ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናብ ትሕዝቶ ኺድ

ናይ የሆዋ መሰኻኽር

ትግርኛ

የሱስ—መገድን ሓቅን ህይወትን

 ምዕራፍ 58

ንኣሽሓት መገበ፡ ብዛዕባ ማይ ብሑቝ ድማ ኣጠንቀቐ

ንኣሽሓት መገበ፡ ብዛዕባ ማይ ብሑቝ ድማ ኣጠንቀቐ

ማቴዎስ 15:32–16:12 ማርቆስ 8:1-21

  • የሱስ ን4,000 ሰብኡት መገበ

  • ብዛዕባ ማይ ብሑቝ ፈሪሳውያን ኣጠንቀቐ

ኣብቲ ብምብራቓዊ ሸነኽ ባሕሪ ገሊላ ዚርከብ ዞባ ደካጶሊስ ብዙሓት ህዝቢ ናብ የሱስ ወሓዙ። ኪሰምዕዎን ካብ ሕማሞም ኪሓውዩን ኢሎም ኪመጹ ኸለዉ ኸኣ፡ ስንቆም ዚሕዙሉ ዓብዪ መሶብ ተማልኡ።

ይኹን እምበር፡ የሱስ ጸኒሑ ንደቀ መዛሙርቱ፡ “እዞም ህዝቢ እዚኦም ምሳይ ሰለስተ መዓልቲ ስለ ዝገበሩ፡ ዚብላዕ እውን ስለ ዘይብሎም፡ የደንግጹኒ ኣለዉ። ጾሞም ናብ ቤቶም እንተ ኣሰናቢተዮም፡ ኣብ መገዲ ኺሕለሉ እዮም፣ ገሊኣቶም ከኣ ካብ ርሑቕ እዮም” በሎም። ደቀ መዛሙርቱ ኸኣ፡ “ኣብዚ ጽምዊ ቦታ ደኣ ነዞም ህዝቢ እዚኦም ዜጽግብ እንጌራ ኻበይ ይርከብ፧” ኢሎም ሓተትዎ።—ማርቆስ 8:2-4

የሱስ ድማ፡ “ክንደይ እንጌራ ኣሎኩም፧” በሎም። ደቀ መዛሙርቱ ኸኣ፡ “ሸውዓተ፡ ሒደት ንኣሽቱ ዓሳ እውን” በልዎ። (ማቴዎስ 15:34) ድሕሪኡ፡ የሱስ ነቶም ህዝቢ ኣብ ምድሪ ኪቕመጡ ኣዘዘ። ነተን እንጌራን ነቶም ዓሳን ኣልዒሉ፡ ናብ ኣምላኽ ጸልዩ፡ ኪዕድልዎም ንደቀ መዛሙርቱ ሃቦም። እቲ ዜገርም፡ ኵላቶም በሊዖም ጸገቡ። ብዘይ ኣንስትን ቈልዑን ኣስታት 4,000 ሰብኡት እኳ እንተ በልዑ፡ ዝተረፈ ቝርስራስ፡ ሸውዓተ ዓብዪ መሶብ መሊኦም ኣልዓሉ!

የሱስ ነቶም ህዝቢ ምስ ኣሰናበቶም፡ ንሱን ደቀ መዛሙርቱን ናብቲ ብምዕራባዊ ገምገም ባሕሪ ገሊላ ዚርከብ መገዳን ብጃልባ ተሳገሩ። ኣብኡ ፈሪሳውያን ምስ ገለ ኻብ ወገን ሰዱቃውያን ኰይኖም ንየሱስ ኪፍትንዎ መጹ እሞ ካብ ሰማይ ትእምርቲ ኼርእዮም ሓተትዎ።

የሱስ ድማ ሓሳቦም ፈሊጡ፡ “ምስ መሰየ፡ ‘ሰማይ ቀዪሑ ኣሎ እሞ፡ ጻሕያ ኪኸውን እዩ’ ትብሉ፣ ምስ ወግሐ፡ ‘እቲ እተደባነወ ሰማይ ቀዪሑ ኣሎ እሞ፡ ሎሚ ዝናም ኪዘንም እዩ’ ትብሉ። ትርኢት ሰማይ ብኸመይ ከም እተለልዩ ትፈልጡ፣ ምልክት ግዜያት ግና ከተለልዩ ኣይትኽእሉን” ኢሉ መለሰሎም። (ማቴዎስ 16:2, 3) ድሕሪኡ፡ ንፈሪሳውያንን ንሰዱቃውያንን ብዘይካ ትእምርቲ ዮናስ ካልእ ትእምርቲ ኸም ዘይውሃቦም ነገሮም።

የሱስን ደቀ መዛሙርቱን ኣብ ጃልባ ደዪቦም ናብታ ብሰሜናዊ ምብራቕ ባሕሪ ገሊላ እትርከብ ቤት-ሳይዳ ኸዱ። ኣብ መገዲ ኸለዉ ኸኣ ደቀ መዛሙርቱ እኹል እንጌራ ኸም ዘይተማልኡ፡ ብዘይካ ሓንቲ ኸኣ ከም ዘይብሎም ፈለጡ። የሱስ ነቲ ኣቐድም ኣቢሉ ምስ ፈሪሳውያንን ምስቶም ደገፍቲ ሄሮድስ ዝዀኑ ሰዱቃውያንን እተዘራረቦ ዘኪሩ፡ “ካብ ማይ ብሑቝ ፈሪሳውያንን ካብ ማይ ብሑቝ ሄሮድስን ተጠንቀቑን ተሓለዉን” ኢሉ ኣጠንቀቖም። ደቀ መዛሙርቱ ግና ንማይ ብሑቝ ዝጠቐሰሉ ምኽንያት እንጌራ ብዘይምምላኦም መሰሎም። የሱስ ድማ ከም ዘይተረድኦም ስለ ዘስተብሃለ፡ “እንጌራ ስለ ዘይብልኩም፡ ስለምንታይ ትዛራረቡ ኣለኹም፧” በሎም።—ማርቆስ 8:15-17

የሱስ ኣቐዲሙ ንኣሽሓት ሰባት እንጌራ ሂብዎም እዩ። ስለዚ፡ እቶም ደቀ መዛሙርቱ ብዛዕባ እቲ ዚብላዕ እንጌራ ኸም ዘየተሓሳሰቦ ኺፈልጡ ይግብኦም ነይሩ። “ኣይትዝክሩንዶኸ ኢኹም፧ እቲ ሓሙሽተ እንጌራ ን5,000 ምስ ቈረስክዎ፡ ቍርስራስ ዝመልአ ኽንደይ መሶብ ኣልዒልኩም፧” ኢሉ ሓተቶም። ንሳቶም ከኣ፡ “ዓሰርተው ክልተ” በልዎ። ቀጺሉ፡ “እቲ ሸውዓተ እንጌራ ን4,000 ምስ ቈረስክዎኸ፡ ቍርስራስ ዝመልአ ኽንደይ ዓብዪ መሶብ ኣልዒልኩም፧” በሎም። ንሳቶም ከኣ፡ “ሸውዓተ” ኢሎም መለሱሉ።—ማርቆስ 8:18-20

 ድሕርዚ፡ የሱስ፡ “ብዛዕባ እንጌራ ኸም ዘይተዛረብኩኹም ከመይ ዘይተስተውዕሉ፧ ግናኸ ኻብ ማይ ብሑቝ ፈሪሳውያንን ሰዱቃውያንን ተሓለዉ” በሎም።—ማቴዎስ 16:11

ኣብ መወዳእታ፡ እቶም ደቀ መዛሙርቲ እቲ ሓሳቡ ተረድኦም። ማይ ብሑቝ ንእንጌራ ኸም ዚበኵዕን ሓፍ ከም ዚብልን ይገብር እዩ። የሱስ ኣብዚ ንማይ ብሑቝ ከም ተምሳል ብልሽውና ገይሩ እዩ ተጠቒሙሉ። ንደቀ መዛሙርቱ፡ ካብቲ ኼበላሹ ዚኽእል “ትምህርቲ ፈሪሳውያንን ሰዱቃውያንን” ኪሕለዉ እዩ ኣጠንቂቕዎም።—ማቴዎስ 16:12

ዝያዳ ፍለጥ

ብሒደት ሰባት ንብዙሓት ምምጋብ

የሱስ ኣብ ቀዳማይ ዘመን ንዝነበሩ ክርስትያናት ብኸመይ እዩ መንፈሳዊ ምግቢ ዚህቦም ነይሩ፧ ሎሚኸ ኸምኡ ዓይነት መገዲ ድዩ ዚጥቀም፧