ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

“ንርእስኹም ብፍቕሪ ኣምላኽ ሓልውዋ”

 መመላእታ ጽሑፍ

ንሰንደቕ ዕላማ ሰላምታ ምሃብ፡ ምድማጽ፡ ከምኡውን ሲቭላዊ ኣገልግሎት

ንሰንደቕ ዕላማ ሰላምታ ምሃብ፡ ምድማጽ፡ ከምኡውን ሲቭላዊ ኣገልግሎት

ንሰንደቕ ዕላማ ሰላምታ ምሃብ። ናይ የሆዋ መሰኻኽር: እቲ መብዛሕትኡ ግዜ ምስ ሃገራዊ መዝሙር ተተሓሒዙ ዚግበር ንሰንደቕ ዕላማ ምስጋድ ወይ ሰላምታ ምሃብ: ድሕነት ካብ ኣምላኽ ዘይኰነስ ካብ መንግስቲ ወይ ካብ መራሕቲ ኸም ዚመጽእ ዚግለጸሉ ምስ ኣምልኾ እተተሓሓዘ ተግባር ምዃኑ እዮም ዚኣምኑ። (ኢሳይያስ 43:11፣ 1 ቈረንቶስ 10:14፣ 1 ዮሃንስ 5:21) ሓደ ኻብቶም ከምዚ ኺግበረሉ ዝደለየ መራሕቲ: ነቡካድነጻር ንጉስ ጥንታዊት ባቢሎን እዩ ነይሩ። እዚ ሓያል ንጉስ እዚ ንሰባት በቲ ግርማኡን ሃይማኖታዊ ቕንኣቱን ምእንቲ ኺምስጦም ኢሉ: ሓደ ዓብዪ ምስሊ ኣቘመ: ንተገዛእቱ ድማ ከም ሃገራዊ መዝሙር ዝኣመሰለ ሙዚቃ ኺውቃዕ ከሎ ነቲ ምስሊ ኺሰግዱሉ ኣገደዶም። ሲድራቅን ሚሳቅን ዓብድ-ኔጎን ዝስሞም ሰለስተ እብራውያን ግን: ዋላ እውን ከም ዚቕተሉ መጠንቀቕታ እንተ ተዋህቦም: ነቲ ምስሊ ምስጋድ ኣበዩ።—ዳንኤል ምዕራፍ 3

ካርልተን ሀይዝ ዚበሃል ጸሓፍ ታሪኽ ብዛዕባ እዚ ግዜና: “ኣብ ሃገራውነት: ቀንዲ ምልክት እምነትን ኣምልኾ ዝወሃቦ ነገርን ሰንደቕ ዕላማ እዩ” በለ። ኣስዕብ ኣቢሉ: “ሰንደቅ ዕላማ ኺሓልፍ ከሎ ሰብኡት ቆብዖም የውጽኡ፣ ንሰንደቕ ዕላማ ንምውዳስ ድማ ገጠምቲ ናእዳ ይጽሕፉ: ቈልዑ እውን መዝሙራት ይዝምሩ” በለ። ብተወሳኺ: ሃገራውነት ከም ኣብ ሕቡራት  መንግስትታት ኣመሪካ ብ4 ሓምለ ዚበዓል ዝኣመሰለ ናይ ርእሱ በዓላት ከም ዘለዎ: ኣብ ልዕሊኡ እውን ናይ ርእሱ “ቕዱሳትን ጀጋኑን” ከምኡውን ናይ ርእሱ “ኣብያተ-መቕደስ” ወይ ቅዱስ ቦታታት ከም ዘለዎ ገለጸ። ኣብ ብራዚል ኣብ እተገብረ ህዝባዊ ጽምብል: እቲ ናይቲ ሰራዊት ጀነራል ዝዀነ ሚኒስተር: “ከምቲ ዓድና ዚምለኽ” “ሰንደቕ ዕላማና ይኽበርን ይምለኽን” በለ። እወ: ዘ ኢንሳይክሎፔድያ ኣመሪካና እውን “ሰንደቕ ዕላማ ልክዕ ከም መስቀል ቅዱስ እዩ” በለት።

እዛ ኣቐዲማ እተጠቕሰት መዝገበ-ፍልጠት ኣብዚ ቐረባ ግዜ: “ሃገራዊ መዝሙራት መግለጺ ፍቕሪ ሃገር ኰይኑ መብዛሕትኡ ግዜ ኣምላኽ ነቲ ህዝቢ ወይ ነቶም መራሕቲ ሃገር መሪሕነትን ዑቝባን ኪህቦም ዚገልጽ ምሕጽንታ ይርከቦ” በለት። እምበኣር: ኣገልገልቲ የሆዋ ነቲ ንሰንደቕ ዕላማ ሰላምታ ምሃብን ንሃገራዊ መዝሙራትን ዜጠቓልል ሓርበኛዊ ጽምብላት ከም ኣምልኾ ገይሮም ምርኣዮም ኣይተጋገዩን። ዘ ኣመሪካን ካራክተር ዘርእስታ መጽሓፍ: ደቂ ናይ የሆዋ መሰኻኽር ንባንዴራ ሰላምታ ምሃብ ኰነ ኣብ ኣብያተ-ትምህርቲ ሕ.መ.ኣ. ተኣማንነቶም ብማሕላ ምግላጽ ምእባዮም ኣመልኪታ: “እዚ መዓልታዊ ጽምብላት ሃይማኖታዊ ምዃኑ: ብላዕለዋይ ቤት ፍርዲ ኣብ ተኸታታሊ ዝቐረበሉ ጕዳያት ተረጋጊጹ እዩ” በለት።

ህዝቢ የሆዋ ኣብቲ ዘይቅዱስ ጽሑፋዊ ኸም ዝዀነ ገይሮም ዚርእይዎ ጽምብላት ዘይሳተፉ እኳ እንተ ዀኑ: ካልኦት ነዚ ንምግባር ዘለዎም መሰል ግን የኽብሩሎም እዮም። ንሃገራዊ ሰንደቕ ዕላማ ኸም ኣርማ መጠን የኽብርዎ: ነተን ብግቡእ ዝቘማ መንግስትታት ከኣ ከም “ኣገልጋሊ ኣምላኽ” ኰይነን ዜገልግላ ‘ላዕለዎት ስልጣናት’ ከም ዝዀና ኣፍልጦ ይህቡ እዮም። (ሮሜ 13:1-4) ስለዚ: ናይ የሆዋ መሰኻኽር “ስለ ነገስታትን ስለ ዅሎም መኳንንትን” ኪጽልዩ እተዋህቦም ምሕጽንታ ይዓዩሉ እዮም። ከምዚ እንገብረሉ ምኽንያት ግን: “ብዅሉ ኣምልኾን ምርዛንን ሀዲእና ብዘይ ህውከት ምእንቲ ኽንነብር” እዩ።—1 ጢሞቴዎስ 2:2

ኣብ ፖለቲካዊ ምርጫ ምድማጽ። ናይ ሓቂ ክርስትያናት ነቲ ኻልኦት ንኼድምጹ ዘለዎም መሰል የኽብሩሎም እዮም። ሰባት ከየድምጹ ወፈራ ኣይገብሩን እዮም: ምስ እተመርጹ ሰበ-ስልጣን እውን ይተሓባበሩ እዮም። ይኹን እምበር: ኣብ ፖለቲካዊ ጕዳያት ኣህዛብ ፍጹም ገለልትነቶም ይሕልዉ እዮም። (ማቴዎስ 22:21፣ 1 ጴጥሮስ 3:16) ኣብቲ ምድማጽ  ግዴታ ዝዀነሉ ወይ ኣብቲ ነቶም ናብ ነቝጣ ምርጫ ዘይከዱ ሰባት ሕማቕ ስምዒታት ዚበዝሓሉ ዓድታት: ሓደ ክርስትያን እንታይ ኪገብር ኣለዎ፧ ሲድራቅን ሚሳቅን ዓብድ-ኔጎን ክሳዕ ጐልጐል ዱራ ኸም ዝኸዱ ብምዝካር: ኣብ ተመሳሳሊ ዅነታት ሕልናኡ እንተ ፈቒዱሉ ናብቲ ነቝጣ ምርጫ ኪኸይድ ይውስን ይኸውን። ይኹን እምበር: ንገለልትነቱ ንኸይጥሕስ ኪጥንቀቕ ኣለዎ። ነዚ ዚስዕብ ሽዱሽተ ስርዓታት ኣብ ግምት ኬእቱ ኣለዎ:-

  1. ሰዓብቲ የሱስ ‘ካብ ዓለም ኣይኰኑን።’—ዮሃንስ 15:19

  2. ክርስትያናት ንክርስቶስን መንግስቱን ይውክሉ።—ዮሃንስ 18:36፣ 2 ቈረንቶስ 5:20

  3. ክርስትያናዊት ጉባኤ ብእምነት ሓድነት ኣለዋ: ኣባላታ ኸኣ በታ ኸም ናይ ክርስቶስ ዝዓይነታ ፍቕሪ እተኣሳሰሩ እዮም።—1 ቈረንቶስ 1:10፣ ቈሎሴ 3:14

  4. እቶም ንሓደ ብዓል ስልጣን ዚመርጹ: በቲ ንሱ ዚገብሮ ብሓላፍነት ይሕተቱ።—ነቲ ኣብ 1 ሳሙኤል 8:5, 10-18 ከምኡውን 1 ጢሞቴዎስ 5:22 ዚርከብ መሰረታዊ ስርዓት ኣስተብህል።

  5. እስራኤላውያን ሰብኣዊ ገዛኢ ምድላዮም: የሆዋ ንዕኡ ኸም ዝነዓቕዎ ገይሩ እዩ ርእይዎ።—1 ሳሙኤል 8:7

  6. ክርስትያናት ነቶም እተፈላለየ ዓይነት ፖለቲካዊ ኣረኣእያ ዘለዎም ሰባት ብዛዕባ መንግስቲ ኣምላኽ ኪነግርዎም ከለዉ: ከይተሰከፉ ብትብዓት ኪዛረብዎም ኪኽእሉ ኣለዎም።—ማቴዎስ 24:14፣ 28:19, 20፣ እብራውያን 10:35

ሲቭላዊ ኣገልግሎት። ኣብ ገሊኡ ሃገራት: እቶም ንወተሃደራዊ ኣገልግሎት ዚነጽጉ ንእተወሰነ እዋን ኣብ ገሊኡ ዓይነት ሲቭላዊ ኣገልግሎት ኬገልግሉ መንግስቲ ይጠልብ እዩ። ከምዚ ዝኣመሰለ ውሳነ ኼጋጥመና ኸሎ: ብዛዕባኡ ኽንጽሊ ይግባእ: ምናልባት እውን ምስ ብሱላት ክርስትያን ብጾት ክንመያየጠሉ: ድሕሪኡ ኣብቲ እኹል ፍልጠት ዝረኸበ ሕልናና ተመርኲስና ውሳነ ኽንገብር ኣሎና።—ምሳሌ 2:1-5፣ ፊልጲ 4:5 NW

ቃል ኣምላኽ: ‘ንሓላቑን ንስልጣናትን ክንግዛእ: ንመራሕትና ኽንእዘዝ: ንሰናይ ግብሪ ዘበለ እተዳሎና ኽንከውን: ልኡማት ክንከውን’ ይምሕጸነና እዩ። (ቲቶስ 3:1, 2) ነዚ ኣብ ኣእምሮና ብምሓዝ: ከምዚ ዚስዕብ ኢልና ንርእስና ኽንሓትት ንኽእል ኢና:- ‘ነዚ ዚስዕብ ሲቭላዊ ዕዮ ምቕባለይ: ንክርስትያናዊ  ገለልትነተይ ዜለማልም ወይ ኣብ ናይ ሓሶት ሃይማኖት ኢደይ ከም ዘእቱ ዚገብር ድዩ፧’ (ሚክያስ 4:3, 5፣ 2 ቈረንቶስ 6:16, 17) ‘ነዚ ዕዮ እዚ ምዕያየይ: ክርስትያናዊ ሓላፍነታተይ ንኽፍጽም ኣጸጋሚ ወይ ዘይከኣል ይገብሮ ድዩ፧’ (ማቴዎስ 28:19, 20፣ ኤፌሶን 6:4፣ እብራውያን 10:24, 25) ‘በቲ ኻልእ ሸነኽ ድማ: ኣብዚ ኣገልግሎት ምጽማድ ንመንፈሳዊ ንጥፈታተይ ከስፍሕ: ምናልባት ከኣ ኣብ ናይ ምሉእ ግዜ ኣገልግሎት ክሳተፍ ዜፍቅደለይ ድዩ፧’—እብራውያን 6:11, 12

ሓደ ክርስትያን ናብ ቤት ማእሰርቲ ኣብ ክንዲ ዚኣቱ ሲቭላዊ ኣገልግሎት ኪፍጽም ሕልናኡ ዚፈቕደሉ እንተ ዀይኑ: ክርስትያናት ብጾቱ ንውሳነኡ ኬኽብሩሉ ይግባእ። (ሮሜ 14:10) ከምዚ ዝኣመሰለ ኣገልግሎት ኪህብ ዘይክእል ኰይኑ እንተ ተሰሚዕዎ እውን: ካልኦት ነቲ መትከሉ ኬኽብሩሉ ኣለዎም።—1 ቈረንቶስ 10:29፣ 2 ቈረንቶስ 1:24