረኾም። 51  ኪባርኾም ከሎ ኸኣ፡ ካባታቶም ተፈልየ፡ ናብ ሰማይ እውን ተወስደ። 52  ንሳቶም ከኣ ሰገዱሉ፡ ብብዙሕ ሓጐስ እውን ናብ የሩሳሌም ተመልሱ። 53   ንኣምላኽ እናባረኹ ኸኣ ኵሉ ሳዕ ኣብ ቤተ መቕደስ ነበሩ።

እግረ ጽሑፍ

ሉቃ 24:6 * እዘን ቃላት እዚአን ኣብ ገሊኡ ኢደ ጽሑፋት ዚርከባ እኳ እንተ ዀና፡ ኣብ ሓያሎ ወግዓዊ ኢደ ጽሑፋት ግና ኣይርከባን እየን።
ሉቃ 24:12 * እዘን ቃላት እዚአን ኣብ ገሊኡ ኢደ ጽሑፋት ዚርከባ እኳ እንተ ዀና፡ ኣብ ሓያሎ ወግዓዊ ኢደ ጽሑፋት ግና ኣይርከባን እየን።
ሉቃ 24:36 * እዘን ቃላት እዚአን ኣብ ገሊኡ ኢደ ጽሑፋት ዚርከባ እኳ እንተ ዀና፡ ኣብ ሓያሎ ወግዓዊ ኢደ ጽሑፋት ግና ኣይርከባን እየን።
ሉቃ 24:40 * እዘን ቃላት እዚአን ኣብ ገሊኡ ኢደ ጽሑፋት ዚርከባ እኳ እንተ ዀና፡ ኣብ ሓያሎ ወግዓዊ ኢደ ጽሑፋት ግና ኣይርከባን እየን።